Pregnancy care: ಗರ್ಭಿಣಿಯರು ಖರ್ಜೂರ ತಿನ್ನಬೇಕು ಅಂತ ನಮ್ಮ ಹಿರಿಯರು ಹೇಳೋದನ್ನು ನೀವು ಕೇಳಿರಬಹುದು. ಇದು ಬರೀ ನಂಬಿಕೆಯಲ್ಲ, ಇದರ ಹಿಂದೆ ಬಲವಾದ ವೈಜ್ಞಾನಿಕ ಕಾರಣವಿದೆ. ದೇಹಕ್ಕೆ ತಕ್ಷಣವೇ ಶಕ್ತಿ ನೀಡುವ ಪ್ರಮುಖ ಪೋಷಕಾಂಶಗಳು ಖರ್ಜೂರದಲ್ಲಿ ತುಂಬಿವೆ.
ಗರ್ಭಿಣಿಯರಿಗೆ ಹಾಗೂ ಹೆರಿಗೆಯ ಸಮಯದಲ್ಲಿ ಖರ್ಜೂರ ಸೇವನೆ ಬಹಳ ಪ್ರಯೋಜನಕಾರಿಯಾಗಿದೆ. ವೈದ್ಯಕೀಯ ಸಂಶೋಧನೆಗಳ ಪ್ರಕಾರ, ಗರ್ಭಾವಸ್ಥೆಯ ಕೊನೆಯ ವಾರಗಳಲ್ಲಿ ಪ್ರತಿದಿನ 4 ರಿಂದ 6 ಖರ್ಜೂರಗಳನ್ನು ತಿನ್ನುವುದರಿಂದ ಹಲವು ಆರೋಗ್ಯ ಲಾಭಗಳನ್ನು ಪಡೆದುಕೊಳ್ಳಬಹುದು.
ಆಕ್ಸಿಟೋಸಿನ್ ತರಹದ ಕೆಲಸ: ಖರ್ಜೂರದಲ್ಲಿರುವ ನೈಸರ್ಗಿಕ ಸಂಯುಕ್ತಗಳು ದೇಹದಲ್ಲಿ 'ಆಕ್ಸಿಟೋಸಿನ್' ಹಾರ್ಮೋನ್‌ನಂತೆ ಕೆಲಸ ಮಾಡುತ್ತವೆ. ಇದು ಗರ್ಭಾಶಯದ ಸ್ನಾಯುಗಳ ಸಂಕೋಚನಕ್ಕೆ ಸಹಾಯ ಮಾಡಿ ಹೆರಿಗೆಯ ಪ್ರಕ್ರಿಯೆಯನ್ನು ಸುಲಭಗೊಳಿಸುತ್ತದೆ.
ಹೆರಿಗೆಯ ನೋವಿನ ಸಮಯ ಕಮ್ಮಿ: ನಿಯಮಿತವಾಗಿ ಖರ್ಜೂರ ಸೇವಿಸಿದ ಮಹಿಳೆಯರಲ್ಲಿ ನೈಸರ್ಗಿಕ (ನಾರ್ಮಲ್) ಹೆರಿಗೆಯಾಗುವ ಸಾಧ್ಯತೆ ಹೆಚ್ಚು ಮತ್ತು ಹೆರಿಗೆಯ ಮೊದಲ ಹಂತದ ನೋವಿನ ಅವಧಿ ಕಡಿಮೆಯಿರುತ್ತದೆ.
ರಕ್ತಸ್ರಾವ ನಿಯಂತ್ರಣ ಹಾಗೂ ಶಕ್ತಿ: ಹೆರಿಗೆಯ ನಂತರ ಉಂಟಾಗುವ ಅತಿಯಾದ ರಕ್ತಸ್ರಾವ ತಡೆಯಲು ಇದು ಸಹಕಾರಿ. ಹೆರಿಗೆಯ ತೀವ್ರ ಆಯಾಸದ ಸಮಯದಲ್ಲಿ ದೇಹಕ್ಕೆ ಅಗತ್ಯವಿರುವ ಗ್ಲುಕೋಸ್ ಮತ್ತು ತ್ವರಿತ ಶಕ್ತಿಯನ್ನು ಒದಗಿಸುತ್ತದೆ.
ತ್ವರಿತ ಶಕ್ತಿ: ಗ್ಲುಕೋಸ್, ಫ್ರಕ್ಟೋಸ್ ಮತ್ತು ಸುಕ್ರೋಸ್ ಸಮೃದ್ಧವಾಗಿದ್ದು, ತಕ್ಷಣದ ಚೈತನ್ಯ ನೀಡುತ್ತದೆ.
ರಕ್ತಹೀನತೆ ನಿವಾರಣೆ: ಕಬ್ಬಿಣಾಂಶ ಹೆಚ್ಚಾಗಿರುವುದರಿಂದ ಹಿಮೋಗ್ಲೋಬಿನ್ ಮಟ್ಟ ಹೆಚ್ಚಿಸಿ ಅನಿಮಿಯಾ ದೂರ ಮಾಡುತ್ತದೆ.
ಮಲಬದ್ಧತೆ ಮುಕ್ತಿ: ನಾರಿನಂಶ (ಫೈಬರ್) ಅಧಿಕವಾಗಿದ್ದು ಜೀರ್ಣಕ್ರಿಯೆ ಉತ್ತಮಗೊಳಿಸುತ್ತದೆ.
ಹೃದಯ ಮತ್ತು ಮೂಳೆಗಳ ಆರೋಗ್ಯ: ಪೊಟ್ಯಾಸಿಯಮ್, ಮೆಗ್ನೀಸಿಯಮ್ ಹಾಗೂ ಕ್ಯಾಲ್ಸಿಯಂ ಅಂಶಗಳು ರಕ್ತದೊತ್ತಡ ನಿಯಂತ್ರಿಸಲು ಮತ್ತು ಮೂಳೆ ಬಲಪಡಿಸಲು ಸಹಕಾರಿ.
ಖರ್ಜೂರದಲ್ಲಿ ಕ್ಯಾಲೋರಿ ಮತ್ತು ಸಕ್ಕರೆ ಪ್ರಮಾಣ ಹೆಚ್ಚಿರುವುದರಿಂದ ತೂಕ ಇಳಿಸಿಕೊಳ್ಳುವವರು ಮಿತವಾಗಿ ತಿನ್ನಬೇಕು. ಇನ್ನು ಮಧುಮೇಹ (ಶುಗರ್) ಇರುವವರು ವೈದ್ಯರ ಸಲಹೆ ಪಡೆದು ದಿನಕ್ಕೆ 1-2 ಖರ್ಜೂರ ಮಾತ್ರ ಸೇವಿಸುವುದು ಒಳಿತು.
ಗರ್ಭಾವಸ್ಥೆಯಲ್ಲಿ ಅತಿಯಾದ ಆಯಾಸ ಅಥವಾ ದೌರ್ಬಲ್ಯ ಕಂಡುಬಂದರೆ ಅದು ಕೇವಲ ಪೋಷಕಾಂಶಗಳ ಕೊರತೆಯಾಗಿರದೆ ರಕ್ತಹೀನತೆ, ಗೆಸ್ಟೇಶನಲ್ ಡಯಾಬಿಟಿಸ್ ಅಥವಾ ಥೈರಾಯ್ಡ್ ಏರುಪೇರಿನ ಸಂಕೇತವೂ ಆಗಿರಬಹುದು. ಹೀಗಾಗಿ ತೊಂದರೆಯಿದ್ದರೆ ವೈದ್ಯರನ್ನು ಸಂಪರ್ಕಿಸಿ.
ರಾತ್ರಿ 3ರಿಂದ 4 ಖರ್ಜೂರಗಳನ್ನು ನೀರಿನಲ್ಲಿ ನೆನೆಸಿಟ್ಟು, ಬೆಳಿಗ್ಗೆ ಖಾಲಿ ಹೊಟ್ಟೆಯಲ್ಲಿ ತಿಂದರೆ ಜೀರ್ಣಕ್ರಿಯೆ ಚೆನ್ನಾಗಿ ಆಗುತ್ತದೆ. ಇನ್ನು ರಾತ್ರಿ ಮಲಗುವ ಮುನ್ನ ಉಗುರುಬೆಚ್ಚಗಿನ ಹಾಲಿನೊಂದಿಗೆ ಖರ್ಜೂರ ಸೇವಿಸಿದರೆ ದೈಹಿಕ ಶಕ್ತಿ ಹೆಚ್ಚುವುದಲ್ಲದೆ, ನಿದ್ದೆಯೂ ಚೆನ್ನಾಗಿ ಬರುತ್ತದೆ.