ಅಬ್ಬಬ್ಬಾ ಇಷ್ಟೊಂದು ಲಾಭನಾ? RCB, RR ತಂಡಗಳ ಮಾರಾಟದಿಂದ ಬಿಸಿಸಿಐಗೆ ಹರಿಯಿತು ಹಣದ ಹೊಳೆ! BCCI

BCCI  : ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ಮತ್ತು ರಾಜಸ್ಥಾನ ರಾಯಲ್ಸ್ (RR) ಫ್ರಾಂಚೈಸಿಗಳ ಮಾರಾಟದೊಂದಿಗೆ ವಿಶ್ವದ ನಗದು ಶ್ರೀಮಂತ ಲೀಗ್​ ಎಂದೇ ಖ್ಯಾತಿ ಪಡೆದಿರುವ ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಮತ್ತೊಮ್ಮೆ ತನ್ನ ಆರ್ಥಿಕ ಶಕ್ತಿಯನ್ನು ಜಗತ್ತಿಗೆ ತೋರಿಸಿದೆ. 

ಪ್ರಮುಖ ತಂತ್ರಜ್ಞಾನ ಉದ್ಯಮಿ ಕಲ್ ಸೋಮಾನಿ ನೇತೃತ್ವದ ಒಕ್ಕೂಟವು ಆರ್​ಆರ್​ ತಂಡವನ್ನು 15,300 ಕೋಟಿ ರೂ.ಗಳಿಗೆ ಖರೀದಿಸಿದರೆ, ಆದಿತ್ಯ ಬಿರ್ಲಾ ಗ್ರೂಪ್, ಟೈಮ್ಸ್ ಆಫ್ ಇಂಡಿಯಾ, ಬೋಲ್ಟ್ ವೆಂಚರ್ಸ್ ಮತ್ತು ಬ್ಲಾಕ್‌ಸ್ಟೋನ್ ಒಕ್ಕೂಟ ಆರ್​ಸಿಬಿ ತಂಡವನ್ನು ಬರೋಬ್ಬರಿ 16,706 ಕೋಟಿ ರೂ.ಗಳಿಗೆ ಸ್ವಾಧೀನಪಡಿಸಿಕೊಂಡಿವೆ. ಈ ಒಪ್ಪಂದಗಳು ಭಾರತೀಯ ಕ್ರಿಕೆಟ್​ ನಿಯಂತ್ರಣ ಮಂಡಳಿ ( BCCI ) ಮತ್ತು ಭಾರತದ ಸ್ಪರ್ಧಾ ಆಯೋಗದ ಅನುಮೋದನೆಗೆ ಒಳಪಟ್ಟಿರುತ್ತವೆ. 2026ರ 19ನೇ ಐಪಿಎಲ್​ ಆವೃತ್ತಿಯ ಬಳಿಕ RR ಮತ್ತು RCB ತಂಡಗಳು ಹೊಸ ಮಾಲೀಕತ್ವದ ಕೈಗೆ ಹೋಗಲಿವೆ.

ಅಂದಹಾಗೆ, ಆರ್‌ಆರ್ ಮತ್ತು ಆರ್‌ಸಿಬಿ ಫ್ರಾಂಚೈಸಿಗಳ ಬೃಹತ್ ಒಪ್ಪಂದಗಳು ಬಿಸಿಸಿಐಗೆ ಭಾರಿ ಆದಾಯವನ್ನು ಗಳಿಸುವ ನಿರೀಕ್ಷೆಯಿದೆ. ಎರಡೂ ತಂಡಗಳ ಮಾರಾಟದಿಂದ ಬಿಸಿಸಿಐ ಸುಮಾರು 170 ಮಿಲಿಯನ್ ಡಾಲರ್​ (ಸುಮಾರು ರೂ. 1,570 ಕೋಟಿ) ವರ್ಗಾವಣೆ ಶುಲ್ಕವನ್ನು ಪಡೆಯಲಿದೆ ಎಂದು ವರದಿಯಾಗಿದೆ. 

