ಪ್ಯಾರಿಸ್: "ಟೋಕಿಯೊದಲ್ಲಿ ನಾನು ಆತ್ಮವಿಶ್ವಾಸ ಹೊಂದಿರಲಿಲ್ಲ. ಪ್ರತಿಯೊಂದಕ್ಕೂ ಹೆದರುತ್ತಿದ್ದೆ. ಆದರೆ ಈ ಬಾರಿ ಪ್ಯಾರಿಸ್ನಲ್ಲಿ ಹೆಚ್ಚು ಆತ್ಮವಿಶ್ವಾಸದೊಂದಿಗೆ ಕಣಕ್ಕಿಳಿದೆ. ಅನುಭವದಿಂದ ನಾನು ಪಕ್ವಗೊಂಡಿದ್ದೆ. ಪ್ರಮುಖವಾಗಿ ನನ್ನ ಕೋಚ್ ಜಸ್ಪಾಲ್ ರಾಣಾ ಅವರಿಂದಾಗಿ ಆ ಆತ್ಮವಿಶ್ವಾಸ ಲಭಿಸಿತು. ಈ ಸ್ಪರ್ಧೆಗಳಿಗಿಂತ ಅವರು ನೀಡುವ ತರಬೇತಿಯೇ ಕಠಿಣವಾಗಿರುತ್ತದೆ. ತರಬೇತಿಯ ವೇಳೆ ಕಲಿತಿದ್ದನ್ನು ಸ್ಪರ್ಧೆಯ ವೇಳೆ ಪುನರಾವರ್ತಿಸುವುದಷ್ಟೇ ನನ್ನ ಕೆಲಸವಾಗಿರುತ್ತದೆ. ಪ್ರತಿ ವ್ಯಕ್ತಿಯ ಜೀವನದಲ್ಲಿ ಅನುಭವ ಕಲಿಸುವ ಪಾಠ ಎಲ್ಲಕ್ಕಿಂತ ದೊಡ್ಡದು' ಎಂದು ಮನು ಭಾಕರ್ ಹೇಳಿದ್ದಾರೆ.
ಭಾರತದ ಅವಳಿ ಕಂಚಿನ ತಾರೆ ಮನು ಭಾಕರ್ ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಮೂರನೇ ಪದಕ ಜಯಿಸುವ ಹೊಸ್ತಿಲಲ್ಲಿ ನಿರಾಸೆ ಅನುಭವಿಸಿದರು. ಮಹಿಳೆಯರ 25 ಮೀ. ಪಿಸ್ತೂಲ್ ಶೂಟಿಂಗ್ ಸ್ಪರ್ಧೆಯಲ್ಲಿ ಶನಿವಾರ ನಡೆದ ಫೈನಲ್ನಲ್ಲಿ ಪದಕದ ರೇಸ್ನಲ್ಲಿ ಉಳಿದುಕೊಳ್ಳುವ ಟೈಬ್ರೇಕರ್ ಶೂಟ್ನಲ್ಲಿ ಗುರಿ ತಪ್ಪಿದ ಮನು ಬಾಕರ್, 4ನೇ ಸ್ಥಾನಕ್ಕೆ ತೃಪ್ತಿಪಟ್ಟು ಪದಕ ವಂಚಿತರಾದರು. ಈ ಮೂಲಕ ತ್ರಿವಳಿ ಪದಕ ಗೆಲುವಿನ ಐತಿಹಾಸಿಕ ಸಾಧನೆಯನ್ನೂ ತಪ್ಪಿಸಿಕೊಂಡರು.
8 ಶೂಟರ್ಗಳ ನಡುವೆ ನಡೆದ ಫೈನಲ್ನಲ್ಲಿ ಭರ್ಜರಿ ಆರಂಭ ಕಂಡ ಹರಿಯಾಣದ 22 ವರ್ಷದ ಮನು ಕೆಲಕಾಲ ಅಗ್ರಸ್ಥಾನದಲ್ಲಿದ್ದರು. ಬಳಿಕ 2ನೇ ಸ್ಥಾನಕ್ಕೆ ಜಾರಿದರು. ಎಲಿಮಿನೇಷನ್ ಸುತ್ತು ಆರಂಭಗೊಂಡಾಗಲೂ ಮನು ಜಂಟಿ 2ನೇ ಸ್ಥಾನದೊಂದಿಗೆ ಪದಕದಾಸೆ ಜೀವಂತವಿಟ್ಟಿದ್ದರು. ಆದರೆ ಕೊನೇ 4 ಶೂಟರ್ಗಳಿದ್ದಾಗ ಹಂಗೆರಿಯ ವೆರೋನಿಕಾ ಮೇಜರ್ ಜತೆ 3ನೇ ಸ್ಥಾನದ ಸಮಬಲ ಸಾಧಿಸಿದ ಮನು ಭಾಕರ್, ನಂತರ ನಡೆದ ಟೈ ಬ್ರೇಕರ್ ಶೂಟ್ನಲ್ಲಿ ಮನು (28 ಅಂಕ) 5ರಲ್ಲಿ 2 ಬಾರಿ ಗುರಿ ತಪ್ಪಿದರೆ, ಒಂದೇ ಬಾರಿ ಗುರಿ ತಪ್ಪಿದ ವೆರೋನಿಕಾ (31) ಪದಕ ರೇಸ್ನಲ್ಲಿ ಉಳಿದರು ಮತ್ತು ಅಂತಿಮವಾಗಿ ಕಂಚಿಗೆ ಕೊರಳೊಡ್ಡಿದರು. ಕೊರಿಯಾದ ಜಿನ್ ಯಂಗ್ (37) ಚಿನ್ನ ಮತ್ತು ಫ್ರಾನ್ಸ್ನ ಕ್ಯಾಮಿಲ್ ಜೆಡ್ರೆಜೆವ್ಸ್ಕಿ (37) ಬೆಳ್ಳಿ ಜಯಿಸಿದರು.
