ಜಕಾರ್ತಾ: ಕರೊನಾ ಸೋಂಕು ಹರಡದಂತೆ ತಡೆಯಲು ಇಂಡೋನೇಷ್ಯಾದಲ್ಲೂ ಲಾಕ್ಡೌನ್ ಘೋಷಣೆಯಾಗಿದೆ. ಇಲ್ಲೂ ಜನ ಲಾಕ್ಡೌನ್ ನಿಯಮ ಉಲ್ಲಂಘಿಸುವುದು ನಡೆದೇ ಇದೆ. ರಾತ್ರಿ ಹೊತ್ತಲ್ಲಿ ಕೂಡ ಅಡ್ಡಾಡುವುದನ್ನು ನಿಲ್ಲಿಸುವುದಿಲ್ಲ. ವಿಶೇಷ ಅಂದರೆ ಇಲ್ಲಿ ಒಂದು ಗ್ರಾಮದಲ್ಲಿ ಸಿಕ್ಕಾಪಟ್ಟೆ ದೆವ್ವದ ಕಾಟ. ಆ ಗ್ರಾಮದಲ್ಲಿ ಮಾತ್ರವೇ ಗ್ರಾಮಸ್ಥರು ರಾತ್ರಿ ಹೊತ್ತು ಬೀದಿಗೆ ಇಳಿಯಲು ಹೆದರುತ್ತಿದ್ದಾರೆ!
ಯಾವುದು ಇದು ಗ್ರಾಮ ಅಂತೀರಾ- ಸೆಂಟ್ರಲ್ ಜಾವಾದ ಕೆಫು ಗ್ರಾಮ. ಲಾಕ್ಡೌನ್ ನಿಯಮ ಕೊಂಚವಾದರೂ ಇಲ್ಲಿ ಪಾಲನೆಯಾಗುತ್ತಿದೆ. ರಾತ್ರಿಯಾಗುತ್ತಿದ್ದಂತೆ ಇಲ್ಲಿ ದೆವ್ವಗಳ ಓಡಾಟ ಶುರುವಾಗುತ್ತದೆ. ಮನೆಯಿಂದ ಹೊರಗೆ ಇಳಿದವರೂ ಬದುಕಿದೆಯಾ ಬಡಜೀವ ಅಂತ ಮತ್ತೆ ಮನೆಯೊಳಕ್ಕೆ ಸೇರಿಕೊಳ್ಳುತ್ತಾರೆ. ಇದರ ವಿಡಿಯೋ ಚಿತ್ರೀಕರಣವೂ ಲಭ್ಯವಿದೆ.
ನಿಜವಾದ ದೆವ್ವ ಅಂದುಕೊಂಡ್ರಾ.. ಅಲ್ವೇ ಅಲ್ಲ. ಲಾಕ್ಡೌನ್ ನಿಯಮ ಉಲ್ಲಂಘನೆ ತಪ್ಪಿಸೋದಕ್ಕೆ ಮತ್ತು ಜನರನ್ನು ಮನೆಯೊಳಗೇ ಸುರಕ್ಷಿತವಾಗಿ ಇರುವಂತೆ ನೋಡಿಕೊಳ್ಳಲು ಕೆಲವು ಸ್ವಯಂಸೇವಾ ಸಂಸ್ಥೆಗಳು ಕಂಡುಕೊಂಡ ಉಪಾಯವಿದು. ದೆವ್ವಗಳಂತೆ ಉಡುಪು ಧರಿಸಿ ಸ್ವಯಂ ಸೇವಕರು ರಾತ್ರಿ ಇಡೀ ನಿಗಾವಹಿಸುತ್ತಾರೆ. ಇವರೂ ಅಲ್ಲಿನ ಕರೊನಾ ವಾರಿಯರ್ಸ್. ಇಂಡೋನೇಷ್ಯಾದ ಗ್ರಾಮೀಣ ಭಾಗದಲ್ಲಿ ಸದ್ಯ ಈ ಪ್ರಯೋಗ ನಡೆಯುತ್ತಿದೆ. ಇದರ ವಿವರ ಕೆಳಗಿನ ವಿಡಿಯೋದಲ್ಲಿದೆ ನೋಡಿ.. (ಏಜೆನ್ಸೀಸ್)