ಕೊಂಚವೂ ವ್ಯತ್ಯಾಸವಿಲ್ಲ ಸೇಮ್ ಟು ಸೇಮ್... ಅಪ್ಪನ ಐಕಾನಿಕ್ ಶಾಟ್ ಕಾಪಿ ಮಾಡಿದ ಆರ್ಯವೀರ್ ಸೆಹ್ವಾಗ್! Virender Sehwag
- ಭಾರತೀಯ ಕ್ರಿಕೆಟ್ ದಿಗ್ಗಜರ ಮಕ್ಕಳು ಈಗ ಮೈದಾನದಲ್ಲಿ ಅದ್ಭುತ ಪ್ರದರ್ಶನ ತೋರುತ್ತಿದ್ದಾರೆ
- ವೀರೇಂದ್ರ ಸೆಹ್ವಾಗ್ ಪುತ್ರರಾದ ಆರ್ಯವೀರ್ ಮತ್ತು ವೇದಾಂತ್ ದೆಹಲಿ ಪ್ರೀಮಿಯರ್ ಲೀಗ್ನಲ್ಲಿ ಭಾಗಿ
- ತಂದೆಯಂತೆ ಬ್ಯಾಕ್-ಫೂಟ್ ಪಂಚ್ ಶಾಟ್ ಹೊಡೆದು ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದ ಆರ್ಯವೀರ್
- ವೆಸ್ಟ್ ದೆಹಲಿ ಲಯನ್ಸ್ ತೊರೆದು ಸೆಂಟ್ರಲ್ ದೆಹಲಿ ಕಿಂಗ್ಸ್ ತಂಡ ಸೇರಿಕೊಂಡ ಆಲ್-ರೌಂಡರ್ ವೇದಾಂತ್
ನವದೆಹಲಿ: ಭಾರತೀಯ ಕ್ರಿಕೆಟ್ ತಂಡದಲ್ಲಿ ಈ ಹಿಂದೆ ಮಿಂಚಿದ ಹಲವು ದಿಗ್ಗಜರ ಮಕ್ಕಳು ಈಗ ಮೈದಾನದಲ್ಲಿ ಅದ್ಭುತ ಪ್ರದರ್ಶನ ನೀಡುತ್ತಿದ್ದಾರೆ. ಕ್ರಿಕೆಟ್ ದಂತಕಥೆ ಸಚಿನ್ ತೆಂಡೂಲ್ಕರ್ ಅವರ ಮಗ ಅರ್ಜುನ್ ತೆಂಡೂಲ್ಕರ್ ಮತ್ತು ರಾಹುಲ್ ದ್ರಾವಿಡ್ ಅವರ ಮಗ ಸಮಿತ್ ದ್ರಾವಿಡ್ ಇದಕ್ಕೆ ಉತ್ತಮ ಉದಾಹರಣೆಯಾಗಿದ್ದಾರೆ. ಆದರೆ, ಅವರ ಸಮಕಾಲೀನರಾಗಿದ್ದ ಮತ್ತೊಬ್ಬ ಭಾರತೀಯ ಸೂಪರ್ ಸ್ಟಾರ್ ಆಟಗಾರನ ಇಬ್ಬರು ಗಂಡು ಮಕ್ಕಳು ಕೂಡ ಕ್ರಿಕೆಟ್ ಮೈದಾನದಲ್ಲಿ ತಮ್ಮ ಪ್ರತಿಭೆಯನ್ನು ತೋರುತ್ತಿದ್ದಾರೆ. ಮಾಜಿ ಭಾರತೀಯ ಆಟಗಾರ ವೀರೇಂದ್ರ ಸೆಹ್ವಾಗ್ ( Virender Sehwag ) ಅವರ ಮಕ್ಕಳಾದ ಆರ್ಯವೀರ್ ಸೆಹ್ವಾಗ್ ಮತ್ತು ವೇದಾಂತ್ ಸೆಹ್ವಾಗ್ ಕ್ರಿಕೆಟ್ ಲೋಕದಲ್ಲಿ ಗಮನ ಸೆಳೆಯುತ್ತಿದ್ದು, ಇವರಿಬ್ಬರೂ ದೆಹಲಿ ಪ್ರೀಮಿಯರ್ ಲೀಗ್ನಲ್ಲಿ (DPL) ವಿವಿಧ ತಂಡಗಳ ಪರವಾಗಿ ಆಡುತ್ತಿದ್ದಾರೆ.
ತಮ್ಮ ತಂದೆಯ ಹೆಜ್ಜೆಗುರುತುಗಳನ್ನೇ ಹಿಂಬಾಲಿಸಿ ಮುನ್ನಡೆಯುತ್ತಿರುವ ಹಿರಿಯ ಪುತ್ರ ಆರ್ಯವೀರ್ ಸೆಹ್ವಾಗ್, 'ವೆಸ್ಟ್ ದೆಹಲಿ ಲಯನ್ಸ್' ತಂಡದ ಆರಂಭಿಕ ಬ್ಯಾಟರ್ ಆಗಿ ಕಣಕ್ಕಿಳಿಯುತ್ತಿದ್ದಾರೆ. ಇತ್ತೀಚೆಗೆ 'ನ್ಯೂ ದೆಹಲಿ ಟೈಗರ್ಸ್' ವಿರುದ್ಧದ ಪಂದ್ಯದಲ್ಲಿ ಆರ್ಯವೀರ್ ಬಾರಿಸಿದ ಒಂದು ಹೊಡೆತವು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿತ್ತು. ಆರ್ಯವೀರ್ ಬಾರಿಸಿದ ಆ ಶಾಟ್, ಅವರ ತಂದೆ ವೀರೇಂದ್ರ ಸೆಹ್ವಾಗ್ ಅವರ ಸಿಗ್ನೇಚರ್ ಶಾಟ್ ಆದ 'ಬ್ಯಾಕ್-ಫೂಟ್ ಪಂಚ್'ನ ಅಚ್ಚುಕಟ್ಟಾದ ನಕಲಿನಂತಿತ್ತು.
