Common Kingfisher: ಜಪಾನ್‌ನ ಪ್ರಸಿದ್ಧ 'ಶಿಂಕನ್‌ಸೆನ್' (Shinkansen) ಬುಲೆಟ್ ಟ್ರೈನ್ ಅಷ್ಟೊಂದು ವೇಗವಾಗಿ ಮತ್ತು ಶಬ್ದವಿಲ್ಲದೆ ಓಡಲು ಕಾರಣವೇನು ಗೊತ್ತಾ? ಅದಕ್ಕೊಂದು ಸಣ್ಣ ಹಕ್ಕಿಯೇ ಪ್ರೇರಣೆ! ಹೌದು, ನಾವು ಪ್ರತಿದಿನ ನೋಡುವ 'ಕಾಮನ್ ಕಿಂಗ್‌ಫಿಷರ್' ಅಂದರೆ ಮಿಂಚುಳ್ಳಿ ಪಕ್ಷಿಯ ಜಾಣ್ಮೆಯನ್ನು ಬಳಸಿಕೊಂಡು ಜಪಾನ್ ಇಂಜಿನಿಯರ್‌ಗಳು ಈ ರೈಲನ್ನು ವಿನ್ಯಾಸಗೊಳಿಸಿದ್ದಾರೆ."
ಕೇವಲ ಜಪಾನ್ ಬುಲೆಟ್ ಟ್ರೈನ್‌ಗೆ ಪ್ರೇರಣೆಯಾಗುವುದು ಅಷ್ಟೇ ಅಲ್ಲ, ಈ ಸಣ್ಣ ಮಿಂಚುಳ್ಳಿ ಪಕ್ಷಿಯ ಶರೀರ ರಚನೆ, ದೃಷ್ಟಿ ಸಾಮರ್ಥ್ಯ ಹಾಗೂ ಜೀವನ ಶೈಲಿಯಲ್ಲೂ ಹತ್ತಾರು ಅಚ್ಚರಿಗಳಿವೆ. ಹಾಗಾದರೆ, 'ಕಿಂಗ್‌ಫಿಷರ್' ಬಗ್ಗೆ ತಿಳಿಯಲೇಬೇಕಾದ ಅಪರೂಪದ ವಿಷಯಗಳು ಇಲ್ಲಿದೆ.
ಆರಂಭದಲ್ಲಿ ಜಪಾನ್‌ನ ಬುಲೆಟ್ ಟ್ರೈನ್‌ಗಳು ಸುರಂಗದಿಂದ ಹೊರಬರುವಾಗ ಗಾಳಿಯ ಒತ್ತಡದಿಂದಾಗಿ ಅತ್ಯಂತ ಜೋರಾದ ಶಬ್ದವನ್ನು (Sonic Boom) ಉಂಟುಮಾಡುತ್ತಿದ್ದವು. ಇದರಿಂದ ಹತ್ತಿರದಲ್ಲಿದ್ದ ನಿವಾಸಿಗಳಿಗೆ ತೊಂದರೆಯಾಗುತ್ತಿತ್ತು. ಇದನ್ನು ಗಮನಿಸಿದ ಇಂಜಿನಿಯರ್ ಇಜಿ ನಾಕಾತ್ಸು ಅವರು ಮಿಂಚುಳ್ಳಿ ಪಕ್ಷಿಯ ಚಲನೆಯನ್ನು ಅಧ್ಯಯನ ಮಾಡಿದರು.
ಈ ಪಕ್ಷಿಯು ಗಾಳಿಯಿಂದ ನೀರಿನೊಳಗೆ ಅತ್ಯಂತ ವೇಗವಾಗಿ ಧುಮುಕಿದರೂ ನೀರಿನ ಹನಿಗಳು ಸಿಡಿಯುವುದಿಲ್ಲ. ಇದಕ್ಕೆ ಕಾರಣ ಅದರ ಸೂಜಿಯಂತಹ ಉದ್ದನೆಯ ಚೂಪಾದ ಕೊಕ್ಕು. ಇಂಜಿನಿಯರ್‌ಗಳು ಬುಲೆಟ್ ಟ್ರೈನ್ ಮುಂಭಾಗವನ್ನು ಈ ಪಕ್ಷಿಯ ಕೊಕ್ಕಿನ ಮಾದರಿಯಲ್ಲಿ ವಿನ್ಯಾಸಗೊಳಿಸಿದರು. ಇದರಿಂದಾಗಿ ರೈಲಿನ ಶಬ್ದದ ಸಮಸ್ಯೆ ಸಂಪೂರ್ಣವಾಗಿ ನಿವಾರಣೆಯಾಗಿದ್ದಲ್ಲದೆ, ವೇಗ ಶೇ. 10 ರಷ್ಟು ಹೆಚ್ಚಾಯಿತು ಮತ್ತು ವಿದ್ಯುತ್ ಬಳಕೆ ಶೇ. 15 ರಷ್ಟು ಕಡಿಮೆಯಾಯಿತು.
ಸಾಮಾನ್ಯವಾಗಿ ನೀರಿನ ಮೇಲ್ಮೈ ಮೇಲೆ ಬೆಳಕು ಪ್ರತಿಫಲಿಸುವುದರಿಂದ ನೀರಿನೊಳಗಿರುವ ಮೀನುಗಳು ಸರಿಯಾಗಿ ಕಾಣಿಸುವುದಿಲ್ಲ. ಆದರೆ ಕಿಂಗ್‌ಫಿಷರ್ ಕಣ್ಣುಗಳಲ್ಲಿ ವಿಶೇಷ ಲೆನ್ಸ್‌ಗಳಿದ್ದು, ಇವು ಬೆಳಕಿನ ಪ್ರತಿಫಲನವನ್ನು ತಡೆದು ನೀರಿನೊಳಗಿನ ಮೀನನ್ನು ನಿಖರವಾಗಿ ಗುರುತಿಸಲು ನೆರವಾಗುತ್ತವೆ. ಅಷ್ಟೇ ಅಲ್ಲದೆ, ನೀರಿನೊಳಗೆ ಧುಮುಕುವಾಗ ಕಣ್ಣುಗಳನ್ನು ರಕ್ಷಿಸಿಕೊಳ್ಳಲು ಮೂರನೇ ಪಾರದರ್ಶಕ ಕಣ್ಣಿನ ರೆಪ್ಪೆ (Nictitating membrane) ಕನ್ನಡಕದಂತೆ ಮುಚ್ಚಿಕೊಳ್ಳುತ್ತದೆ.
ಈ ಪಕ್ಷಿಗಳು ಉಳಿದ ಹಕ್ಕಿಗಳಂತೆ ಮರದ ಕೊಂಬೆಗಳ ಮೇಲೆ ಗೂಡು ಕಟ್ಟುವುದಿಲ್ಲ. ಬದಲಾಗಿ ಗಂಡು ಮತ್ತು ಹೆಣ್ಣು ಹಕ್ಕಿ ಎರಡೂ ಸೇರಿ ನದಿ ಅಥವಾ ಕೆರೆಯ ದಂಡೆಯ ಮಣ್ಣಿನ ಗೋಡೆಯಲ್ಲಿ ಸುಮಾರು 3 ಅಡಿ ಉದ್ದದ ನೇರವಾದ ಸುರಂಗವನ್ನು ತೋಡುತ್ತವೆ. ಮಳೆನೀರು ಒಳಗೆ ಹೋಗದಂತೆ ಈ ಸುರಂಗವನ್ನು ಸ್ವಲ್ಪ ಮೇಲ್ಮುಖವಾದ ಇಳಿಜಾರಿನಲ್ಲಿ (Upward slope) ಅತ್ಯಂತ ಜಾಣ್ಮೆಯಿಂದ ನಿರ್ಮಿಸುತ್ತವೆ.
ಮಿಂಚುಳ್ಳಿಗಳು ನೀರಿನ ಮೇಲಿರುವ ಮರದ ಕೊಂಬೆಯ ಮೇಲೆ ಕುಳಿತು ಮೀನುಗಳಿಗಾಗಿ ಕಾಯುತ್ತವೆ. ನೀರೊಳಗಿನ ಮೀನು ಕಣ್ಣಿಗೆ ಬಿದ್ದ ತಕ್ಷಣ, ಗಂಟೆಗೆ ಸುಮಾರು 40 ಕಿಲೋಮೀಟರ್ ವೇಗದಲ್ಲಿ ನೇರವಾಗಿ ನೀರಿನೊಳಗೆ ಧುಮುಕಿ ಅತ್ಯಂತ ಖಚಿತವಾಗಿ ಬೇಟೆಯಾಡುತ್ತವೆ.