ನವದೆಹಲಿ: ಪ್ರಸಕ್ತ ನಡೆಯುತ್ತಿರುವ ದುಲೀಪ್ ಟ್ರೋಫಿಯ ಡಿ ತಂಡದ ಕ್ಯಾಪ್ಟನ್ ಆಗಿರುವ ಟೀಮ್ ಇಂಡಿಯಾದ ಸ್ಟಾರ್ ಆಟಗಾರ ಶ್ರೇಯಸ್ ಅಯ್ಯರ್ ಸಮಯ ಅದ್ಯಾಕೋ ಸರಿಯಿಲ್ಲ ಎನ್ನುವಂತೆ ಕಾಣುತ್ತಿದೆ. ಇದಕ್ಕೆ ಕಾರಣ ಇತ್ತೀಚೆಗೆ ನಡೆದ ಭಾರತ ಎ ಮತ್ತು ಡಿ ನಡುವಿನ ಪಂದ್ಯದಲ್ಲಿ ತಂಡದ ಪರ ಶ್ರೇಯಸ್ ನೀಡಿದ ಬ್ಯಾಟಿಂಗ್ ವೈಖರಿ ಸದ್ಯ ವ್ಯಾಪಕ ಟೀಕೆ, ವ್ಯಂಗ್ಯಕ್ಕೆ ಗುರಿಯಾಗಿದ್ದಾರೆ. ಮ್ಯಾಚ್ನಲ್ಲಿ ಬ್ಯಾಟಿಂಗ್ಗೆಂದು ಕ್ರೀಸ್ಗೆ ಬಂದ ಅಯ್ಯರ್, ಹೆಚ್ಚು ಕಾಲ ನಿಂತು ಟೀಮ್ಗೆ ಆಸರೆಯಾಗಲಿದ್ದಾರೆ ಎಂದು ನಿರೀಕ್ಷಿಸಿದ್ದ ಅಭಿಮಾನಿಗಳಿಗೆ ಕಂಡಿದ್ದು ಕಳಪೆ ಪ್ರದರ್ಶನ ಬಿಟ್ಟರೆ ಮತ್ತೇನು ಅಲ್ಲ.
ಸ್ಟೈಲಿಶ್ ಆಗಿ ಆಡಬೇಕೇ ಹೊರತು ಸ್ಟೈಲಿಶ್ ಲುಕ್ ಅಲ್ಲ ಎಂದೆಲ್ಲಾ ಜಾಲತಾಣಗಳಲ್ಲಿ ಟೀಕಿಸಿದ ನೆಟ್ಟಿಗರು, ಶ್ರೇಯಸ್ ಅಯ್ಯರ್ ವಿರುದ್ಧ ವ್ಯಾಪಕ ಟ್ರೋಲ್ ಮಾಡಿ, ವ್ಯಂಗ್ಯವಾಡಿದರು. ಸದ್ಯ ಟೀಮ್ ಇಂಡಿಯಾ ಬಗ್ಗೆ ಯಾವುದಾದರೂ ಒಂದು ವಿಷಯ ಸಿಕ್ಕಿದರೆ ಸಾಕು, ಅದನ್ನೇ ಮುಂದಿಟ್ಟು ಟೀಕಿಸಲು ಕಾದು ಕೂರುವ ಪಾಕ್ ಆಟಗಾರರು ಇದೀಗ ಶ್ರೇಯಸ್ ಅಯ್ಯರ್ ಕಳಪೆ ಪ್ರದರ್ಶನವನ್ನೇ ಟೀಕೆಗೆ ಸರಿಯಾದ ಅಸ್ತ್ರವೆಂದು ಭಾವಿಸಿದ್ದಾರೆ. ಸದ್ಯ ಈ ಸಾಲಿನಲ್ಲಿ ಮುಂಚೂಣಿಯಲ್ಲಿರುವುದು ಪಾಕಿಸ್ತಾನ ಕ್ರಿಕೆಟ್ನ ಮಾಜಿ ಆಟಗಾರ ಬಸಿತ್ ಅಲಿ.
"ಮುಂದಿನ ದಿನಗಳಲ್ಲಿ ಟೆಸ್ಟ್ ಪಂದ್ಯಗಳನ್ನು ಆಡಲು ಅಯ್ಯರ್ಗೆ ಭವಿಷ್ಯವಿಲ್ಲ. ಕ್ರಿಕೆಟ್ಗೆ ಶ್ರೇಯಸ್ ಯೋಗ್ಯನಲ್ಲ. ಅಂದು ವಿಶ್ವಕಪ್ ಪಂದ್ಯದಲ್ಲಿ ಎರಡು ಶತಕ ಬಾರಿಸಿದ ಅಯ್ಯರ್, ಐಪಿಎಲ್ನಲ್ಲಿ ಕೊಲ್ಕತ್ತ ನೈಟ್ ರೈಡರ್ಸ್ ತಂಡವನ್ನು ಚಾಂಪಿಯನ್ ಪಟ್ಟಕೇರಿಸಿದ ಸ್ಟಾರ್ ಆಟಗಾರ. ಇದನ್ನು ಗಮನದಲ್ಲಿಟ್ಟುಕೊಂಡು ನೋಡುವುದಾದರೆ, ಪ್ರಸಕ್ತ ನಡೆಯುತ್ತಿರುವ ದುಲೀಪ್ ಟ್ರೋಫಿಯಲ್ಲಿ ಆತ 100ರಿಂದ 200 ರನ್ ಸಿಡಿಸಬೇಕಿತ್ತು" ಎಂದು ಹೇಳಿದರು.
ಇದನ್ನೂ ಓದಿ: ಸಾಧನೆಗೆ ಬೇಕು ಆತ್ಮಬಲ ಅಸ್ತ್ರ
"ಆದ್ರೆ, ಅದು ಸಾಧ್ಯವಾಗಿಲ್ಲ. ದೇಶಿಯ ಕ್ರಿಕೆಟ್ನಲ್ಲಿ ಅಜಿಂಕ್ಯಾ ರಹಾನೆ ಮತ್ತು ಪೂಜಾರಾ ಆಡದೆ ಇರುವುದೇ ಆತನಿಗೆ ಲಕ್ಕಿಯಾಗಿದೆ. ನನ್ನ ಪ್ರಕಾರ, ಶ್ರೇಯಸ್ಗೆ ಆಟದ ಮೇಲೆ ಗಮನ ಇಲ್ಲ ಎಂಬಂತೆ ತೋರುತ್ತಿದೆ" ಎಂದು ಟೀಕಿಸಿದ್ದಾರೆ,(ಏಜೆನ್ಸೀಸ್).