ವಿಜಯವಾಣಿ ಸುದ್ದಿಜಾಲ ಬೆಂಗಳೂರು
ಸಂಟಿತ ಬೌಲಿಂಗ್ ದಾಳಿ ಮತ್ತು ಆರಂಭಿಕರ ಭರ್ಜರಿ ಜತೆಯಾಟದ ಬಲದಿಂದ ಬೆಂಗಳೂರು ಬ್ಲಾಸ್ಟರ್ಸ್ ತಂಡ ಮಹಾರಾಜ ಟ್ರೋಫಿ ಟಿ20 ಟೂರ್ನಿಯ ಮೊದಲ ಸೆಮಿಫೈನಲ್ ಪಂದ್ಯದಲ್ಲಿ ಗುಲ್ಬರ್ಗಾ ಮಿಸ್ಟಿಕ್ಸ್ ವಿರುದ್ಧ 9 ವಿಕೆಟ್ಗಳಿಂದ ಭರ್ಜರಿ ಗೆಲುವು ದಾಖಲಿಸಿದೆ. ಈ ಮೂಲಕ ಲೀಗ್ ಹಂತದ ಅಗ್ರಸ್ಥಾನಿ ಬೆಂಗಳೂರು ಮೊದಲ ತಂಡವಾಗಿ ಫೈನಲ್ಗೇರಿದೆ. ಮಯಾಂಕ್ ಅಗರ್ವಾಲ್ ಪಡೆ ಮೈಸೂರು-ಹುಬ್ಬಳ್ಳಿ ನಡುವಿನ 2ನೇ ಸೆಮೀಸ್ ವಿಜೇತರ ವಿರುದ್ಧ ಭಾನುವಾರ ಪ್ರಶಸ್ತಿಗಾಗಿ ಸೆಣಸಲಿದೆ.
ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಶುಕ್ರವಾರ ನಡೆದ ಉಪಾಂತ್ಯ ಹೋರಾಟದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ಗೆ ಇಳಿದ ಗುಲ್ಬರ್ಗಾ ತಂಡ 81 ರನ್ಗಳಿಗೆ 6 ವಿಕೆಟ್ ಕಳೆದುಕೊಂಡು ಪರದಾಡಿತು. ಬಳಿಕ ಬಾಲಂಗೋಚಿಗಳ ಹೋರಾಟದ ನಡುವೆ ಗುಲ್ಬರ್ಗಾ 19.5 ಓವರ್ಗಳಲ್ಲಿ 155 ರನ್ಗಳಿಗೆ ಸರ್ವಪತನ ಕಂಡಿತು. ಪ್ರತಿಯಾಗಿ ಎಲ್ಆರ್ ಚೇತನ್ (89*ರನ್, 51 ಎಸೆತ, 9 ಬೌಂಡರಿ, 4 ಸಿಕ್ಸರ್) ಮತ್ತು ನಾಯಕ ಮಯಾಂಕ್ ಅಗರ್ವಾಲ್ (52 ರನ್, 37 ಎಸೆತ, 6 ಬೌಂಡರಿ, 1 ಸಿಕ್ಸರ್) ದಿಟ್ಟ ಜತೆಯಾಟದಿಂದ ಬೆಂಗಳೂರು ತಂಡ 17.1 ಓವರ್ಗಳಲ್ಲಿ 1 ವಿಕೆಟ್ಗೆ 159 ರನ್ ಪೇರಿಸಿ ಜಯಿಸಿತು.
ಕುಸಿದ ಮಿಸ್ಟಿಕ್ಸ್
ವಿಕೆಟ್ ಕೀಪರ್-ಆರಂಭಿಕ ಲವ್ನಿತ್ ಸಿಸೋಡಿಯಾ (41 ರನ್, 20 ಎಸೆತ, 5 ಬೌಂಡರಿ 2 ಸಿಕ್ಸರ್) ನಾಯಕ ದೇವದತ್ ಪಡಿಕ್ಕಲ್ (13) ಜತೆಗೂಡಿ ಮೊದಲ ವಿಕೆಟ್ಗೆ 16 ಎಸೆತಗಳಲ್ಲಿ 33 ರನ್ ಸಿಡಿಸಿ ಬಿರುಸಿನ ಆರಂಭ ಒದಗಿಸಿದರು. ಆಗ ಯುವ ಸ್ಪಿನ್ನರ್ ಮೊಹ್ಸಿನ್ ಖಾನ್ 3 ಎಸೆತಗಳ ಅಂತರದಲ್ಲಿ ಪಡಿಕ್ಕಲ್ ಮತ್ತು ಬಿಆರ್ ಶರತ್ (6) ವಿಕೆಟ್ ಕಬಳಿಸಿ ಗುಲ್ಬರ್ಗಾಕ್ಕೆ ಆಘಾತ ನೀಡಿದರು. ನಂತರ ಪವರ್ಪ್ಲೇ ಮುಕ್ತಾಯಕ್ಕೆ ಮುನ್ನ ಸಿಸೋಡಿಯಾ ಎಡಗೈ ವೇಗಿ ಲವಿಶ್ ಕೌಶಲ್ಗೆ ವಿಕೆಟ್ ನೀಡಿದರು. ನಂತರ ಆರ್. ಸ್ಮರಣ್ (10), ಕೆವಿ ಅನೀಶ್ (7) ಮತ್ತು ವೈಶಾಕ್ ವಿಜಯ್ಕುಮಾರ್ (2) 8 ರನ್ ಅಂತರದಲ್ಲಿ ಔಟಾಗುವುದರೊಂದಿಗೆ ಗುಲ್ಬರ್ಗಾ ದಿಢೀರ್ ಕುಸಿತ ಕಂಡಿತು.
