ನವದೆಹಲಿ: ಚಂದ್ರ ಸುಂದರಾಂಗ ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯ. ಆತನ ಸೌಂದರ್ಯವನ್ನು ಹಾಡಿ, ಹೊಗಳದ ಕವಿಗಳಿಲ್ಲ. ಪ್ರೇಮಿಗಳ ಪಾಲಿಗೆ ಆತನ ಬೆಳದಿಂಗಳೇ ಪರಮಪಾವನ.
ಇಂಥ ಚಂದ್ರನ ನಿಜಸೌಂದರ್ಯವನ್ನು ಇದೇ ಮೊದಲ ಬಾರಿಗೆ ವಿಜ್ಞಾನಿಗಳು ಪಟದ ಮೂಲಕ ಅನಾವರಣಗೊಳಿಸಿದ್ದಾರೆ. ರಂಗುರಂಗಾದ ಈ ಪಟವನ್ನು ಕಂಡಾಗ, ಚಂದಿರ ಇಷ್ಟೊಂದು ಸುಂದರಾಂಗನೇ! ಎಂದು ಆಶ್ಚರ್ಯದಿಂದ ಉದ್ಗರಿಸುವಂತೆ ಆಗುತ್ತದೆ.
ಅಮೆರಿಕದ ಜಿಯಾಲಾಜಿಕಲ್ ಸರ್ವೇ ವಿಭಾಗದ ಆ್ಯಸ್ಟ್ರೋಜಿಯಾಲಜಿ ಸೈನ್ಸ್ ಸೆಂಟರ್ ಮೊದಲ ಬಾರಿಗೆ ಚಂದ್ರನ ಸೌಂದರ್ಯವನ್ನು ವರ್ಣಿಸುವ ಪಟವನ್ನು ಸಿದ್ಧಪಡಿಸಿದ್ದಾರೆ. ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಕೇಂದ್ರ ನಾಸಾ ಮತ್ತು ಲೂನಾರ್ ಪ್ಲಾನೇಟರಿ ಇನ್ಸ್ಟಿಟ್ಯೂಟ್ನ ಸಹಯೋಗದಲ್ಲಿ 1:50,00,000 ಸ್ಕೇಲ್ನಲ್ಲಿ ಈ ಪಟವನ್ನು ಸಿದ್ಧಪಡಿಸಲಾಗಿದೆ.
ಅಪೊಲೋದ ಆರು ಯೋಜನೆಗಳ ಅವಧಿಯ ಚಂದ್ರನ ಪ್ರಾದೇಶಿಕ ಪಟವನ್ನು ಆಧಾರವಾಗಿಟ್ಟುಕೊಂಡು ಅಮೆರಿಕದ ಲೂನಾರ್ ರೆಕೊನೈಸಾನ್ಸ್ ಆರ್ಬಿಟರ್ ಹಾಗೂ ಜಪಾನ್ನ ಸೆಲೇನ್ (ಎಸ್ಇಎಲ್ಇಎನ್ಇ) ರವಾನಿಸಿದ ಚಿತ್ರಗಳನ್ನು ಬಳಸಿಕೊಂಡು ಯೂನಿಫೈಡ್ ಜಿಯೋಲಾಜಿಕ್ ಮ್ಯಾಪ್ ಆಫ್ ದಿ ಮೂನ್ ಎಂಬ ಹೆಸರಿನ ಚಂದ್ರನ ಪಟವನ್ನು ಸಿದ್ಧಪಡಿಸಲಾಗಿದೆ.
ಚಂದ್ರನ ಸೌಂದರ್ಯವನ್ನು ಆಸ್ವಾದಿಸದ, ಅದರೆಡೆಗೆ ಆಕರ್ಷಿತರಾಗದ ಮನುಷ್ಯರೇ ಇಲ್ಲ. ಆದ್ದರಿಂದ ಚಂದ್ರನ ನಿಜ ಸೌಂದರ್ಯವನ್ನು ವರ್ಣಿಸುವ ಹಾಗೂ ನಾಸಾದ ಭವಿಷ್ಯದ ಯೋಜನೆಗಳಿಗೆ ಅನುವಾಗುವ ರೀತಿಯಲ್ಲಿ ಪಟವನ್ನು ರೂಪಿಸಲಾಗಿದೆ ಎಂದು ಅಮೆರಿಕದ ಜಿಯಾಲಾಜಿಕಲ್ ಸರ್ವೇ ಅಧಿಕಾರಿಗಳು ಹೇಳಿದ್ದಾರೆ.