ನವದೆಹಲಿ: ಭಾರತೀಯ ಕ್ರೀಡೆಯನ್ನು ಡಿಜಿಟಲೀಕರಣಗೊಳಿಸುವ ಪ್ರಕ್ರಿಯೆಗೆ ಕೇಂದ್ರ ಸರ್ಕಾರ ಗುರುವಾರ ಚಾಲನೆ ನೀಡಿದೆ. ಇದರನ್ವಯ ದೇಶದ ಎಲ್ಲ ನೋಂದಾಯಿತ ಕ್ರೀಡಾಪಟುಗಳಿಗೆ ಇನ್ನು ಡಿಜಿಟಲ್ ಪ್ರಮಾಣಪತ್ರವನ್ನು ವಿತರಿಸಲಾಗುವುದು ಎಂದು ಕೇಂದ್ರ ಕ್ರೀಡಾ ಸಚಿವ ಅನುರಾಗ್ ಠಾಕೂರ್ ಘೋಷಿಸಿದ್ದಾರೆ. ಇದು ಕ್ರೀಡಾಪಟುಗಳ ಸ್ಪರ್ಧೆ ಮತ್ತು ನಿರ್ವಹಣೆಯ ದಾಖಲೆಗಳನ್ನು ಪಾರದರ್ಶಕಗೊಳಿಸುವ ಕ್ರಮವೆನಿಸಿದೆ.
"ಕ್ರೀಡಾಪಟುಗಳೇ ಮೊದಲು' ಎಂಬ ಪಾಲಿಸಿಯ ಅನ್ವಯ ಕ್ರೀಡಾಪಟುಗಳಿಗೆ ಐಟಿ ಸಚಿವಾಲಯದ ಪ್ರಮುಖ ಯೋಜನೆಯಾದ ಡಿಜಿಲಾಕರ್ ಮೂಲಕ ಪ್ರಮಾಣಪತ್ರಗಳನ್ನು ವಿತರಿಸಲು ರಾಷ್ಟ್ರೀಯ ಕ್ರೀಡಾ ಒಕ್ಕೂಟಗಳಿಗೆ (ಎನ್ಎಸ್ಎಫ್) ಸೂಚಿಸಲಾಗಿದೆ. ದಾಖಲೆಗಳ ಸುಲಭ ಲಭ್ಯತೆ, ಭದ್ರತೆ, ನಿಖರತೆ ಮತ್ತು ಪಾರದರ್ಶಕತೆಯನ್ನು ಉತ್ತೇಜಿಸುವ ಸಲುವಾಗಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಜತೆಗೆ ಇದು ಎನ್ಎಸ್ಎಫ್ಗಳ ಆಡಳಿತದಲ್ಲಿ ದಕ್ಷತೆಯನ್ನೂ ಹೆಚ್ಚಿಸಲಿದೆ. ಇದು ರಾಷ್ಟ್ರದೆಲ್ಲೆಡೆ ಇರುವ ನಮ್ಮ ಕ್ರೀಡಾಪಟುಗಳ ಬದುಕನ್ನು ಮತ್ತಷ್ಟು ಸುಲಭವಾಗಿಸುತ್ತದೆ. ಅವರ ಪ್ರತಿ ಕ್ರೀಡಾಕೂಟದ ಸ್ಪರ್ಧೆಯ ದಿನಾಂಕಗಳು ಈ ಡಿಟಿಟಲ್ ಪ್ರಮಾಣಪತ್ರದಲ್ಲಿ ಇರುತ್ತದೆ. ಇವು ಅವರ ಸಾಧನೆಗಳ ಪುರಾವೆಯೂ ಆಗಿರುತ್ತವೆ' ಎಂದು ಅನುರಾಗ್ ಠಾಕೂರ್ ಸಾಮಾಜಿಕ ಜಾಲತಾಣ "ಎಕ್ಸ್'ನಲ್ಲಿ ವಿವರಿಸಿದ್ದಾರೆ.
