ಹಾಂಗ್ರೆೌ: ಏಷ್ಯನ್ ಗೇಮ್ಸ್ 19ನೇ ಆವೃತ್ತಿಯಲ್ಲಿ 'ಅಬ್ ಕಿ ಬಾರ್, ಸೌ ಪಾರ್' (ಈ ಬಾರಿ ನೂರರ ಆಚೆ) ಘೋಷಣೆಯೊಂದಿಗೆ ಅಭಿಯಾನ ಆರಂಭಿಸಿದ್ದ ಭಾರತ, 100 ಪದಕ ಗೆಲ್ಲುವ ತನ್ನ ಕನಸನ್ನು ಕ್ರೀಡಾಕೂಟದಲ್ಲಿ ಇನ್ನೂ 2 ದಿನಗಳ ಬಾಕಿ ಇರುವಂತೆಯೇ ನನಸಾಗಿಸಿಕೊಂಡಿದೆ. ಪದಕ ಸ್ಪರ್ಧೆಯ 13ನೇ ದಿನವಾದ ಶುಕ್ರವಾರ ಭಾರತ 1 ಚಿನ್ನ, 2 ಬೆಳ್ಳಿ, 6 ಕಂಚಿನ ಪದಕ ಒಲಿಸಿಕೊಂಡಿತು. ಇದರೊಂದಿಗೆ ಭಾರತದ ಒಟ್ಟು ಪದಕ ಗಳಿಕೆ 95ಕ್ಕೆ (22 ಚಿನ್ನ, 34 ಬೆಳ್ಳಿ, 39 ಕಂಚು) ಏರಿದೆ. ಇದಲ್ಲದೆ ಈಗಾಗಲೆ ಇನ್ನೂ 7 ಪದಕಗಳು (ಕಬಡ್ಡಿ-2, ಕ್ರಿಕೆಟ್-1, ಬ್ಯಾಡ್ಮಿಂಟನ್-1, ಆರ್ಚರಿ-3) ಖಚಿತಗೊಂಡಿರುವುದರಿಂದ ಭಾರತ ಏಷ್ಯಾಡ್ ಇತಿಹಾಸದಲ್ಲಿ ಮೊದಲ ಬಾರಿ 100ಕ್ಕೂ ಅಧಿಕ ಪದಕ ಗೆಲುವಿನ ದಾಖಲೆ ನಿರ್ಮಿಸಿದೆ. 2018ರಲ್ಲಿ 70 ಪದಕ ಗೆದ್ದಿದ್ದು ಇದುವರೆಗಿನ ಗರಿಷ್ಠ ಸಾಧನೆ ಆಗಿತ್ತು.
ಭಾನುವಾರ ಕ್ರೀಡಾಕೂಟದ ಕೊನೆಯ ದಿನವಾಗಿದೆ. ಆದರೆ ಭಾರತದ ಕ್ರೀಡಾಸ್ಪರ್ಧೆಗಳು ಶನಿವಾರವೇ ಮುಕ್ತಾಯಗೊಳ್ಳಲಿವೆ. ಶನಿವಾರ ಭಾರತ ಒಟ್ಟು 6 ಫೈನಲ್ಗಳಲ್ಲಿ ಚಿನ್ನಕ್ಕಾಗಿ ಹೋರಾಡಲಿದೆ. ಜತೆಗೆ ಚೆಸ್ನಲ್ಲಿ ಅವಳಿ ಪದಕದ ನಿರೀಕ್ಷೆ ಇದೆ. ಕುಸ್ತಿ, ಸ್ಕೇಟಿಂಗ್ನಲ್ಲೂ ಪದಕಕ್ಕೆ ಸೆಣಸಲಿದೆ. ಮಹಿಳಾ ಹಾಕಿ, ಆರ್ಚರಿಯಲ್ಲಿ ಕಂಚಿಗೆ ಹೋರಾಡಲಿದೆ.
ಇಂದು 'ಸ್ವರ್ಣ ಸಿಕ್ಸರ್' ನಿರೀಕ್ಷೆ...
