ನವದೆಹಲಿ: ಕಳೆದ ಆರು ತಿಂಗಳಿನಿಂದ ಇಡೀ ವಿಶ್ವವನ್ನೇ ಇನ್ನಿಲ್ಲದಂತೆ ಕಾಡುತ್ತಿರುವ ಕರೊನಾ ವೈರಸ್ಗೆ ಸದ್ಯ ಲಸಿಕೆ ಸಂಶೋಧನೆ ಕಾರ್ಯ ವೇಗವಾಗಿ ನಡೆಯುತ್ತಿದೆ. ಇದರ ನಡುವೆ, ಕರೊನಾ ವೈರಸ್ ಮೂಲ ಯಾವುದು ಎಂಬುದನ್ನು ಪತ್ತೆ ಹಚ್ಚಲು ವಿಶ್ವಸಂಸ್ಥೆ ಮುಂದಾಗಿದೆ.
ಇತ್ತೀಚೆಗೆ ವಿಶ್ವ ಆರೋಗ್ಯ ಸಂಸ್ಥೆಯ ಮಹಾಧಿವೇಶನದಲ್ಲಿ ಅಮೆರಿಕ ಸೇರಿ 123ಕ್ಕೂ ಅಧಿಕ ದೇಶಗಳು ಕರೊನಾ ಮೂಲ ಕಂಡು ಹಿಡಿಯಲು ತನಿಖೆ ನಡೆಸಬೇಕೆಂದು ಹೇಳಿದ್ದವು. ಇದಕ್ಕೆ ಚೀನಾ ವಿರೋಧ ವ್ಯಕ್ತಪಡಿಸಿತ್ತು.
ಇದನ್ನೂ ಓದಿ; ಸ್ವದೇಶಿ ಕರೊನಾ ಲಸಿಕೆಗೆ ಅಪಸ್ವರಗಳೆದ್ದಿರೋದೇಕೆ? ಆಗಸ್ಟ್ 15ಕ್ಕೆ ಲಸಿಕೆ ಸಜ್ಜು ಎನ್ನುವುದು ಅವಾಸ್ತವಿಕವೇ?
ಚೀನಾದಲ್ಲಿ ಸಾಂಕ್ರಾಮಿಕ ರೋಗವೊಂದು ಹರಡಿದೆ ಎಂದು 2020ರ ಜನವರಿ 9ರಂದು ವಿಶ್ವ ಆರೋಗ್ಯ ಸಂಸ್ಥೆಯ ಸ್ಥಳೀಯ ಘಟಕವು ಕೇಂದ್ರ ಕಚೇರಿಗೆ ಮಾಹಿತಿ ನೀಡಿತ್ತು. ಇದಾದ ಬಳಿಕ ಫೆ.11ರಂದು ವಿಶ್ವ ಆರೋಗ್ಯ ಸಂಸ್ಥೆ ಇದಕ್ಕೆ ಕೋವಿಡ್19 ಎಂದು ಹೆಸರಿಟ್ಟಿತ್ತು.
ಚೀನಾದಲ್ಲಿ ಕರೊನಾ ಕಾಣಿಸಿಕೊಂಡಿದೆ ಎಂದು ಗೊತ್ತಾದ ಆರು ತಿಂಗಳ ಬಳಿಕ ಅದರ ಮೂಲದ ತನಿಖೆಗೆ ವಿಶ್ವ ಆರೋಗ್ಯ ಸಂಸ್ಥೆ ಮುಂದಾಗಿದೆ. ಮುಂದಿನ ವಾರ ಚೀನಾಗೆ ತಜ್ಞರ ತಂಡವೊಂದು ಭೇಟಿ ನೀಡಲಿದೆ.
ಕರೊನಾ ವೈರಸ್ ಮೂಲ ಯಾವುದೆಂದು ಪತ್ತೆ ಹಚ್ಚಲು ಸಮಗ್ರ ತನಿಖೆ ನಡೆಸಬೇಕಾದ ಅಗತ್ಯವಿದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಮುಖ್ಯ ತಜ್ಞರಾದ ಡಾ. ಸೌಮ್ಯಾ ಸ್ವಾಮಿನಾಥನ್ ಹೇಳಿದ್ದಾರೆ. ಇದಕ್ಕಾಗಿ ಚೀನಾ ಸರ್ಕಾರದೊಂದಿಗೆ ಯೋಜನೆ ರೂಪಿಸಲಾಗಿದೆ.
ಪ್ರಾಣಿಯಿಂದ ಮನುಷ್ಯನಿಗೆ ಇದು ಹೇಗೆ ಹಬ್ಬಿತು? ಇವೆರಡರ ನಡುವೆ ಇನ್ನೊಂದು ಪ್ರಾಣಿ ಇದೆಯೇ? ಅಥವಾ ಕರೊನಾ ವೈರಸ್ ಬಾವಲಿಗಳಿಂದ ಮನುಷ್ಯನ ಸಂಪರ್ಕಕಕ್ಕೆ ಬಂತಾ? ಅಥವಾ ನೇರವಾಗಿ ಮನುಷ್ಯ ಇದರ ಸೋಂಕಿಗೆ ಒಳಗಾಗಿದ್ದಾನಾ? ಅದರ ಮೂಲ ಯಾವುದು ಎಂಬುದನ್ನೆಲ್ಲ ಕಂಡುಕೊಳ್ಳಬೇಕಿದೆ ಎಂದು ಅವರು ಹೇಳಿದ್ದಾರೆ.
ಇದನ್ನೂ ಓದಿ; ಬೆಳಗಾವಿ ರೋಗಿಗಳು ಪಡೆಯಲಿದ್ದಾರೆ ದೇಶದ ಮೊಟ್ಟ ಮೊದಲ ಕರೊನಾ ಲಸಿಕೆ; ಕ್ಲಿನಿಕಲ್ ಟ್ರಯಲ್ಗೆ 12 ಸಂಸ್ಥೆಗಳ ಆಯ್ಕೆ
ಚೀನಾದ ವುಹಾನ್ನಲ್ಲಿ ಸಾಂಕ್ರಾಮಿಕ ರೋಗ ಡಿಸೆಂಬರ್ 31ಕ್ರಂಕೂ ಮುಂಚೆಯೇ ಹರಡಿರುವುದು ಖಚಿತವಾಗಿತ್ತು. ಆದರೆ, ಬೇರೆ ದೇಶಗಳಿಗೆ ಈ ಮಾಹಿತಿಯನ್ನು ನೀಡಲು ವಿಳಂಬ ಮಾಡಿದೆ ಎಂಬುದು ಆರೋಪವಾಗಿದೆ.