ಈ ತಾಂತ್ರಿಕ ಪ್ರಗತಿಯನ್ನು ಸ್ವೀಕರಿಸಲು ಮತ್ತು ಸುಗಮ ಪರಿವರ್ತನೆಗೆ ಅಗತ್ಯವಿರುವ ಸಂಪೂರ್ಣ ಬೆಂಬಲವನ್ನು ಕ್ರೀಡಾಪಟುಗಳಿಗೆ ಒದಗಿಸುವಂತೆ ಎನ್ಎಸ್ಎಫ್ಗಳಿಗೆ ಅನುರಾಗ್ ವಿನಂತಿಸಿಕೊಂಡಿದ್ದಾರೆ. ಕಳೆದ ವರ್ಷ ಆಗಸ್ಟ್ 29ರ ರಾಷ್ಟ್ರೀಯ ಕ್ರೀಡಾ ದಿನದಂದು ಅನುರಾಗ್ ಠಾಕೂರ್ ಮೊದಲ ಬಾರಿಗೆ ಕ್ರೀಡೆಯ ಡಿಜಿಟಲೀಕರಣದ ಬಗ್ಗೆ ಮಾತನಾಡಿದ್ದರು ಮತ್ತು ಕ್ರೀಡಾಪಟುಗಳಿಗೆ ಎಲ್ಲವನ್ನೂ ಸರಳಗೊಳಿಸುವುದಾಗಿ ಭರವಸೆ ನೀಡಿದ್ದರು.
ಜೂನ್ 1ರಿಂದ ವಿತರಣೆ
ಮುಂದಿನ ಜೂನ್ 1ರ ನಂತರ ಕ್ರೀಡಾಪಟುಗಳು ಭಾಗವಹಿಸಿದ ಕ್ರೀಡಾಕೂಟಗಳಿಗೆ ಆಯಾ ಕ್ರೀಡಾ ಒಕ್ಕೂಟಗಳು ಡಿಜಿಲಾಕರ್ ಮೂಲಕ ನೀಡಿದ ಪ್ರಮಾಣಪತ್ರಗಳಷ್ಟೇ ಮಾನ್ಯವಾಗಿರುತ್ತವೆ. ನಂತರದಲ್ಲಿ ಯಾವುದೇ ಮುದ್ರಿತ ಪ್ರಮಾಣಪತ್ರಗಳನ್ನು ವಿತರಿಸಲಾಗುವುದಿಲ್ಲ ಮತ್ತು ಅವುಗಳನ್ನು ಸರ್ಕಾರಿ ಅಥವಾ ಇತರ ಉಪಯೋಗಗಳಿಗೆ ಮಾನ್ಯ ಮಾಡಲಾಗುವುದಿಲ್ಲ. ಡಿಜಿಲಾಕರ್ನಲ್ಲಿ ಸಂಗ್ರಹಗೊಳಿಸುವ ಈ ಪ್ರಮಾಣಪತ್ರಗಳ ಲಭ್ಯತೆ, ಹಂಚಿಕೆ, ಪರಿಶೀಲನೆ ಸುಲಭವಾಗಿರುತ್ತದೆ. ಮುದ್ರಿತ ಪ್ರಮಾಣಪತ್ರಗಳನ್ನು ಭದ್ರವಾಗಿಟ್ಟುಕೊಳ್ಳುವುದು ಕೂಡ ಕ್ರೀಡಾಪಟುಗಳಿಗೆ ಇದುವರೆಗೆ ತಲೆನೋವಾಗಿತ್ತು. ಮುದ್ರಿತ ಪ್ರಮಾಣಪತ್ರಗಳನ್ನು ಕ್ರೀಡಾಪಟುಗಳಿಗೆ ತಲುಪಿಸುವುದು ಕ್ರೀಡಾ ಆಡಳಿತಾಧಿಕಾರಿಗಳಿಗೆ ಕೂಡ ಸವಾಲಿನ ಕೆಲಸವಾಗಿತ್ತು.