ಫೈನಲ್ನಲ್ಲಿ ಭಾರತೀಯರ ಕಾದಾಟ:
*ಪುರುಷರ ಟಿ20 ಕ್ರಿಕೆಟ್
*ಪುರುಷ-ಮಹಿಳಾ ಕಬಡ್ಡಿ
*ಆರ್ಚರಿ ಪುರುಷರ ವೈಯಕ್ತಿಕ
*ಆರ್ಚರಿ ಮಹಿಳಾ ವೈಯಕ್ತಿಕ
*ಬ್ಯಾಡ್ಮಿಂಟನ್ ಡಬಲ್ಸ್: ಚಿರಾಗ್-ಸಾತ್ವಿಕ್
ಏಷ್ಯಾಡ್ನಲ್ಲಿ ಇಂದು ಭಾರತದ ಸ್ಪರ್ಧೆಗಳು
*ಆರ್ಚರಿ: ಬೆಳಗ್ಗೆ 6.10ಕ್ಕೆ ಮಹಿಳೆಯರ ಕಂಪೌಂಡ್ ವಿಭಾಗದ ಕಂಚಿಗಾಗಿ ಅದಿತಿ ಗೋಪಿಚಂದ್ ಕಾದಾಟ; ಬೆಳಗ್ಗೆ 6.30ಕ್ಕೆ ಮಹಿಳೆಯರ ಕಂಪೌಂಡ್ ವಿಭಾಗದ ಚಿನ್ನಕ್ಕೆ ಜ್ಯೋತಿ ಸುರೇಖಾ ಕಾದಾಟ; ಬೆಳಗ್ಗೆ 7.10ಕ್ಕೆ ಪುರುಷರ ಕಂಪೌಂಡ್ ವಿಭಾಗ ಚಿನ್ನ-ಬೆಳ್ಳಿಗೆ ಅಭಿಷೇಕ್ ವರ್ಮ&ಓಜಸ್ ಡಿಯೋಟಾಲ್ ಕಾದಾಟ.
*ಕ್ರಿಕೆಟ್: ಬೆಳಗ್ಗೆ 11.30ರಿಂದ ಪುರುಷರ ವಿಭಾಗದಲ್ಲಿ ಅಫ್ಘಾನಿಸ್ತಾನ ವಿರುದ್ಧ ಫೈನಲ್.
*ಕಬಡ್ಡಿ: ಬೆಳಗ್ಗೆ 7ರಿಂದ ಮಹಿಳಾ ವಿಭಾಗದಲ್ಲಿ ಚೀನಾ ತೈಪೆ ವಿರುದ್ಧ ಫೈನಲ್; ಮಧ್ಯಾಹ್ನ 12.30ರಿಂದ ಪುರುಷರ ವಿಭಾಗದಲ್ಲಿ ಇರಾನ್ ವಿರುದ್ಧ ಫೈನಲ್.
*ಕುಸ್ತಿ: ಬೆಳಗ್ಗೆ 7.30ರಿಂದ ಪುರುಷರ 74 ಕೆಜಿ ವಿಭಾಗ: ಯಶ್ ಕಣಕ್ಕೆ; 86 ಕೆಜಿ ವಿಭಾಗ: ದೀಪಕ್ ಪೂನಿಯಾ ಕಣಕ್ಕೆ; 97 ಕೆಜಿ ವಿಭಾಗ: ವಿಕ್ಕಿ ಚಹರ್ ಕಣಕ್ಕೆ; 125 ಕೆಜಿ ವಿಭಾಗ: ಸುಮಿತ್ ಮಲಿಕ್ ಕಣಕ್ಕೆ.
*ಹಾಕಿ: ಮಧ್ಯಾಹ್ನ 1.30ರಿಂದ ಮಹಿಳಾ ವಿಭಾಗದಲ್ಲಿ ಜಪಾನ್ ಎದುರು ಕಂಚಿಗೆ ಹೋರಾಟ.
*ಚೆಸ್: ಮಧ್ಯಾಹ್ನ 12.30ರಿಂದ ಪುರುಷ-ಮಹಿಳಾ ತಂಡ ವಿಭಾಗದ 9ನೇ ಹಾಗೂ ಕೊನೇ ಸುತ್ತು.
*ಬ್ಯಾಡ್ಮಿಂಟನ್: ಬೆಳಗ್ಗೆ 11.30ರಿಂದ ಪುರುಷರ ಡಬಲ್ಸ್ ಫೈನಲ್.