Sharmila Tagore Childhood Photo: ಮಕ್ಕಳ ದಿನಾಚರಣೆ ಅಂಗವಾಗಿ ನಟಿ ಸೋಹಾ ಅಲಿ ಖಾನ್ ತಮ್ಮ ಕುಟುಂಬದ ಹಳೆಯ ನೆನಪುಗಳನ್ನು ಮೆಲುಕು ಹಾಕಿದ್ದಾರೆ. ತಾಯಿ ಶರ್ಮಿಳಾ ಟ್ಯಾಗೋರ್ ಮತ್ತು ತಂದೆ, ಖ್ಯಾತ ಕ್ರಿಕೆಟಿಗ ಮನ್ಸೂರ್ ಅಲಿ ಖಾನ್ ಪಟೌಡಿ ಅವರು ಬಾಲ್ಯದಲ್ಲಿದ್ದಾಗ ಜವಾಹರಲಾಲ್ ನೆಹರು ಅವರೊಂದಿಗೆ ತೆಗೆಸಿಕೊಂಡಿದ್ದ ಅಪರೂಪದ ಫೋಟೋಗಳನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ.
ಪ್ರತಿ ವರ್ಷ ನವೆಂಬರ್ 14ರಂದು ಜವಾಹರಲಾಲ್ ನೆಹರು ಅವರ ಜನ್ಮದಿನದ ಅಂಗವಾಗಿ ದೇಶಾದ್ಯಂತ ಮಕ್ಕಳ ದಿನಾಚರಣೆಯನ್ನು ಆಚರಿಸಲಾಗುತ್ತದೆ. ಈ ವಿಶೇಷ ದಿನದಂದು ಸೋಹಾ ಹಂಚಿಕೊಂಡಿರುವ ಹಳೆಯ ಕಪ್ಪು-ಬಿಳುಪು ಫೋಟೋಗಳು ಗಮನ ಸೆಳೆದಿವೆ.
ಸೋಹಾ ಅಲಿ ಖಾನ್ ಒಟ್ಟು ಮೂರು ಹಳೆಯ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ಮೊದಲ ಫೋಟೋದಲ್ಲಿ ಬಾಲಕಿಯಾಗಿದ್ದ ಶರ್ಮಿಳಾ ಟ್ಯಾಗೋರ್ ಅವರು ನೆಹರು ಅವರ ಕೋಟಿಗೆ ಏನನ್ನೋ ಪಿನ್ ಮಾಡುತ್ತಿರುವುದು ಕಾಣಿಸುತ್ತದೆ. ಮತ್ತೊಂದು ಫೋಟೋದಲ್ಲಿ ಅವರು ಆಲ್ ಇಂಡಿಯಾ ರೇಡಿಯೋ (AIR) ಬಳಿ ನೆಹರು ಅವರ ಪಕ್ಕದಲ್ಲಿ ನಿಂತಿದ್ದಾರೆ
ಮೂರನೇ ಫೋಟೋದಲ್ಲಿ ಸೋಹಾ ಅವರ ತಂದೆ, ಅಂದಿನ ಬಾಲಕ ಮನ್ಸೂರ್ ಅಲಿ ಖಾನ್ ಪಟೌಡಿ ಅವರು ನೆಹರು ಅವರ ಪಕ್ಕದಲ್ಲಿ ಕುಳಿತಿರುವುದನ್ನು ಕಾಣಬಹುದು.
ಫೋಟೋಗಳ ಜತೆಗೆ ಸೋಹಾ ಅಲಿ ಖಾನ್ ಭಾವನಾತ್ಮಕ ಬರಹವನ್ನೂ ಹಂಚಿಕೊಂಡಿದ್ದಾರೆ. ‘ನನ್ನ ತಂದೆ-ತಾಯಿಯಾಗುವುದಕ್ಕೂ ಮೊದಲು ಅವರೂ ಮಕ್ಕಳಾಗಿದ್ದರು. ಮಕ್ಕಳ ದಿನಾಚರಣೆಯಂದು ನಮ್ಮ ಕುಟುಂಬದ ಹಳೆಯ ಆಲ್ಬಮ್‌ನಲ್ಲಿರುವ ಈ ವಿಶೇಷ ಫೋಟೋಗಳನ್ನು ಹಂಚಿಕೊಳ್ಳುತ್ತಿದ್ದೇನೆ. ನನ್ನ ತಾಯಿ ಮತ್ತು ತಂದೆ ಬಾಲ್ಯದಲ್ಲಿ ಮಕ್ಕಳೇ ದೇಶದ ಭವಿಷ್ಯ ಎಂದು ನಂಬಿದ್ದ ನೆಹರು ಅವರೊಂದಿಗೆ ಕಳೆದ ಕ್ಷಣಗಳಿವು’ ಎಂದು ಬರೆದುಕೊಂಡಿದ್ದಾರೆ.
ಸೋಹಾ ಹಂಚಿಕೊಂಡಿರುವ ಈ ಅಪರೂಪದ ಫೋಟೋಗಳು ಅವರ ಕುಟುಂಬದ ಹಳೆಯ ನೆನಪುಗಳನ್ನು ಮತ್ತೆ ಮುನ್ನೆಲೆಗೆ ತಂದಿವೆ. ಮಕ್ಕಳ ದಿನಾಚರಣೆಯ ಸಂದರ್ಭದಲ್ಲಿ ನೆಹರು ಅವರೊಂದಿಗಿನ ಶರ್ಮಿಳಾ ಟ್ಯಾಗೋರ್ ಮತ್ತು ಟೈಗರ್ ಪಟೌಡಿ ಅವರ ಬಾಲ್ಯದ ಕ್ಷಣಗಳು ವಿಶೇಷ ಗಮನ ಸೆಳೆದಿವೆ.