ಗ್ವಾಲಿಯರ್: ಇಲ್ಲಿಯವರೆಗೆ ನೀವು ಹಣ ಮತ್ತು ಬೆಲೆಬಾಳುವ ವಸ್ತುಗಳ ಕಳ್ಳತನದ ಬಗ್ಗೆ ಕೇಳಿರಬೇಕು ಮತ್ತು ನೋಡಿರಬೇಕು. ಆದರೆ ಮಧ್ಯಪ್ರದೇಶದ ಗ್ವಾಲಿಯರ್ನಲ್ಲಿ ವಿಶಿಷ್ಟ ಕಳ್ಳತನ ಪ್ರಕರಣವೊಂದು ಬೆಳಕಿಗೆ ಬಂದಿದೆ.
ನಗರದಲ್ಲಿ ಹಣ, ವಜ್ರ ವೈಢೂರ್ಯ ಕದಿಯದೇ ಕೇವಲ ಚಾಕಲೇಟ್ಗಳನ್ನು ಕದಿಯುವ ಕಳ್ಳಿಯರ ಗ್ಯಾಂಗ್ವೊಂದು ಸಕ್ರಿಯವಾಗಿದ್ದು, ಇದು ಅಂಗಡಿಗಳಿಂದ ದುಬಾರಿ ಚಾಕೊಲೇಟ್ಗಳನ್ನು ಕದಿಯುತ್ತಿದೆ. ಕೆಲವು ಹುಡುಗಿಯರು ಚಾಕೊಲೇಟ್ಗಳನ್ನು ಕದ್ದಿದ್ದು, ಅವರ ಕೃತ್ಯವು ಅಂಗಡಿಯಲ್ಲಿ ಅಳವಡಿಸಲಾಗಿದ್ದ ಸಿಸಿಟಿವಿ ಕ್ಯಾಮೆರಾದಿಂದ ಸಂಪೂರ್ಣ ವಿಷಯ ಬಹಿರಂಗವಾಗಿದೆ.
ಡಿಡಿ ನಗರದ ಗೇಟ್ ಬಳಿಯ ಅಂಗಡಿಯ ಮಾಲೀಕರು ಸಂಜೆ ಅಂಗಡಿಯಲ್ಲಿ ನಿರತರಾಗಿದ್ದಾಗ, ಅದೇ ಸಮಯದಲ್ಲಿ ನಾಲ್ಕು ಹುಡುಗಿಯರು ತಮ್ಮ ಅಂಗಡಿಯಲ್ಲಿ ಸೇರಿಕೊಂಡು ಕಳ್ಳತನವನ್ನು ನಡೆಸಿದ್ದು, ಹಣ ಕದಿಯದೆ ಡಿಪಾರ್ಟ್ಮೆಂಟಲ್ ಸ್ಟೋರ್ನಲ್ಲಿ ಇಟ್ಟಿದ್ದ ದುಬಾರಿ ಬೆಲೆಯ ಚಾಕೊಲೇಟ್ಗಳನ್ನು ಕದ್ದಿದ್ದಾರೆ. ಬಳಿಕ ಚಾಕೊಲೇಟ್ಗಳ ಕೊರತೆ ಕಂಡುಬಂದಾಗ ಸಿಸಿಟಿವಿ ದೃಶ್ಯಾವಳಿಗಳನ್ನು ಸ್ಕ್ಯಾನ್ ಮಾಡಿ ಘಟನೆ ಬೆಳಕಿಗೆ ಬಂದಿದೆ.
ಒಳ್ಳೆಯ ಮನೆಯವರಂತೆ ಕಾಣುವ ನಾಲ್ಕು ಹುಡುಗಿಯರು ಪೈಕಿ ಕೆಲವರು ಕೌಂಟರ್ ಬಳಿ ನಿಂತಿದ್ದರೆ, ಒಬ್ಬ ಹುಡುಗಿ ಅಂಗಡಿಯೊಳಗೆ ಹೋಗಿ ಫ್ರಿಡ್ಜ್ನಿಂದ ನಾಲ್ಕಾರು ಬಾರಿ ಚಾಕಲೇಟ್ಗಳನ್ನು ತೆಗೆದು ಜೀನ್ಸ್ನ ಜೇಬಿನಲ್ಲಿ ಇಟ್ಟುಕೊಂಡಿರುವ ದೃಶ್ಯ ಕ್ಯಾಮರಾದಲ್ಲಿ ಸೆರೆಯಾಗಿದೆ. ಕದ್ದ ಚಾಕಲೇಟ್ ಬೆಲೆ 400 ರಿಂದ 500 ರೂಪಾಯಿ ಎಂದು ಹೇಳಲಾಗುತ್ತಿದೆ. ಈ ಬಗ್ಗೆ ಮಳಿಗೆಗಳ ನಿರ್ವಾಹಕರು ಪೊಲೀಸರಿಗೂ ದೂರು ನೀಡಿದ್ದಾರೆ. ಸಮೀಪದ ಹಾಸ್ಟೆಲ್ಗಳಲ್ಲಿ ವಾಸಿಸುವ ಬಾಲಕಿಯರೇ ಈ ಕೃತ್ಯ ಎಸಗಿದ್ದಾರೆ ಎಂದು ಊಹಿಸಲಾಗಿದೆ.(ಏಜೆನ್ಸೀಸ್)