ಕರೊನಾ ವೈರಸ್ನ್ನು ಇಡೀ ಜಗತ್ತು ಬಹಳ ಗಂಭೀರವಾಗಿ ಪರಿಗಣಿಸಿದೆ. ಈ ಸೋಂಕು ಹರಡುವುದನ್ನು ತಡೆಯಲು ಇನ್ನಿಲ್ಲದ ಪ್ರಯತ್ನಗಳನ್ನು ಮಾಡುತ್ತಿದ್ದರೆ, ಅಮೆರಿಕದ ಅಲಬಾಮಾ ಸಿಟಿಯ ಒಂದಷ್ಟು ಕಾಲೇಜು ವಿದ್ಯಾರ್ಥಿಗಳು ಕೊವಿಡ್-19 ವಿಚಾರದಲ್ಲಿ ಅಕ್ಷರಶಃ ಹುಡುಗಾಟ ಆಡುತ್ತಿದ್ದಾರೆ.
ಅಲಬಾಮಾ ಯೂನಿವರ್ಸಿಟಿ ಸೇರಿ ಹಲವು ಕಾಲೇಜು ವಿದ್ಯಾರ್ಥಿಗಳು ಸೇರಿಕೊಂಡು ಕೊವಿಡ್-19 ಪಾರ್ಟಿ ಆಯೋಜಿಸುತ್ತಿದ್ದಾರೆ. ಏನಿದು ಕೊವಿಡ್-19 ಪಾರ್ಟಿ ಎಂದು ಗೊಂದಲ ಬೇಡ..ಈ ಸುದ್ದಿ ಓದಿ
ಟಸ್ಕಲೂಸಾ ಸಿಟಿಯ ಕೌನ್ಸಿಲರ್ ಸೋನ್ಯಾ ಮಾಕ್ಕಿನ್ಸ್ಟ್ರಿ ಈ ಬಗ್ಗೆ ವಿವರಣೆ ನೀಡಿದ್ದಾರೆ. ಕೆಲವು ಕಾಲೇಜುಗಳ ವಿದ್ಯಾರ್ಥಿಗಳು ಕೊವಿಡ್-19 ಪಾರ್ಟಿ ಆಯೋಜಿಸುತ್ತಾರೆ. ಕರೊನಾ ಪಾಸಿಟಿವ್ ಇರುವ ವ್ಯಕ್ತಿಗಳನ್ನು ಅದಕ್ಕೆ ಗಣ್ಯರನ್ನಾಗಿ ಕರೆಸುತ್ತಾರೆ. ಹಾಗೇ ವಿದ್ಯಾರ್ಥಿಗಳೂ ಪಾರ್ಟಿಯಲ್ಲಿ ಭಾಗವಹಿಸುತ್ತಾರೆ. ಈ ಪಾರ್ಟಿಯಲ್ಲಿ ಒಂದು ಮಡಕೆಯನ್ನಿಟ್ಟು, ಅದರಲ್ಲಿ ಹಣವನ್ನು ಇಡಲಾಗುತ್ತದೆ. ಪಾರ್ಟಿ ಮುಗಿದ ಬಳಿಕ ಅದರಲ್ಲಿ ಭಾಗವಹಿಸಿದ್ದವರಲ್ಲಿ ಯಾರಿಗೆ ಮೊದಲು ಕರೊನಾ ಸೋಂಕು ಕಾಣಿಸಿಕೊಳ್ಳುತ್ತದೆಯೋ ಅವರಿಗೆ ಆ ಮಡಕೆಯಲ್ಲಿದ್ದ ಹಣ ಸೇರುತ್ತದೆ. ಇವರೆಲ್ಲ ಉದ್ದೇಶಪೂರ್ವಕವಾಗಿ ಕೊವಿಡ್-19 ಸೋಂಕನ್ನು ತಮಗೆ ಹಚ್ಚಿಸಿಕೊಳ್ಳುತ್ತಿದ್ದಾರೆ ಎಂದು ಸೋನ್ಯಾ ತಿಳಿಸಿದ್ದಾರೆ. ಇದನ್ನೂ ಓದಿ: ಕೊವಿಡ್-19ಗೆ ಇನ್ನೊಂದು ಹೆಸರಿಟ್ಟ ಯುಎಸ್ ಅಧ್ಯಕ್ಷ ಟ್ರಂಪ್; ಮತ್ತೆ ಚೀನಾ ವಿರುದ್ಧ ಕುಹಕದ ಮಾತುಗಳು
ಈ ಪಾರ್ಟಿಯನ್ನು ಆಯೋಜಿಸುವವರು ಬೇಕೆಂದಲೇ ಕೊವಿಡ್-19 ಸೋಂಕಿತರನ್ನು ಆಹ್ವಾನಿಸುತ್ತಾರೆ. ಅವರಿಂದ ತಮಗೂ ಸೋಂಕು ಹಬ್ಬಿಸಿಕೊಂಡು, ಹಣವನ್ನು ತಾವೇ ಪಡೆಯಬೇಕು ಎಂದು ವಿಚಿತ್ರ ಉದ್ದೇಶ ಇಟ್ಟುಕೊಂಡು ಕಾರ್ಯಕ್ರಮ ನಡೆಸುತ್ತಿದ್ದಾರೆ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.
ಮೊದಲು ಈ ಪಾರ್ಟಿಯ ಬಗ್ಗೆ ಸ್ಥಳೀಯ ಆಡಳಿತ ನಂಬಿರಲಿಲ್ಲ. ಇಂಥ ನಾನ್ಸೆನ್ಸ್ಗಳನ್ನು ಯಾರು ಮಾಡುತ್ತಾರೆ ಎಂದೇ ಭಾವಿಸಲಾಗಿತ್ತು. ಆದರೆ ಬಳಿಕ ನಡೆದ ತನಿಖೆಯಲ್ಲಿ ಪಾರ್ಟಿಗಳು ನಡೆಯುತ್ತಿರುವುದು ಸತ್ಯ ಎಂಬುದು ಸಾಬೀತಾಗಿದೆ ಎಂದು ಸೋನ್ಯಾ ಮಾಹಿತಿ ನೀಡಿದ್ದಾರೆ.
ವಿದ್ಯಾರ್ಥಿಗಳ ವಿರುದ್ಧ ಏನು ಕ್ರಮ ಕೈಗೊಳ್ಳಲಾಗಿದೆ ಎಂಬ ಬಗ್ಗೆ ಇನ್ನೂ ಸ್ಪಷ್ಟ ಮಾಹಿತಿ ಸಿಕ್ಕಿಲ್ಲ.(ಏಜೆನ್ಸೀಸ್)