Asian Games: ಭಾರತೀಯ ಬಾಕ್ಸರ್ ಪರ್ವೀನ್ ಹೂಡಾ ಮಹಿಳೆಯರ 65 ಕೆಜಿ ಬಾಕ್ಸಿಂಗ್ ಫೈನಲ್‌ನಲ್ಲಿ ಚಿನ್ನದ ಪದಕ ಗೆದ್ದುಕೊಂಡಿದ್ದಾರೆ. ಫೈನಲ್‌ನಲ್ಲಿ ಚೈನೀಸ್ ತೈಪೆಯ ಚೆನ್ ಅವರನ್ನು ಮಣಿಸಿದ ಹೂಡಾ, ಅತ್ಯಂತ ರೋಚಕವಾಗಿ ನಡೆದ ಪಂದ್ಯದಲ್ಲಿ 3-2 ರ ಸ್ಪ್ಲಿಟ್ ಡಿಸಿಷನ್ ವಿಜಯದೊಂದಿಗೆ ಭಾರತಕ್ಕೆ ಈ ಟೂರ್ನಿಯ 13ನೇ ಚಿನ್ನದ ಪದಕವನ್ನು ತಂದುಕೊಟ್ಟಿದ್ದಾರೆ.
ಈ ಇಬ್ಬರು ಸ್ಟಾರ್ ಬಾಕ್ಸರ್‌ಗಳ ನಡುವಿನ ಹೋರಾಟವು ಅತ್ಯಂತ ರೋಚಕತೆಯಿಂದ ಕೂಡಿತ್ತು. ಕೊನೆಯವರೆಗೂ ಸಾಗಿದ ಈ ಪಂದ್ಯದಲ್ಲಿ 3-2 ರ ಸ್ಕೋರ್‌ನಲ್ಲಿ ಸ್ಪ್ಲಿಟ್ ಡಿಸಿಷನ್ ಮೂಲಕ ಚೀನಾ ಆಟಗಾರ್ತಿಯನ್ನು ಮಣಿಸಿ ಪರ್ವೀನ್ ಹೂಡಾ ಚಿನ್ನದ ಪದಕವನ್ನು ತಂದುಕೊಟ್ಟರು. ಚೆನ್ ಆಕ್ರಮಣಕಾರಿ ಆಟವಾಡಿ ಕೆಲವು ಹುಕ್‌ಗಳನ್ನು ಲ್ಯಾಂಡ್ ಮಾಡಿದರೆ, ಪರ್ವೀನ್ ಅದಕ್ಕೆ ಅತ್ಯುತ್ತಮ 1-2 ಪಂಚ್‌ಗಳ ಮೂಲಕ ತಿರುಗೇಟು ನೀಡಿ ಕೊನೆಗೂ ಜಯಗಳಿಸಿದರು.
ಪರ್ವೀನ್ ಅವರ ಈ ಚಿನ್ನದ ಪದಕದ ಗೆಲುವು ಒಂದು ದೊಡ್ಡ ಕಥೆ ಇದ್ದು, ಹಿಂದಿನ ಏಷ್ಯನ್ ಗೇಮ್ಸ್ ಆವೃತ್ತಿಯಲ್ಲಿ ಡೋಪಿಂಗ್ ವರೆಬೌಟ್ಸ್ ವೈಫಲ್ಯದಿಂದಾಗಿ ಅವರು ಕಂಚಿನ ಪದಕದಿಂದ ವಂಚಿತರಾಗಿದ್ದರು. ಈ ಹಿಂದಿನ ಹಿನ್ನಡೆಯನ್ನು ಮೆಟ್ಟಿನಿಂತು ಅದ್ಭುತ ಪ್ರದರ್ಶನ ನೀಡಿದ ಹೂಡಾ, ಫೈನಲ್‌ನಲ್ಲಿ ಚೆನ್ ಅವರನ್ನು ಸೋಲಿಸಿ ಭಾರತಕ್ಕೆ ಮತ್ತೊಂದು ಚಿನ್ನದ ಪದಕವನ್ನು ತಂದುಕೊಟ್ಟರು.