ಕೇವಲ 18 ವರ್ಷ ವಯಸ್ಸಿನ ಆರ್ಯವೀರ್, ಇನ್ನಿಂಗ್ಸ್ ಆರಂಭಿಸಿ 14 ಎಸೆತಗಳಲ್ಲಿ 4 ಬೌಂಡರಿಗಳ ಸಮೇತ 22 ರನ್ ಗಳಿಸಿದರು. ಅವರು ಬಾರಿಸಿದ ಆ ಶಾಟ್, 2011ರ ಏಕದಿನ ವಿಶ್ವಕಪ್ನಲ್ಲಿ ಐರ್ಲೆಂಡ್ ವಿರುದ್ಧ ಸೆಹ್ವಾಗ್ ಬಾರಿಸಿದ್ದ ಬ್ಯಾಕ್-ಫೂಟ್ ಪಂಚ್ ಅನ್ನು ಹೋಲುತ್ತಿತ್ತು. ದೆಹಲಿ ಪ್ರೀಮಿಯರ್ ಲೀಗ್ (DPL) ತನ್ನ ಅಧಿಕೃತ ಇನ್ಸ್ಟಾಗ್ರಾಮ್ ಪುಟದಲ್ಲಿ ಇಬ್ಬರ ಬ್ಯಾಟಿಂಗ್ ದೃಶ್ಯಗಳನ್ನು ಹಂಚಿಕೊಂಡಿದ್ದು, ಇದಕ್ಕೆ ಪ್ರತಿಕ್ರಿಯಿಸಿರುವ ಮಾಜಿ ಆಟಗಾರ ಯುವರಾಜ್ ಸಿಂಗ್ ಇದನ್ನು 'ಫೋಟೋಕಾಟ್' ಎಂದು ಬಣ್ಣಿಸಿದ್ದಾರೆ. ಈ ಪಂದ್ಯದಲ್ಲಿ ವೆಸ್ಟ್ ದೆಹಲಿ ಲಯನ್ಸ್ ತಂಡವು ಆರು ವಿಕೆಟ್ಗಳ ಗೆಲುವು ಸಾಧಿಸಿತು.
ಇದಕ್ಕೂ ಮುನ್ನ, 2024ರ ನವೆಂಬರ್ನಲ್ಲಿ ನಡೆದ ಕೂಚ್ ಬೆಹರ್ ಟ್ರೋಫಿ ಪಂದ್ಯದಲ್ಲಿ ಮೇಘಾಲಯ ವಿರುದ್ಧ ದೆಹಲಿ ಪರ ಆಡಿದ ಆರ್ಯವೀರ್ 309 ಎಸೆತಗಳಲ್ಲಿ ಭರ್ಜರಿ 297 ರನ್ ಸಿಡಿಸಿದ್ದರು. ತಮ್ಮ ಟೆಸ್ಟ್ ಕ್ರಿಕೆಟ್ ಗರಿಷ್ಠ ಸ್ಕೋರ್ ಆದ 319 ರನ್ಗಳನ್ನು ತನ್ನ ಮಕ್ಕಳು ಮೀರಿಸಿದರೆ ಫೆರಾರಿ ಕಾರನ್ನು ಉಡುಗೊರೆಯಾಗಿ ನೀಡುವುದಾಗಿ ಸೆಹ್ವಾಗ್ ಹಿಂದೆ ಸಂದರ್ಶನವೊಂದರಲ್ಲಿ ಹೇಳಿದ್ದರು. ಆದರೆ, ಆರ್ಯವೀರ್ ಕೇವಲ 23 ರನ್ಗಳ ಅಂತರದಿಂದ ಆ ಬಹುಮಾನವನ್ನು ಕಳೆದುಕೊಂಡರು.
ಮತ್ತೊಂದೆಡೆ, ಬ್ಯಾಟಿಂಗ್ ಆಲ್-ರೌಂಡರ್ ಆಗಿರುವ ವೇದಾಂತ್ ಸೆಹ್ವಾಗ್ ಈ ಬಾರಿಯ ಸೀಸನ್ಗೂ ಮುನ್ನ ವೆಸ್ಟ್ ದೆಹಲಿ ಲಯನ್ಸ್ ತೊರೆದು 'ಸೆಂಟ್ರಲ್ ದೆಹಲಿ ಕಿಂಗ್ಸ್' ತಂಡವನ್ನು ಸೇರಿಕೊಂಡಿದ್ದಾರೆ. ಆಡುವ ಹನ್ನೊಂದರ ಬಳಗದಲ್ಲಿ ಇನ್ನೂ ಅವರಿಗೆ ಅವಕಾಶ ಸಿಗದಿದ್ದರೂ, ಬದಲಿ ಆಟಗಾರನಾಗಿ ಮೈದಾನದಲ್ಲಿ ಕಾಣಿಸಿಕೊಳ್ಳುತ್ತಿರುವ ವೇದಾಂತ್ ಉತ್ತಮ ತಯಾರಿ ಹಾಗೂ ಪ್ರದರ್ಶನವನ್ನು ನೀಡುತ್ತಾ ಸಾಗುತ್ತಿದ್ದಾರೆ, (ಏಜೆನ್ಸೀಸ್).