ಮಂಗಳೂರು: ಈಕೆ ಒಂದು ವರ್ಷದ ಹಿಂದೆ ತಾನು ಇಷ್ಟಪಟ್ಟ ಹುಡುಗನೊಂದಿಗೆ ಮದುವೆಯಾಗಿ ಸುಖವಾಗಿದ್ದಳು. ಆದರೆ ಇದೀಗ ಈಕೆ ನೇಣಿಗೆ ಶರಣಾಗಿದ್ದು ಆಕೆಯ ಕುಟುಂಬಸ್ಥರಿಗೆ ಆಘಾತ ತಂದಿದೆ.
ಮಂಗಳೂರು ಸುರತ್ಕಲ್ನ ಬಾಳ ಗ್ರಾಮದಲ್ಲಿ ನೇಣು ಬಿಗಿದುಕೊಂಡು ವಿವಾಹಿತ ಮಹಿಳೆ ಆತ್ಮಹತ್ಯೆ ಮಾಡಿಕೊಂಡ ಘಟನೆ ನಡೆದಿದ್ದು ದಿವ್ಯಾ (26) ಮೃತ ಮಹಿಳೆಯಾಗಿದ್ದಾರೆ.
ಮೆಡಿಕಲ್ ಶಾಪ್ ನಲ್ಲಿ ಕೆಲಸ ಮಾಡಿಕೊಂಡಿದ್ದ ದಿವ್ಯಾ ಹಾಗೂ ಆಟೋ ಚಾಲಕರಾಗಿ ದುಡಿಯುತ್ತಿದ್ದ ಆಕೆಯ ಪತಿ ಹರೀಶ್ ನಡುವೆ ಪ್ರೇಮಾಂಕುಯರವಾಗಿತ್ತು. ಒಂದು ವರ್ಷದ ಹಿಂದೆ ಇಬ್ಬರೂ ಪ್ರೀತಿಸಿ ಮದುವೆಯಾಗಿದ್ದರು. ಹೀಗೆ ಈ ದಂಪತಿ ಸಂಸಾರ ಸಾಗಿಸುತ್ತಿದ್ದರು.
ಈಕೆ ಹಾಗೂ ಈಕೆಯ ಪತಿ ಇಬ್ಬರೂ ಸೇರಿ ನೆರೆ ಮನೆಯ ಕಾರ್ಯಕ್ರಮ ಒಂದರಲ್ಲಿ ಭಾಗವಹಿಸಲು ತೆರಳಿದ್ದರು. ಕಾರ್ಯಕ್ರಮದ ನಡುವೆಯೇ ದಿವ್ಯಾ ಮನೆಗೆ ಒಬ್ಬರೇ ವಾಪಾಸ್ ಬಂದಿದ್ದಾರೆ. ಪಕ್ಕದಲ್ಲೇ ಮನೆ ಇದ್ದ ಕಾರಣ ಪತಿ ಕೂಡ ಈ ಬಗ್ಗೆ ಹೆಚ್ಚು ಆಲೋಚನೆ ಮಾಡಿರಲಿಲ್ಲ. ಆದರೆ ಪತಿ ಮನೆಗೆ ವಾಪಸ್ ಬಂದಾಗ ಆತನಿಗೆ ಆಘಾತ ಕಾದಿತ್ತು.
ಪತಿ ವಾಪಾಸು ಮನೆಗೆ ಬಂದಾಗ ದಿವ್ಯಾ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಬೆಳಕಿಗೆ ಬಂದಿದ್ದು ಅಲ್ಲಿದ್ದ ಎಲ್ಲರಿಗೂ ಆಘಾತ ನೀಡಿದೆ. ಇದೀಗ ಸುರತ್ಕಲ್ ಪೊಲೀಸ್ ಠಾಣೆಯಲ್ಲಿ ಅಸಹಜ ಸಾವು ಪ್ರಕರಣ ದಾಖಲಾಗಿದ್ದು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.