ತಿರುಪತಿ: ನೂರಾರು ವರ್ಷಗಳ ಇತಿಹಾಸ, ಗುಣಮಟ್ಟ ಕಾಪಾಡಿಕೊಂಡು ಬಂದಿದ್ದ ತಿರುಪತಿ ತಿಮ್ಮಪ್ಪ ದೇವಾಲಯದ ಪವಿತ್ರ ಲಡ್ಡು ಪ್ರಸಾದಕ್ಕೆ ಈ ಹಿಂದೆ ಬಳಸಿದ ತುಪ್ಪದಲ್ಲಿ ವಿದೇಶಿ ಸಂಸ್ಥೆಗಳಿಂದ ತರಿಸಿಕೊಂಡ ವಿವಿಧ ಪ್ರಾಣಿಗಳ ಕೊಬ್ಬು ಸೇರಿಸಲಾಗಿತ್ತು ಎಂಬ ಅಂಶವನ್ನು ಲ್ಯಾಬ್ ಪರೀಕ್ಷೆಗಳು ಬಹಿರಂಗಪಡಿಸಿದ ನಂತರ ಈ ವಿಷಯ ದೇಶ, ವಿದೇಶಗಳಲ್ಲಿ ಚರ್ಚೆಗೆ ಗ್ರಾಸವಾಗಿದೆ. ಇದು ತುಪ್ಪ ಪೂರೈಕೆದಾರರಲ್ಲಿ ಬದಲಾವಣೆ ಮತ್ತು ರಾಜ್ಯ ಸರ್ಕಾರದಿಂದ ವಿಚಾರಣೆಗೆ ಕಾರಣವಾಗಿದೆ. ವಿವಾದ ಇದೀಗ ಕೇಂದ್ರ ಸರ್ಕಾರ ಮತ್ತು ನ್ಯಾಯಾಲಯದ ಮೆಟ್ಟಿಲು ಸಹ ಏರಿದೆ.
ಇದನ್ನೂ ಓದಿ: IND vs BAN: ಬಾಂಗ್ಲಾ ಬ್ಯಾಟ್ಸ್ಮನ್ಗಳ ಬೆವರಿಳಿಸಿದ ಆಕಾಶ್ ದೀಪ್: ಮಿಸ್ ಆಯ್ತು ಹ್ಯಾಟ್ರಿಕ್ ವಿಕೆಟ್!
ಇಷ್ಟಕ್ಕೂ ತಿರುಪತಿ ತಿಮ್ಮಪ್ಪ ದೇಗುಲದಲ್ಲಿ ನೀಡಲಾಗುವ ಪವಿತ್ರ 'ಲಡ್ಡು ಪ್ರಸಾದ'ವು ತನ್ನ ವಿಶಿಷ್ಟ ರುಚಿಗೆ ಹೆಸರುವಾಸಿಯಾಗಿದೆ ಎಂಬುದು ಇಡೀ ಜಗತ್ತಿಗೆ ತಿಳಿದ ಸಂಗತಿಯೇ. ತಿರುಪತಿ ಯಾತ್ರೆ ಮಾಡಿ ಬಂದವರನ್ನು ಮೊದಲು ಕೇಳುವುದೇ ಲಡ್ಡು ಪ್ರಸಾದ ತಂದಿರಾ? ಎಂದು. ಅಷ್ಟರ ಮಟ್ಟಿಗೆ ಇದು ದೇಶ ವಿದೇಶಗಳಲ್ಲಿ ಭಕ್ತರಿಂದ ಪ್ರೀತಿಸಲ್ಪಟ್ಟಿದೆ. ಈ ಅದ್ಭುತ ರುಚಿಕರ ಲಡ್ಡುಗಳನ್ನು ದೇವಾಲಯದ ಪ್ರತ್ಯೇಕ ಅಡುಗೆಮನೆಯಲ್ಲಿ ಸೂಕ್ಷ್ಮ, ಅಷ್ಟೇ ಜಾಗರೂಕತೆಯಿಂದ ತಯಾರಿಸಲಾಗುತ್ತದೆ.
ಲಡ್ಡು ತಯಾರಿಕೆಯಲ್ಲಿ ನಿರ್ದಿಷ್ಟ ಪ್ರಮಾಣದಲ್ಲಿ ಪದಾರ್ಥಗಳನ್ನು ಮತ್ತು ಅವುಗಳ ಪ್ರಮಾಣವನ್ನು ಬಳಸಲಾಗುತ್ತದೆ. ಯಾವುದೇ ಸಂದರ್ಭದಲ್ಲಿ ಹೆಚ್ಚುಕಡಿಮೆ ಮಾಡುವಂತಿಲ್ಲ. ಲಡ್ಡುಗಳ ಪಾಕವಿಧಾನವನ್ನು ನೂರಾರು ವರ್ಷಗಳ ಅದರ ಇತಿಹಾಸದಲ್ಲಿ ಕೇವಲ ಆರು ಬಾರಿ ಬದಲಾಯಿಸಲಾಗಿದೆ ಎಂದರೆ ಲಡ್ಡು ತಯಾರಿಕೆಗೆ ಟಿಟಿಡಿ ನೀಡುವ ಮಹತ್ವ ಎಂತಹುದು ಎಂಬುದನ್ನು ಅರ್ಥೈಸಿಕೊಳ್ಳಬಹುದು.