ಮೊತ್ತ ಏರಿಸಿದ ದುಬೆ
ಗುಲ್ಬರ್ಗಾ ಸಾಧಾರಣ ಮೊತ್ತಕ್ಕೆ ಕುಸಿಯುವ ಭೀತಿ ಎದುರಾದಾಗ ಪ್ರವಿಣ್ ದುಬೆ (26*) ಉಪಯುಕ್ತ ಆಟದೊಂದಿಗೆ ತಂಡದ ಮೊತ್ತವನ್ನು 150ರ ಗಡಿ ದಾಟಿಸಿದರು. ಅವರಿಗೆ ಪೃಥ್ವಿರಾಜ್ ಶೇಖಾವತ್ (12), ರಿತೀಶ್ ಭಟ್ಕಳ್ (17), ಇಂಪ್ಯಾಕ್ಟ್ ಪ್ಲೇಯರ್ ವಾಹಿದ್ ೈಜಾನ್ ಖಾನ್ (13) ಉತ್ತಮ ಬೆಂಬಲ ಒದಗಿಸಿದರು.
ಮಳೆಯಿಂದ ವಿಳಂಬ
ಉದ್ಯಾನನಗರಿಯಲ್ಲಿ ಶುಕ್ರವಾರ ಸಂಜೆ ಸುರಿದ ಮಳೆಯಿಂದಾಗಿ ಮೊದಲ ಸೆಮಿಫೈನಲ್ ಪಂದ್ಯ 20 ನಿಮಿಷ ತಡವಾಗಿ ಆರಂಭಗೊಂಡಿತು. ಮಳೆ ನೀರು ಇಂಗಿಸುವ ಸುಸಜ್ಜಿತ ಸಬ್ಏರ್ ಸಿಸ್ಟಮ್ ಹೊಂದಿರುವ ಚಿನ್ನಸ್ವಾಮಿ ಸ್ಟೇಡಿಯಂ, ಮಳೆ ಸ್ಥಗಿತಗೊಂಡ ಕೆಲವೇ ನಿಮಿಷಗಳಲ್ಲಿ ಆಟಕ್ಕೆ ಸಜ್ಜಾಯಿತು. ಟಾಸ್ ಪ್ರಕ್ರಿಯೆ ಕೂಡ ನಿಗದಿಗಿಂತ ತಡವಾಗಿ ನಡೆಯಿತು.
ಗುಲ್ಬರ್ಗಾ ಮಿಸ್ಟಿಕ್ಸ್: 19.5 ಓವರ್ಗಳಲ್ಲಿ 155 (ಸಿಸೋಡಿಯಾ 41, ಪಡಿಕ್ಕಲ್ 13, ಬಿಆರ್ ಶರತ್ 6, ಆರ್. ಸ್ಮರಣ್ 10, ಕೆವಿ ಅನೀಶ್ 7, ವೈಶಾಕ್ 2, ಪೃಥ್ವಿರಾಜ್ 12, ರಿತೇಶ್ ಭಟ್ಕಳ್ 17, ಪ್ರವಿಣ್ ದುಬೆ 26, ೈಜಾನ್ ಖಾನ್ 13, ಮೊಹ್ಸಿನ್ ಖಾನ್ 25ಕ್ಕೆ 2, ಲವಿಶ್ 33ಕ್ಕೆ 2, ಕ್ರಾಂತಿ ಕುಮಾರ್ 22ಕ್ಕೆ 2, ಶುಭಾಂಗ್ ಹೆಗ್ಡೆ 23ಕ್ಕೆ 2). ಬೆಂಗಳೂರು ಬ್ಲಾಸ್ಟರ್ಸ್: 17.1 ಓವರ್ಗಳಲ್ಲಿ 1 ವಿಕೆಟ್ಗೆ 159 (ಎಲ್ಆರ್ ಚೇತನ್ 89*, ಮಯಾಂಕ್ 52, ರಿತೇಶ್ ಭಟ್ಕಳ್ 20ಕ್ಕೆ 1).