ನವದೆಹಲಿ: ಏಷ್ಯಾಕಪ್ ಟಿ20 ಟೂರ್ನಿ ಮುಗಿದ ಮೂರೇ ದಿನಗಳಲ್ಲಿ ತವರಿನಲ್ಲಿ ಪ್ರವಾಸಿ ವೆಸ್ಟ್ ಇಂಡೀಸ್ ವಿರುದ್ಧದ ಟೆಸ್ಟ್ ಸರಣಿ ಶುರುವಾಗುತ್ತಿದ್ದರೂ, ವೇಗಿ ಜಸ್ಪ್ರೀತ್ ಬುಮ್ರಾಗೆ ಸ್ಥಾನ ಕಲ್ಪಿಸಲಾಗಿದೆ. ಕಾರ್ಯದೊತ್ತಡ ತಗ್ಗಿಸಲು ಬುಮ್ರಾಗೆ ವಿಶ್ರಾಂತಿ ನೀಡುವ ನಿರೀಕ್ಷೆ ಹುಸಿಯಾಗಿದ್ದು, ಸರಣಿಯ 2 ಪಂದ್ಯಗಳಲ್ಲೂ ಬುಮ್ರಾ ಆಡಲಿದ್ದಾರೆ ಎಂದು ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್ ಅಗರ್ಕರ್ ಸ್ಪಷ್ಟಪಡಿಸಿದ್ದಾರೆ.
ಕಳೆದ ಇಂಗ್ಲೆಂಡ್ ಪ್ರವಾಸದ 5 ಟೆಸ್ಟ್ಗಳಲ್ಲಿ ಬುಮ್ರಾ 2ರಲ್ಲಿ ಮಾತ್ರ ಆಡಿದ್ದರು. "ಇಂಗ್ಲೆಂಡ್ ಪ್ರವಾಸದ ಬಳಿಕ ಬುಮ್ರಾಗೆ ಸೂಕ್ತ ವಿಶ್ರಾಂತಿ ಲಭಿಸಿದೆ. ಅಲ್ಲದೆ ಇಂಗ್ಲೆಂಡ್ನಲ್ಲೂ ಕೊನೇ ಟೆಸ್ಟ್ ಆಡಿರಲಿಲ್ಲ' ಎಂದು ಅಗರ್ಕರ್ ತಿಳಿಸಿದ್ದಾರೆ.
ಕರುಣ್ಗೆ ಮುಚ್ಚಿದ ಬಾಗಿಲು
ಡಿಯರ್ ಕ್ರಿಕೆಟ್ ನನಗೆ ಎರಡನೇ ಅವಕಾಶ ಕೊಡು ಎಂದು ಸಾಮಾಜಿಕ ಜಾಲತಾಣದಲ್ಲಿ ಮನವಿ ಸಲ್ಲಿಸಿ, ದೇಶೀಯ ಕ್ರಿಕೆಟ್ನಲ್ಲಿ ರನ್ಮಳೆ ಹರಿಸುವ ಮೂಲಕ 8 ವರ್ಷಗಳ ಬಳಿಕ ಭಾರತ ತಂಡಕ್ಕೆ ಮರಳಿದ್ದ ಕನ್ನಡಿಗ ಕರುಣ್ ನಾಯರ್ ಇಂಗ್ಲೆಂಡ್ ಪ್ರವಾಸದಲ್ಲಿ ನಿರೀಕ್ಷಿತ ನಿರ್ವಹಣೆ ತೋರಿರಲಿಲ್ಲ. ಹೀಗಾಗಿ ವಿಂಡೀಸ್ ಸರಣಿಗೆ ಸ್ಥಾನ ಉಳಿಸಿಕೊಳ್ಳಲು ವಿಲರಾಗಿದ್ದಾರೆ. ಅಲ್ಲದೆ, 33 ವರ್ಷದ ಕರುಣ್ರನ್ನು ಭವಿಷ್ಯದಲ್ಲಿ ಮತ್ತೆ ಆಯ್ಕೆಗೆ ಪರಿಗಣಿಸದಿರುವ ಸುಳಿವನ್ನೂ ಅಗರ್ಕರ್ ರವಾನಿಸಿದ್ದಾರೆ. "ಇಂಗ್ಲೆಂಡ್ನಲ್ಲಿ ಆಡಿದ 8 ಇನಿಂಗ್ಸ್ಗಳಲ್ಲಿ ಕೇವಲ 1 ಅರ್ಧಶತಕ ಗಳಿಸಿದ ಕರುಣ್, ಅವಕಾಶವನ್ನು ಸಮರ್ಥವಾಗಿ ಬಳಸಿಕೊಳ್ಳಲಿಲ್ಲ. ನಾವು ಅವರಿಂದ ಇನ್ನೂ ಹೆಚ್ಚಿನ ಕೊಡುಗೆ ನಿರೀಕ್ಷಿಸಿದ್ದೆವು. ಈ ಸಮಯದಲ್ಲಿ 15-20 ಟೆಸ್ಟ್ ಅವಕಾಶ ನೀಡಲು ಸಾಧ್ಯವಿಲ್ಲ. ಹೀಗಾಗಿ ಇನ್ನು ಪಡಿಕ್ಕಲ್ಗೆ ಹೆಚ್ಚಿನ ಅವಕಾಶ ನೀಡಲು ಬಯಸಿದ್ದೇವೆ. ಪಡಿಕ್ಕಲ್ ಈಗಾಗಲೆ ಆಡಿರುವ ಕೆಲ ಟೆಸ್ಟ್ಗಳಲ್ಲಿ ಭರವಸೆಯ ನಿರ್ವಹಣೆ ತೋರಿದ್ದಾರೆ' ಎಂದು ಅಗರ್ಕರ್ ವಿವರಿಸಿದರು. ಕನಿಷ್ಠ ಶೇಷ ಭಾರತ ತಂಡದಲ್ಲೂ ಕರುಣ್ಗೆ ಸ್ಥಾನ ಕಲ್ಪಿಸಲಾಗಿಲ್ಲ.