ತಿರುಪತಿ ಲಡ್ಡುಗಳು ದೈವಿಕ ಪರಿಮಳ ಹೊಂದಿರುತ್ತವೆ ಎಂಬುದು ಪ್ರಸಾದ ಸೇವಿಸಿದ ಪ್ರತಿಯೊಬ್ಬ ಭಕ್ತರಿಗೆ ಆಗುವ ಅನುಭವ. ತಿರುಪತಿ ದೇವಾಲಯದಲ್ಲಿ ಮೂರು ನೂರು ವರ್ಷದ ಹಿಂದೆ ಲಡ್ಡು ತಯಾರಿಕೆ ಪ್ರಾರಂಭವಾಯಿತು. ಆರಂಭದಲ್ಲಿ ಲಡ್ಡುಗೆ ಬೆಲ್ಲದ ಪಾಕದಿಂದ ಮಾಡಿದ ಬೂಂದಿಯನ್ನು ಬಳಸಲಾಗುತ್ತದೆ. ಬಳಿಕ ಅದಕ್ಕೆ ಸುವಾಸನೆ ಮತ್ತು ಪೌಷ್ಟಿಕಾಂಶದ ಮೌಲ್ಯವನ್ನು ಹೆಚ್ಚಿಸಲು ಬಾದಾಮಿ, ಗೋಡಂಬಿ ಮತ್ತು ಒಣದ್ರಾಕ್ಷಿ, ಏಲಕ್ಕಿ ಗಳನ್ನು ಸೇರಿಸಲಾಯಿತು.
ಇನ್ನು ಅತ್ಯಾಧುನಿಕ ಪರೀಕ್ಷಾ ಪ್ರಯೋಗಾಲಯವು ಪ್ರತಿ ಬ್ಯಾಚ್ ಲಡ್ಡುಗಳ ಗುಣಮಟ್ಟವನ್ನು ಖಾತ್ರಿಗೊಳಿಸುತ್ತದೆ. ಹೀಗಿದ್ದರೂ ವಿದೇಶಿ ಕೊಬ್ಬು ಬಳಕೆಯಾಗಿರುವುದನ್ನು ಲ್ಯಾಬ್ ಪರೀಕ್ಷೆಗಳು ದೃಢಪಡಿಸಿವೆ.
ಎಆರ್ ಡೈರಿ ಫುಡ್ಸ್ ಸರಬರಾಜು ಮಾಡಿದ ತುಪ್ಪದಲ್ಲಿ ವಿದೇಶಿ ಕೊಬ್ಬಿನ ಅಂಶವಿದ್ದಿದ್ದು ಬಹಿರಂಗವಾಗಿದ್ದು, ಗುತ್ತಿಗೆದಾರರನ್ನು ಕಪ್ಪು ಪಟ್ಟಿಗೆ ಸೇರಿಸಿ, ಅಲ್ಲಿಂದೀಚೆ ಈ ಹಿಂದೆ ಇದ್ದಂತೆಯೇ ಕೆಎಂಎಫ್ ನಿಂದ ಟಿಟಿಡಿ ತುಪ್ಪ ತರಿಸಿಕೊಳ್ಳಲು ಮುಂದಾಗಿದೆ. ಈ ಹಿಂದೆ ಕಪ್ಪು ಪಟ್ಟಿಯಲ್ಲಿರುವ ಗುತ್ತಿಗೆದಾರರಿಂದ ಪ್ರತಿ ಕೆ.ಜಿ.ಗೆ 320 ರೂ.ಗೆ ತುಪ್ಪ ಖರೀದಿಸುತ್ತಿದ್ದ ಟಿಟಿಡಿ ಈಗ ಕರ್ನಾಟಕದಿಂದ ಪ್ರತಿ ಕೆ.ಜಿ.ಗೆ 475 ರೂ. ಕೊಟ್ಟು ಗುಣಮಟ್ಟದ ನಂದಿನಿ ತುಪ್ಪ ಖರೀದಿಸುತ್ತಿದೆ.
ಟಿಡಿಪಿ ಅಡಿಯಲ್ಲಿ ಆಂಧ್ರ ಸರ್ಕಾರವು ವೈ.ಎಸ್. ಜಗನ್ ಆಡಳಿತದಲ್ಲಿ ಸರಬರಾಜು ಮಾಡಿದ ತುಪ್ಪದಲ್ಲಿ ಕೊಬ್ಬು (ಹಂದಿ ಕೊಬ್ಬು), ಟ್ಯಾಲೋ (ಗೋಮಾಂಸ ಕೊಬ್ಬು) ಮತ್ತು ಮೀನಿನ ಎಣ್ಣೆ ಸೇರಿದಂತೆ ವಿದೇಶಿ ಕೊಬ್ಬುಗಳಿರುವ ಲ್ಯಾಬ್ ವರದಿಗಳು ಬಹಿರಂಗಗೊಂಡಿದ್ದು, ಚಂದ್ರಬಾಬು ನಾಯ್ಡು ಮುಖ್ಯಮಂತ್ರಿಯಾದ ನಂತರ ಸರ್ಕಾರವು ಹಿರಿಯ ಐಎಎಸ್ ಅಧಿಕಾರಿ ಜೆ.ಶ್ಯಾಮಲಾ ರಾವ್ ಅವರನ್ನು ಟಿಟಿಡಿಯ ಹೊಸ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ ನೇಮಿಸಿದೆ.