ತೆಲಂಗಾಣ: ಅನಾರೋಗ್ಯದ ಕಾರಣಕ್ಕಾಗಿ ಆಸ್ತಿ-ಮನೆ ಮಾರಾಟ ಮಾಡಿದವರಿರುತ್ತಾರೆ. ಆದರೆ ಇಲ್ಲೊಬ್ಬ ವ್ಯಕ್ತಿ ತನ್ನ ಮಗನ ಚಿಕಿತ್ಸೆಗಾಗಿ ಇನ್ನೊಬ್ಬ ಮಗನನ್ನೇ ಮಾರಾಟ ಮಾಡಲು ಯತ್ನಿಸಿದ ಪ್ರಕರಣ ನಡೆದಿದೆ. ಆದರೆ ಈ ವಿಷಯ ಗೊತ್ತಾದ ಪತ್ನಿ, ಪತಿಯ ವಿರುದ್ಧ ಪೊಲೀಸರಿಗೆ ದೂರು ನೀಡಿದ್ದಾಳೆ.
ತೆಲಂಗಾಣದ ವಾರಂಗಲ್ನಲ್ಲಿ ಇಂಥದ್ದೊಂದು ಪ್ರಕರಣ ನಡೆದಿದೆ. ಇಲ್ಲಿನ ಕರೀಮಬಾದ್ ನಿವಾಸಿ ಮಸೂದ್ ಎಂಬಾತನೇ ಮಗನನ್ನು ಮಾರಾಟ ಮಾಡಲು ಯತ್ನಿಸಿದ್ದ ವ್ಯಕ್ತಿ. ಈತ ತನ್ನ ಕಿರಿಯ ಮಗನ ಚಿಕಿತ್ಸೆಗಾಗಿ ಅವನಿಗಿಂತ ಹಿರಿಯ ಅಂದರೆ 4 ವರ್ಷದ ಪುತ್ರನನ್ನು ಮಾರಾಟ ಮಾಡಲು ಮುಂದಾಗಿದ್ದ.
ಇದನ್ನೂ ಓದಿ: ‘ಪಾದಯಾತ್ರೆ ಅಷ್ಟೇ ಅಲ್ಲ, ತೀರ್ಥಯಾತ್ರೆಗೂ ಸಜ್ಜಾಗಿ’: ಕಾಂಗ್ರೆಸ್ ವಿರುದ್ಧ ಏನಿದು ಬಿಜೆಪಿಯ ಹೊಸ ಪ್ಲ್ಯಾನ್?
ಕಿರಿಯ ಮಗನನ್ನು ಇಲ್ಲಿನ ಎಂಜಿಎಂ ಆಸ್ಪತ್ರೆಯಲ್ಲಿ ದಾಖಲಿಸಲಾಗಿದ್ದು, ಆ ಖರ್ಚನ್ನು ಭರಿಸಲಾಗದೆ ಚಿಂತಿತನಾಗಿದ್ದ. ಅದಕ್ಕಾಗಿ ತನ್ನ 4 ವರ್ಷದ ಪುತ್ರ ಅಯನ್ ಎಂಬಾತನನ್ನು ಮಾರಾಟ ಮಾಡಲು ನಿರ್ಧರಿಸಿದ್ದ. ತಾನು ಪುತ್ರನನ್ನು ತನ್ನ ಸಹೋದರಿಯ ಮನೆಗೆ ಕರೆದುಕೊಂಡು ಹೋಗುತ್ತಿರುವುದಾಗಿ ಪತ್ನಿ ಬಳಿ ಹೇಳಿ ಕರೆದೊಯ್ದಿದ್ದ.
ಆದರೆ ಈ ವಿಷಯ ಪತ್ನಿಗೆ ಗೊತ್ತಾಗಿ ಆಕೆ ಪೊಲೀಸರಿಗೆ ಮಾಹಿತಿ ನೀಡಿದ್ದಾಳೆ. ತನ್ನ ಸಹೋದರನೊಂದಿಗೆ ಮತ್ತೆವಾಡಾ ಪೊಲೀಸ್ ಠಾಣೆಗೆ ತೆರಳಿ ಈ ಮಹಿಳೆ ದೂರು ನೀಡಿದ್ದಾಳೆ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. -ಏಜೆನ್ಸೀಸ್