ಆರ್‌ಆರ್ ಮತ್ತು ಆರ್‌ಸಿಬಿಯ ಒಟ್ಟು ಒಪ್ಪಂದದ ಮೌಲ್ಯ ಸುಮಾರು $3.4 ಬಿಲಿಯನ್ (ಸುಮಾರು ರೂ. 32,000 ಕೋಟಿ). ಇದು ಐಪಿಎಲ್ ಇತಿಹಾಸದಲ್ಲೇ ಅತಿದೊಡ್ಡ ಒಪ್ಪಂದಗಳಲ್ಲಿ ಒಂದಾಗಿದೆ. ಈ ಒಪ್ಪಂದಗಳ ಪ್ರಮುಖ ಅಂಶವೆಂದರೆ 5 ಪ್ರತಿಶತ ವರ್ಗಾವಣೆಯ ಷರತ್ತು. ಫ್ರಾಂಚೈಸಿಗಳು ಮಾಲೀಕತ್ವವನ್ನು ಬದಲಾಯಿಸಿದಾಗ, ಒಟ್ಟು ಮೌಲ್ಯದ 5 ಪ್ರತಿಶತ ಬಿಸಿಸಿಐಗೆ ಹೋಗುತ್ತದೆ ಎಂಬ ನಿಬಂಧನೆ ಇದೆ. ಈ ಷರತ್ತಿನಿಂದಾಗಿ, ಮಂಡಳಿಯು ಹೆಚ್ಚುವರಿ ಆದಾಯವನ್ನು ಪಡೆಯುತ್ತಿದೆ.

ಇತ್ತೀಚಿನ ದಿನಗಳಲ್ಲಿ ಐಪಿಎಲ್ ಜಾಗತಿಕ ಕ್ರೀಡಾ ಮಾರುಕಟ್ಟೆಯಲ್ಲಿ ಅತ್ಯಂತ ಮೌಲ್ಯಯುತ ಲೀಗ್‌ಗಳಲ್ಲಿ ಒಂದಾಗಿ ಹೊರಹೊಮ್ಮುತ್ತಿರುವುದರಿಂದ, ಇಂತಹ ಬೃಹತ್ ಒಪ್ಪಂದಗಳು ಸಾಮಾನ್ಯವಾಗುತ್ತಿವೆ. ಫ್ರಾಂಚೈಸಿಗಳ ಬ್ರಾಂಡ್ ಮೌಲ್ಯ, ಅಭಿಮಾನಿಗಳ ಬೆಂಬಲ ಮತ್ತು ಮಾಧ್ಯಮ ಹಕ್ಕುಗಳಿಂದ ಬರುವ ಆದಾಯ ಎಲ್ಲವೂ ಸೇರಿ ಐಪಿಎಲ್ ಅನ್ನು ಚಿನ್ನದ ಗಣಿಯನ್ನಾಗಿ ಮಾಡಿದೆ. 

ಒಟ್ಟಾರೆಯಾಗಿ, ಇತ್ತೀಚಿನ ಒಪ್ಪಂದಗಳು ಬಿಸಿಸಿಐಗೆ ಮಾತ್ರವಲ್ಲದೆ ಭಾರತೀಯ ಕ್ರಿಕೆಟ್ ಆರ್ಥಿಕತೆಗೂ ದೊಡ್ಡ ಉತ್ತೇಜನವಾಗಿದೆ. ಭವಿಷ್ಯದಲ್ಲಿ ಹೆಚ್ಚಿನ ಫ್ರಾಂಚೈಸಿ ಒಪ್ಪಂದಗಳು ಮತ್ತು ಹೂಡಿಕೆಗಳ ಸಾಧ್ಯತೆಗಳಿವೆ ಎಂದು ತಜ್ಞರು ಊಹಿಸುತ್ತಾರೆ, (ಏಜೆನ್ಸೀಸ್​).