ವಿಜಯಪುರ: ಉಪಚುನಾವಣೆ ನಡೆಯುತ್ತಿರುವ ವಿಜಯಪುರ ಜಿಲ್ಲೆಯ ಸಿಂದಗಿ ಕ್ಷೇತ್ರದಲ್ಲಿ ಮತ್ತು ಹಾವೇರಿಯ ಹಾನಗಲ್ ಕ್ಷೇತ್ರದಲ್ಲಿ ಇಂದು ಬೆಳಗಿನಿಂದ ಮತದಾನ ಆರಂಭವಾಗಿದೆ. ಬಿಜೆಪಿ, ಕಾಂಗ್ರೆಸ್ ಮತ್ತು ಜೆಡಿಎಸ್ ಪಕ್ಷಗಳು ಭಾರೀ ಪ್ರಚಾರ ಅಭಿಯಾನ ನಡೆಸಿ ಇದೀಗ ಚೆಂಡನ್ನು ಮತದಾರರ ಅಂಗಳಕ್ಕೆ ದೂಡಿವೆ. ಮತದಾರರೂ ಉತ್ಸಾಹದಿಂದ ಮತದಾನ ಕೈಗೊಂಡಿದ್ದಾರೆ.
ಹೀಗಿರುವಾಗ ಮತ ಚಲಾವಣೆ ಸ್ವತಂತ್ರವಾಗಿ ಮತ್ತು ಯಾವುದೇ ಪ್ರಭಾವಗಳಿಗೆ ಒಳಗಾಗದೆ ನಡೆಯಬೇಕೆಂದು ಮಾಡಿರುವ ನಿಯಮವನ್ನು ಮತದಾರರೇ ಉಲ್ಲಂಘಿಸುತ್ತಿರುವ ಪ್ರಸಂಗ ನಡೆಯುತ್ತಿದೆ. ಸಿಂದಗಿ ಕ್ಷೇತ್ರದಲ್ಲಿ ಮತದಾನ ಮಾಡಿದ ಹಲವು ಮತದಾರರು ತಾವು ಮತ ಚಲಾಯಿಸಿದ ಫೋಟೋ, ವಿಡಿಯೋ ಮಾಡಿ ಸಾಮಾಜಿಕ ಮಾಧ್ಯಮದಲ್ಲಿ ಶೇರ್ ಮಾಡಿಕೊಳ್ಳುತ್ತಿದ್ದಾರೆ.
ಗೌಪ್ಯವಾಗಿರಬೇಕಾದ ಮತದಾನವವನ್ನು ಬಹಿರಂಗಪಡಿಸುತ್ತಿರುವ ಮತದಾರರು, ಬಿಜೆಪಿಯ ರಮೇಶ ಭೂಸನೂರರಿಗೆ ಮತ್ತು ಜೆಡಿಎಸ್ನ ನಾಜಿಯಾ ಅಂಗಡಿಗೆ ಮತ ಚಲಾಯಿಸಿದ ಪೋಟೋ-ವಿಡಿಯೋ ವೈರಲ್ ಆಗಿವೆ. ಹೀಗೆ ಎಲ್ಲೆಡೆ ಹರಿದಾಡುತ್ತಿರುವ ಪೋಟೋಗಳು ಗೌಪ್ಯ ಮತದಾನ ಪದ್ದತಿಗೆ ಧಕ್ಕೆ ತರುತ್ತವೆ ಎಂದು ಪ್ರಜ್ಞಾವಂತ ನಾಗರೀಕರು ಕಳವಳ ವ್ಯಕ್ತಪಡಿಸಿದ್ದಾರೆ.