10 ಮೀ. ಏರ್ ಪಿಸ್ತೂಲ್ನಲ್ಲಿ ವೈಯಕ್ತಿಕ ಮತ್ತು ಮಿಶ್ರ ತಂಡ ವಿಭಾಗದಲ್ಲಿ ಕಂಚಿನ ಪದಕ ಜಯಿಸಿದ ಬಳಿಕ ಮನು, ವಿಶ್ವ ಚಾಂಪಿಯನ್ ಆಗಿರುವ 25 ಮೀ. ಪಿಸ್ತೂಲ್ ವಿಭಾಗದಲ್ಲಿ ಪದಕದ ಹ್ಯಾಟ್ರಿಕ್ ಸಾಧಿಸುವ ನಿರೀಕ್ಷೆ ಹೆಚ್ಚಾಗಿತ್ತು. ಇದಕ್ಕೆ ತಕ್ಕಂತೆ ಮನು ಉತ್ತಮ ನಿರ್ವಹಣೆ ತೋರಿದರೂ, ಅಂತಿಮ ಹಂತದಲ್ಲಿ ಮಾಡಿಕೊಂಡ ಎಡವಟ್ಟಿನಿಂದಾಗಿ ಪದಕ ಕೈಜಾರಿತು. 2021ರಲ್ಲಿ ಟೋಕಿಯೊದಲ್ಲೂ ಮನು 3 ವಿಭಾಗಗಳಲ್ಲಿ ಸ್ಪರ್ಧಿಸಿದ್ದರೂ, ಮೊದಲ ಸ್ಪರ್ಧೆಯಲ್ಲೇ ಪಿಸ್ತೂಲ್ ಕೈಕೊಟ್ಟ ಬಳಿಕ ಲಯತಪ್ಪಿ ಮೂರೂ ಸ್ಪರ್ಧೆಗಳಲ್ಲಿ ಫೈನಲ್ಗೇರಲು ವಿಲರಾಗಿದ್ದರು. ಆ ಕಹಿಯನ್ನು ಅವರು ಪ್ಯಾರಿಸ್ನಲ್ಲಿ ಮರೆಸಿರುವುದು ವಿಶೇಷ ಸಾಧನೆ ಎನಿಸಿದೆ.
ನರ್ವಸ್ ಆಗಿದ್ದೆ, ಒಪ್ಪಿಕೊಂಡ ಮನು
ಫೈನಲ್ ಸ್ಪರ್ಧೆಯ ಅಂತಿಮ ಹಂತದಲ್ಲಿ ನರ್ವಸ್ ಆಗಿದ್ದೆ. ಶಾಂತವಾಗಿರಲು ಸಾಕಷ್ಟು ಪ್ರಯತ್ನಿಸಿದೆ. ಆದರೆ ಅದು ಸಾಧ್ಯವಾಗಲಿಲ್ಲ ಎಂದು ಮನು 3ನೇ ಪದಕ ಕೈತಪ್ಪಿದ ಬಳಿಕ ಬೇಸರಿಸಿದರು. ಆದರೆ 4ನೇ ಸ್ಥಾನಕ್ಕೆ ತೃಪ್ತಿಪಟ್ಟ ನಡುವೆಯೂ ಸಾಕಷ್ಟು ಸಕಾರಾತ್ಮಕ ಅಂಶಗಳು ಲಭಿಸಿವೆ. ಮುಂದಿನ 2028ರ ಲಾಸ್ ಏಂಜಲಿಸ್ ಒಲಿಂಪಿಕ್ಸ್ಗೆ ಬಲಿಷ್ಠವಾಗಿ ಮರಳುವೆ ಎಂದು ಮನು ತಿಳಿಸಿದರು. "3ನೇ ಪದಕ ಗೆಲುವಿನ ಒತ್ತಡ ನನ್ನ ಮೇಲಿರಲಿಲ್ಲ. ಆದರೆ 4ನೇ ಸ್ಥಾನ ಸಂಭ್ರಮಿಸುವ ಸ್ಥಾನವಲ್ಲ. ಈಗ ಗೆದ್ದಿರುವ 2 ಪದಕಗಳು ಸಾಕಷ್ಟು ಪ್ರೇರಣೆ ತುಂಬಿದೆ. ಇನ್ನಷ್ಟು ಕಠಿಣ ಪರಿಶ್ರಮವಹಿಸಿ ಮುಂದಿನ ಬಾರಿ ಭಾರತಕ್ಕೆ ಇನ್ನೂ ಹಲವು ಪದಕಗಳನ್ನು ಗೆದ್ದುಕೊಡಲು ಪ್ರಯತ್ನಿಸುವೆ' ಎಂದು ಮನು ಭಾಕರ್ ಹೇಳಿದರು.