ನವದೆಹಲಿ: ಈಗೇನಿದ್ದರೂ ಡಿಜಿಟಲ್ ಯುಗ. ಎಲ್ಲದಕ್ಕೂ ಒಟಿಪಿ, ಪಾಸ್ವರ್ಡ್ ಕಡ್ಡಾಯವೆನ್ನುವಂತಾಗಿದೆ ಬದುಕು. ಆದರೆ ನೀವು ಗೌಪ್ಯವಾಗಿಡುವ ಪಾಸ್ವರ್ಡ್ಗಳು ಅದೆಷ್ಟು ಸೇಫ್ ಎನ್ನುವುದು ನಿಮಗೆ ಗೊತ್ತಿದೆಯೇ?
ಸಾಮಾನ್ಯವಾಗಿ ಪಾಸ್ವರ್ಡ್ ಕೊಡಬೇಕೆಂದರೆ, ನಾವು ನೆನಪಿನಲ್ಲಿಟ್ಟುಕೊಳ್ಳುವಂತದ್ದನ್ನೇ ಕೊಡಬೇಕು. ಆ ಪಟ್ಟಿಯಲ್ಲಿ ಮೊದಲು ಬರುವುದು 123456789... ಆದರೆ ಇಂತಹ ಮಾಮೂಲಿ ಪಾಸ್ವರ್ಡ್ಗಳು ನಿಮ್ಮ ಖಾತೆಗಳಿಗೆ ಅಷ್ಟೇ ಡೇಂಜರಸ್ ಕೂಡ.
ಜಾಗತಿಕವಾಗಿ ಜನರು ಬಳಕೆ ಮಾಡುವ ಅತಿ ಕೆಟ್ಟ ಪಾಸ್ವರ್ಡ್ಗಳ ಪಟ್ಟಿಯನ್ನು ನಾರ್ಡ್ಪಾಸ್ ಸಂಸ್ಥೆ ಬಿಡುಗಡೆ ಮಾಡಿದೆ. ಈ ಪಟ್ಟಿಯ ಪ್ರಕಾರ 2020ರಲ್ಲಿ 123456 ಪಾಸ್ವರ್ಡ್ ಅತಿ ಹೆಚ್ಚು ಬಳಕೆಯಾಗಿದೆಯಂತೆ. ಹಾಗೆಯೇ ಇದು ಅತ್ಯಂತ ಕೆಟ್ಟ ಪಾಸ್ವರ್ಡ್ ಎನ್ನುವುದನ್ನೂ ಸಂಸ್ಥೆ ಹೇಳಿದೆ. 123456 ಪಾಸ್ವರ್ಡ್ನ್ನು 23 ಮಿಲಿಯನ್ಗೂ ಹೆಚ್ಚು ಜನರು ಬಳಕೆ ಮಾಡುತ್ತಿದ್ದಾರೆ. ಹ್ಯಾಕರ್ಗಳಿಗೆ ಈ ಪಾಸ್ವರ್ಡ್ ಕಂಡುಹಿಡಿಯಲು ಒಂದು ಸೆಕೆಂಡಿಗಿಂತ ಕಡಿಮೆ ಸಮಯ ಸಾಕಾಗುತ್ತದಂತೆ.
ಕೆಟ್ಟ ಮತ್ತು ಅತಿ ಹೆಚ್ಚು ಬಳಕೆಯ ಪಾಸ್ವರ್ಡ್ಗಳ ಪಟ್ಟಿಯಲ್ಲಿ 123456789 ಎರಡನೇ ಸ್ಥಾನದಲ್ಲಿದೆ. ಇದನ್ನೂ ಕೂಡ ಹ್ಯಾಕರ್ಗಳು ಒಂದು ಸೆಕೆಂಡಿಗಿಂತ ಕಡಿಮೆ ಸಮದಯಲ್ಲಿ ಕಂಡುಹಿಡಿಯಬಲ್ಲರು. ಉಳಿದಂತೆ 'ಪಾಸ್ವರ್ಡ್', '123123', '12345', '1234567890' ಮುಂತಾದ ಪಾಸ್ವರ್ಡ್ಗಳು ಪಟ್ಟಿಯಲ್ಲಿ ಕಾಣಿಸಿಕೊಂಡಿವೆ. (ಏಜೆನ್ಸೀಸ್)