ಇಸ್ಲಮಾಬಾದ್: ಕಳೆದ ವರ್ಷ ಜಮ್ಮು ಮತ್ತು ಕಾಶ್ಮೀರದ ಪುಲ್ವಾಮದಲ್ಲಿ ನಡೆದ ಉಗ್ರರ ದಾಳಿಗೆ ಪಾಕಿಸ್ತಾನವೇ ಹೊಣೆ ಎಂದು ಪಾಕ್ ಸಚಿವ ತಮ್ಮದೇ ಸಂಸತ್ತಿನಲ್ಲಿ ಒಪ್ಪಿಕೊಂಡಿದ್ದಾರೆ.
2019ರ ಫೆಬ್ರವರಿ 14ರಂದು ಪುಲ್ವಾಮದಲ್ಲಿ ನಡೆದ ಉಗ್ರರ ದಾಳಿಯಲ್ಲಿ ಭಾರತ ಪ್ಯಾರಾಮಿಲಿಟರಿ ಪಡೆಯ 30 ಸೈನಿಕರು ಹುತಾತ್ಮರಾಗಿದ್ದರು. ಈ ದಾಳಿಯಲ್ಲಿ ತಮ್ಮ ಪಾತ್ರ ಇರುವುದಾಗಿ ಪಾಕ್ ಸಚಿವ ಒಪ್ಪಿಕೊಂಡಿದ್ದಾರೆ. ಗಡಿಯಾಚೆಗಿನ ಭಯೋತ್ಪಾದನೆಗೆ ತಮ್ಮ ಪ್ರಾಯೋಜಕತ್ವ ಇರುವುದನ್ನು ಸಂಸತ್ತಿನಲ್ಲಿಂದು ಒಪ್ಪಿಕೊಂಡಿದ್ದಾರೆ.
ನಾವು ಭಾರತ ನೆಲದಲ್ಲೇ ಹೊಡೆದೆವು. ಪುಲ್ವಾಮದಲ್ಲಿನ ನಮ್ಮ ಯಶಸ್ಸು, ಪ್ರಧಾನಿ ಇಮ್ರಾನ್ ಖಾನ್ ನಾಯಕತ್ವದ ಅಡಿಯಲ್ಲಿರುವ ಜನರ ಯಶಸ್ಸಾಗಿದೆ. ನಾವು ಮತ್ತು ನೀವು ಎಲ್ಲರೂ ಈ ಯಶಸ್ಸಿನಲ್ಲಿ ಭಾಗಿಯಾಗಿದ್ದೇವೆ ಎಂದು ಪಾಕ್ನ ಫೆಡರಲ್ ಮಿನಿಸ್ಟರ್ ಫವಾದ್ ಚೌಧುರಿ ಸಂಸತ್ತಿನಲ್ಲೇ ಬಾಯ್ಬಿಟ್ಟಿದ್ದಾರೆ.
ಪುಲ್ವಾಮ ದಾಳಿ ಪ್ರತೀಕಾರವಾಗಿ ಗಡಿ ನಿಯಂತ್ರಣ ರೇಖೆಯ ಬಳಿ ಭಾರತ ಮತ್ತು ಪಾಕಿಸ್ತಾನ ಫೈಟರ್ ಜೆಟ್ಗಳ ನಡುವೆ ಎನ್ಕೌಂಟರ್ ಸಹ ನಡೆಯಿತು. ಇದಾದ ಬಳಿಕ ಪಾಕ್ ವಿದೇಶಾಂಗ ಸಚಿವ ಶಾ ಮೊಹಮ್ಮದ್ ಖುರೇಶಿ ಮತ್ತು ಸೇನಾ ಮುಖ್ಯಸ್ಥ ಜನರಲ್ ಕ್ವಾಮರ್ ಜಾವೇದ್ ಬಜ್ವಾ ನಡುವೆ ಸಭೆ ನಡೆದಿದ್ದು, ಇದರಲ್ಲಿ ಚರ್ಚೆಯಾದ ವಿಷಯಗಳನ್ನು ಪಾಕ್ ಪ್ರತಿಪಕ್ಷ ನಾಯಕ ಅಯಾಜ್ ಸಾದಿಖ್ ನಿನ್ನೆ (ಅ.28) ಸಂಸತ್ತಿನಲ್ಲಿ ಬಹಿರಂಗಪಡಿಸಿದ್ದರು. ಇಂದು ಸಾದಿಖ್ ಭಾಷಣದ ಮೇಲಿನ ಚರ್ಚೆಯ ವೇಳೆ ಪಾಕ್ ಸಚಿವ ಫವಾದ್, ಪುಲ್ವಾಮ ದಾಳಿ ಮಾಡಿಸಿದ್ದು ನಾವೇ ಎಂದು ಒಪ್ಪಿಕೊಂಡಿದ್ದಾರೆ.
ಪಾಕಿಸ್ತಾನದ ನ್ಯಾಷನಲ್ ಅಸೆಂಬ್ಲಿಯಲ್ಲಿ ನಿನ್ನೆ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ ಸಾದಿಖ್, ಅಂದು ವರ್ಧಮಾನ್ ಅಭಿನಂದನ್ ಅವರನ್ನು ಬಿಡುಗಡೆ ಮಾಡದೇ ಇರ್ತಿದ್ರೆ ಭಾರತವೇನೂ ನಮ್ಮ ಮೇಲೆ ದಾಳಿ ಮಾಡ್ತಾ ಇರಲಿಲ್ಲ. ಇನ್ನೂ ನೆನಪಿದೆ ನನಗೆ. ಅಂದು ವಿದೇಶಾಂಗ ಸಚಿವ ಶಾ ಮೊಹಮ್ಮದ್ ಖುರೇಶಿ ಸಭೆಯಲ್ಲಿದ್ರು. ಪ್ರಧಾನಿ ಇಮ್ರಾನ್ ಖಾನ್ ಸಭೆ ಹಾಜರಾಗಲು ನಿರಾಕರಿಸಿದ್ದರು. ಸೇನಾ ಮುಖ್ಯಸ್ಥ ಜನರಲ್ ಕ್ವಾಮರ್ ಜಾವೇದ್ ಬಜ್ವಾ ಹಾಜರಿದ್ದರು. ಬೆಜ್ವಾ ಅವರ ಕಾಲುಗಳಲ್ಲಿ ನಡುಕ ಇತ್ತು. ಮುಖದ ತುಂಬಾ ಬೆವರಿತ್ತು. ಅವರು ಹೇಳ್ತಾ ಇದ್ರು – ದೇವರಾಣೆಗೂ ಅಭಿನಂದನ್ ಅನ್ನು ಬಿಟ್ಟು ಬಿಡೋಣ. ರಾತ್ರಿ 9 ಗಂಟೆಗೆ ಭಾರತ ದಾಳಿ ನಡೆಸೋದು ಗ್ಯಾರೆಂಟಿ. ಖುರೇಶಿ ಕೂಡ ನಡುಗುತ್ತಿದ್ದರು, ಬೆವೆತಿದ್ದರು ಎಂದು ಸಾದಿಕ್ ಸಂಸತ್ತಿನಲ್ಲಿ ಆರೋಪಿಸಿದ್ದರು. (ಏಜೆನ್ಸೀಸ್)