ಪರ್ತ್: ಇಂದು (ನ.22) ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಐದು ಪಂದ್ಯಗಳ ಟೆಸ್ಟ್ ಸರಣಿಯ ಮೊದಲ ಪಂದ್ಯ ಪರ್ತ್ನಲ್ಲಿ ಆರಂಭವಾಗಿದೆ. ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಟೀಮ್ ಇಂಡಿಯಾ ಮೊದಲ ಇನ್ನಿಂಗ್ಸ್ ಅಂತ್ಯಕ್ಕೆ ಕೇವಲ 150ರನ್ ಗಳಿಸಲಷ್ಟೇ ಶಕ್ತವಾಯಿತು. ಆಲ್ರೌಂಡರ್ ನಿತೀಶ್ ರೆಡ್ಡಿ, ಇನ್ನಿಂಗ್ಸ್ನಲ್ಲಿ 41 ರನ್ ಗಳಿಸಿ ತಂಡದ ಗರಿಷ್ಠ ಸ್ಕೋರರ್ ಆಗಿ ಹೊರಹೊಮ್ಮಿದರು.
ಆಸ್ಟ್ರೇಲಿಯಾ ಪರವಾಗಿ ಜೋಶ್ ಹ್ಯಾಸಲ್ವುಡ್ 4 ವಿಕೆಟ್ ಕಬಳಿಸಿದರು. ಪಂದ್ಯದ ಆರಂಭದಿಂದಲೂ ಆಸ್ಟ್ರೇಲಿಯಾ ಪ್ರಾಬಲ್ಯ ಸಾಧಿಸಿತು. ಭಾರತದ ಇನ್ನಿಂಗ್ಸ್ ಆರಂಭಿಸಿದ ಯಶಸ್ವಿ ಜೈಸ್ವಾಲ್ ಖಾತೆ ತೆರೆಯದೆ ಪೆವಿಲಿಯನ್ನತ್ತ ಸಾಗಿದರೆ. ದೇವದತ್ ಪಡಿಕ್ಕಲ್ ಶೂನ್ಯಕ್ಕೆ ಔಟಾದರು. ಇನ್ನು ಕಣ್ಣು ದಾಖಲೆಗಳ ಸರದಾರ ವಿರಾಟ್ ಕೊಹ್ಲಿ ಮೇಲಿತ್ತು. ಮೈದಾನದಲ್ಲಿ ಅಬ್ಬರಿಸಬೇಕಿದ್ದ ಕಿಂಗ್ ಕೊಹ್ಲಿ, ಕೇವಲ ಐದು ರನ್ ಗಳಿಸುವ ಮೂಲಕ ಅಭಿಮಾನಿಗಳಲ್ಲಿ ನಿರಾಸೆ ಮೂಡಿಸಿದರು. ಸದ್ಯ ಈ ವಿಷಯ ಮಾಜಿ ಕ್ರಿಕೆಟಿಗರ ಚರ್ಚೆಗೆ ಗ್ರಾಸವಾಗಿದೆ.
ವಿರಾಟ್ ಪ್ರದರ್ಶನ ಮೇಲೆ ಭಾರೀ ನಿರೀಕ್ಷೆ ಇಟ್ಟುಕೊಂಡಿದ್ದ ಮ್ಯಾನೇಜ್ಮೆಂಟ್, ಈ ಪಂದ್ಯಗಳಲ್ಲಾದರೂ ಅವರು ಹೆಚ್ಚುವರಿ ರನ್ಗಳನ್ನು ಗಳಿಸಬಹುದು ಎಂಬ ಭರವಸೆಯಲ್ಲಿದ್ದರು. ಆದರೆ, ಇಂದಿನ ಪಂದ್ಯದಲ್ಲಿ ಅದು ಈಡೇರಲಿಲ್ಲ. ಇನ್ನು ಆಸ್ಟ್ರೇಲಿಯಾ ಬೌಲರ್ಗಳ ವಿರುದ್ಧ ಬ್ಯಾಟಿಂಗ್ಗೆ ಬಂದ ವಿರಾಟ್, ಎಡವಿದ್ದೆಲ್ಲಿ? ಮಾಡಿಕೊಂಡ ತಪ್ಪೇನು ಎಂಬುದನ್ನು ಚೇತೇಶ್ವರ್ ಪೂಜಾರ ವಿವರಿಸಿದ್ದಾರೆ. ಒಂದೇ ಒಂದು ಸಣ್ಣ ತಪ್ಪು ಅವರ ವಿಕೆಟ್ ಪತನವಾಗಲು ಕಾರಣವಾಯಿತು ಎಂದು ಪೂಜಾರ ತಿಳಿಸಿದ್ದಾರೆ.
"ಜೋಶ್ ಹ್ಯಾಸಲ್ವುಡ್ ಬೌಲಿಂಗ್ ವೇಳೆ ವಿರಾಟ್ ಕ್ರೀಸ್ಗೆ ಅಂಟಿ ನಿಲ್ಲಬೇಕಿತ್ತೇ ವಿನಃ ಹೊರಗೆ ಬಂದು ಬ್ಯಾಟ್ ಬೀಸಬಾರದಿತ್ತು. ಬರುವ ಬಾಲ್ ಪುಟಿದೇಳುವ ಸಾಧ್ಯತೆಗಳು ಹೆಚ್ಚಿವೆ ಎಂಬುದು ಅವರಿಗೆ ಗೊತ್ತಿತ್ತು. ಆದರೆ, ಆ ಕ್ಷಣದಲ್ಲಿ ಕೊಹ್ಲಿಗೆ ಹೊಂದಾಣಿಕೆ ಮಾಡಿಕೊಳ್ಳಲು ಸಾಧ್ಯವಾಗಿಲ್ಲ. ಬೌನ್ಸ್ ಹಾಗೂ ಬ್ಯಾಟಿಂಗ್ ಶೈಲಿಯನ್ನು ಅರಿತಿದ್ದ ಜೋಶ್, ಅದಕ್ಕೆ ತಕ್ಕಂತೆ ಬಾಲ್ ಎಸೆದು, ಬಹುಮುಖ್ಯ ವಿಕೆಟ್ ಕಬಳಿಸಿದರು. ಇದನ್ನು ವಿರಾಟ್ ಸುಲಭವಾಗಿ ನಿಭಾಯಿಸಬಹುದಿತ್ತು. ಆದರೆ, ಅಷ್ಟರೊಳಗೆ ಬಾಲ್ ಬಂದಿದ್ದೇ ಪತನಕ್ಕೆ ಕಾರಣವಾಯಿತು" ಎಂದು ಹೇಳಿದ್ದಾರೆ,(ಏಜೆನ್ಸೀಸ್).