ಆಂಧ್ರಪ್ರದೇಶ: ತೆಲುಗು ಚಿತ್ರರಂಗದ ಸ್ಟಾರ್, 'ಅರ್ಜುನ್ ರೆಡ್ಡಿ' ಖ್ಯಾತಿಯ ನಟ ವಿಜಯ್ ದೇವರಕೊಂಡ ಮತ್ತು ನಟಿ ಸಮಂತಾ ರುತ್ ಪ್ರಭು ಜೋಡಿಯಾಗಿ ನಟಿಸಿದ ಪ್ಯಾನ್ ಇಂಡಿಯಾ 'ಖುಷಿ' ಸಿನಿಮಾ ಸೆ.01 ರಂದು ಬಿಡುಗಡೆಗೊಂಡು ಬಾಕ್ಸ್ ಆಫೀಸ್ನಲ್ಲಿ ನಿರೀಕ್ಷಗೆ ತಕ್ಕಂತೆ ಗಳಿಕೆಯನ್ನು ಕಂಡಿತು. ಈ ಆದಾಯದಲ್ಲಿ 1 ಕೋಟಿ ರೂ. ಹಣವನ್ನು ನಟ 100 ಕುಟುಂಬಗಳಿಗೆ ಹಂಚಿಕೆ ಮಾಡಿದ ಸಂಗತಿ ಇದೀಗ ಬೆಳಕಿಗೆ ಬಂದಿದೆ.
ಶಿವ ನಿರ್ವಾಣ ನಿರ್ದೇಶನದಲ್ಲಿ ಮೂಡಿಬಂದ ರೋಮ್ಯಾಂಟಿಕ್ ಡ್ರಾಮಾ ಸಿನಿಮಾದ ಯಶಸ್ಸಿನ ಬೆನ್ನಲ್ಲೇ ವಿಶೇಷ ಘೋಷಣೆಯೊಂದನ್ನು ಮಾಡಿದ ವಿಜಯ್ ದೇವರಕೊಂಡ, ನಮ್ಮ ಸಿನಿಮಾ ಮಾಡಿದ ಗಳಿಕೆಯಿಂದ 1 ಕೋಟಿ ರೂ. ಹಣವನ್ನು 100 ಕುಟುಂಬಗಳಿಗೆ (ಪ್ರತಿ ಕುಟುಂಬಕ್ಕೆ ತಲಾ 1 ಲಕ್ಷ ರೂಪಾಯಿ) ಕೊಡುವುದಾಗಿ ಸೆ.05 ರಂದು ಟ್ವೀಟ್ ಮಾಡಿ ತಿಳಿಸಿದ್ದರು.
ಈ ಹಿಂದೆ ಹೇಳಿದಂತೆ ಇದೀಗ 100 ಕುಟುಂಬಗಳನ್ನು 'ಖುಷಿ' ಚಿತ್ರತಂಡ ಆಯ್ಕೆ ಮಾಡಿದ್ದು, ಕೇವಲ ಆಂಧ್ರಪ್ರದೇಶದ ಮಾತ್ರವಲ್ಲದೆ ಬೆಂಗಳೂರು, ಚೆನ್ನೈ ಸೇರಿದಂತೆ ಇತರ ನಗರಗಳಿಂದ ಕುಟುಂಬಗಳನ್ನು ಸೆಲಕ್ಟ್ ಮಾಡಲಾಗಿದೆ. ಈ ಬಗ್ಗೆ ಇಂದು ಕೂಡ ಪೋಸ್ಟ್ವೊಂದನ್ನು ಹಂಚಿಕೊಂಡಿರುವ ವಿಜಯ್ ದೇವರಕೊಂಡ, ಈ ಹಣವನ್ನು ಆಯ್ದ ಕುಟುಂಬಗಳಿಗೆ ನೀಡಲಾಗುವುದು ಎಂದು ತಿಳಿಸಿದ್ದಾರೆ.
ಇದನ್ನೂ ಓದಿ: Chaitra Kundapur Taken For Medical Test | ವೈದ್ಯಕೀಯ ಪರೀಕ್ಷೆಗೆ ಹೋಗುವಾಗ ವಕೀಲರ ಜತೆ ಮಾತಾಡಲು ಚೈತ್ರಾ ಪ್ರಯತ್ನ
ವಿಜಯ್ ದೇವರಕೊಂಡ ಅವರ ಈ ಕಾರ್ಯಕ್ಕೆ ನೆಟ್ಟಿಗರು ಮತ್ತು ಅಭಿಮಾನಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಮೈತ್ರಿ ಮೂವೀ ಮೇಕರ್ಸ್ ನಿರ್ಮಾಣದಲ್ಲಿ ಮೂಡಿಬಂದ ಈ ಚಿತ್ರದ ಒಟಿಟಿ ರಿಲೀಸ್ ದಿನಾಂಕ ಶೀಘ್ರವೇ ಅಧಿಕೃತವಾಗಿ ಪ್ರಕಟವಾಗಲಿದೆ,(ಏಜೆನ್ಸೀಸ್).