ಇದಕ್ಕೂ ಮುನ್ನ ಮತ್ತೋರ್ವ ಸ್ಟಾರ್ ಬಾಕ್ಸರ್ ಲವ್ಲಿನಾ ಬೊರ್ಗೊಹೈನ್ ಮಹಿಳೆಯರ 75 ಕೆಜಿ ಬಾಕ್ಸಿಂಗ್ ವಿಭಾಗದಲ್ಲಿ ಚೀನಾದ ಬಾವೊ ಜಿಯಿ ಅವರನ್ನು ಸೋಲಿಸಿ ಚಿನ್ನದ ಪದಕವನ್ನು ತಮ್ಮದಾಗಿಸಿಕೊಂಡರು. ಈ ಗೆಲುವು ತಮಗೆ ಎಷ್ಟು ಮುಖ್ಯವಾಗಿತ್ತು ಎನ್ನುವುದರ ಬಗ್ಗೆ ಅವರು ಮನಬಿಚ್ಚಿ ಮಾತನಾಡಿದರು. ಪಂದ್ಯದುದ್ದಕ್ಕೂ ಜಿಯಿ ಆಕ್ರಮಣಕಾರಿ ಧೋರಣೆ ತೋರಿದರಾದರೂ, ಲವ್ಲಿನಾ ಅದಕ್ಕೆ ತಕ್ಕ ಪ್ರತಿದಾಳಿ ನಡೆಸಿ ಏಕಪಕ್ಷೀಯವಾಗಿ ಜಯಗಳಿಸಿದರು.
ವಿಜಯದ ಬಳಿಕ ಪಿಟಿಐ ಜೊತೆ ಮಾತನಾಡಿರುವ ಲವ್ಲಿನಾ, ಕಳೆದ ಒಂದು ವರ್ಷ ತಮಗೆ ತುಂಬಾ ಕಷ್ಟಕರವಾಗಿತ್ತು ಎಂದು ತಿಳಿಸಿದ್ದಾರೆ. ಒಂದು ಹಂತದಲ್ಲಿ ತಾವು ಬಾಕ್ಸಿಂಗ್ ಕ್ರೀಡೆಯನ್ನೇ ಬಿಟ್ಟುಬಿಡಲು ನಿರ್ಧರಿಸಿದ್ದೆವು ಆದರೆ ಹೇಗೋ ಧೈರ್ಯ ಮಾಡಿ ಆಟವನ್ನು ಮುಂದುವರಿಸಿದೆವು ಎಂದು ಅವರು ಹೇಳಿದ್ದಾರೆ. ಹಿಂದಿನ ಏಷ್ಯನ್ ಗೇಮ್ಸ್‌ನಲ್ಲಿ ತಮ್ಮ ಪದಕದ ಬಣ್ಣವನ್ನು ಚಿನ್ನಕ್ಕೆ ಬದಲಾಯಿಸಬೇಕೆಂಬ ಗಟ್ಟಿ ಗುರಿ ಹೊಂದಿದ್ದುದು ತಮಗೆ ಬಹಳ ಮುಖ್ಯವಾಗಿತ್ತು ಎಂದು ತಿಳಿಸಿರುವ ಅವರು, ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ಬೆಳ್ಳಿ ಪದಕ ಗೆದ್ದಾಗ ತಮಗೆ ತೃಪ್ತಿಯಾಗಿರಲಿಲ್ಲ ಎಂದಿದ್ದಾರೆ.
ಒಬ್ಬ ಕ್ರೀಡಾಪಟುವಿನ ಜೀವನದಲ್ಲಿ ಸೋಲು ಹಾಗೂ ಗಾಯಗಳಂತಹ ಹಲವು ಸವಾಲುಗಳು ಎದುರಾಗುತ್ತವೆ ಮತ್ತು ಅವೆಲ್ಲವನ್ನೂ ಎದುರಿಸಿ ಆಟ ಮುಂದುವರಿಸಿದ್ದರಿಂದಲೇ ಇಂದು ಈ ಚಿನ್ನದ ಪದಕ ಸಿಕ್ಕಿದೆ ಎಂದು ಲವ್ಲಿನಾ ಹರ್ಷ ವ್ಯಕ್ತಪಡಿಸಿದ್ದಾರೆ. ತಮಗೆ ಈಗ ತುಂಬಾ ಖುಷಿಯಾಗಿದೆ ಎಂದಿರುವ ಅವರು, ತಾವೇ ಚಿನ್ನ ಗೆದ್ದಿದ್ದೇನೆ ಎನ್ನುವುದನ್ನು ನಂಬಲು ತಮಗೆ ಇನ್ನೂ ಸ್ವಲ್ಪ ಸಮಯ ಬೇಕು ಮತ್ತು ಈ ಗೆಲುವನ್ನು ಹೇಗೆ ಆಚರಿಸಿಕೊಳ್ಳಬೇಕು ಎಂದೇ ತಮಗೆ ತೋಚುತ್ತಿಲ್ಲ ಎಂದು ತಮ್ಮ ಮನಸ್ಸಿನ ಭಾವನೆಗಳನ್ನು ಹಂಚಿಕೊಂಡಿದ್ದಾರೆ(ಏಜೆನ್ಸೀಸ್).