ನವದೆಹಲಿ: ನಿನ್ನೆಯಷ್ಟೇ ಸಿಬಿಎಸ್ಸಿ 12ನೇ ತರಗತಿ ಫಲಿತಾಂಶ ಹಾಗೂ ಇಂದು ದ್ವಿತೀಯ ಪಿಯುಸಿ ರಿಸಲ್ಟ್ ಪ್ರಕಟಗೊಂಡಿದೆ. ಎಲ್ಲರೂ ಅಂಕಗಳ ಬೆನ್ನತ್ತಿದ್ದಾರೆ. ಟಾಪರ್ಗಳಿಗೆ ಅಭಿನಂದನೆಗಳ ಸುರಿಮಳೆಯಾದರೆ, ಕಡಿಮೆ ಅಂಕಗಳಿಸಿದವರಿಗೆ ತೆಗಳಿಕೆ ಸಾಮಾನ್ಯ.
ಪರೀಕ್ಷೆಯಲ್ಲಿ ಕಡಿಮೆ ಅಂಕ ಗಳಿಸಿ ನಿರಾಶರಾದವರಿಗೆಂದೇ ತಮ್ಮ ಕಥೆಯನ್ನು ಬಿಚ್ಚಿಟ್ಟಿದ್ದಾರೆ ಯುಪಿಎಸ್ಸಿ ಪರೀಕ್ಷೆಯಲ್ಲಿ ಟಾಪರ್ ಆಗಿ ಐಎಎಸ್ ಹುದ್ದೆ ಗಿಟ್ಟಿಸಿರುವ ನಿತಿನ್ ಸಂಘ್ವಾನ್.
ಟ್ವಿಟರ್ ಖಾತೆಯಲ್ಲಿ ನಿತಿನ್ 12ನೇ ತರಗತಿಯ ಅಂಕಪಟ್ಟಿಯನ್ನು ಪ್ರಕಟಿಸಿದ್ದಾರೆ. 18 ವರ್ಷಗಳ ಹಿಂದೆ ಪರೀಕ್ಷೆ ಬರೆದಿದ್ದ ಅವರು, ರಸಾಯನಶಾಸ್ತ್ರದಲ್ಲಿ ಗಳಿಸಿದ್ದು ಕೇವಲ 24. ಉತ್ತೀರ್ಣರಾಗಲು ಬೇಕಾಗಿದ್ದ ಅಂಕಕ್ಕಿಂತ ಒಂದು ಅಂಕವಷ್ಟೇ ಹೆಚ್ಚು. ಇನ್ನು ಭೌತಶಾಸ್ತ್ರದಲ್ಲಿ 33 ಅಂಕ ಪಡೆದಿದ್ದಾರೆ. ಒಟ್ಟಾರೆಯಾಗಿಯೂ ಹೇಳಿಕೊಳ್ಳುವಂಥ ಅಂಕಗಳನ್ನೇನೂ ಅವರು ಗಳಿಸಿರಲಿಲ್ಲ.
ಯಾವುದೇ ಪರೀಕ್ಷೆಯ ಅಂಕಗಳು ನಿಮ್ಮ ಜೀವನವನ್ನು ನಿರ್ಧರಿಸುವುದಿಲ್ಲ. ಅಂಕಗಳಿಲ್ಲ ಎಂಬ ಕೊರಗಿಗೆ ಗುರಿಯಾಗಬೇಡಿ. ಜೀವನ ಯಾವುದೇ ಮಂಡಳಿಯ ಪರೀಕ್ಷೆಗಿಂತ ಹೆಚ್ಚಿನದು ಎಂದು ಸಲಹೆ ನೀಡಿದ್ದಾರೆ.
ಇನ್ನೊಬ್ಬ ಐಎಫ್ಎಸ್ ಅಧಿಕಾರಿ ಪ್ರವೀಣ್ ಕಸ್ವಾನ್ ಪ್ರತಿಕ್ರಿಯಿಸಿ ಇಂಗ್ಲಿಷ್ನಲ್ಲಿ ನನ್ನದೂ ಇದೇ ಪರಿಸ್ಥಿತಿಯಾಗಿತ್ತು ಎಂದು ಹೇಳಿದ್ದಾರೆ. ವಿದ್ಯಾರ್ಥಿಗಳಿಗೆ ಹುರುಪು ತುಂಬುವ ಈ ಪ್ರಯತ್ನಕ್ಕೆ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ.