ರಾಮನಗರ: ನಿಲ್ಲಿಸಿದ್ದ ಕಾರಿನಿಂದ ಕೆಳಗೆ ಇಳಿದ ಪತಿ, ತಮ್ಮ ಮಗುವನ್ನು ಹಿಡಿದು ಹೊರಗೆ ನಿಂತಿದ್ದ ವೇಳೆ ಒಳಗಿದ್ದ ಪತ್ನಿ ಕಾರಿನ ಹ್ಯಾಂಡ್ ಬ್ರೇಕ್ ಒತ್ತಿದ ಪರಿಣಾಮ ಕಾರು ದಿಢೀರ್ ಮುಂದೆ ಚಲಿಸಿದೆ. ಈ ವೇಳೆ ಕೈಯಲ್ಲಿದ್ದ ಮಗುವನ್ನು ಬಿಳಿಸುತ್ತಿದ್ದ ಪತಿಯಿಂದ ಯುವಕನೊಬ್ಬ ಸಮಯ ಪ್ರಜ್ಞೆಯಿಂದ ಕಂದಮನನ್ನು ರಕ್ಷಿಸಿದ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ವೈರಲ್ ಆಗಿದೆ.
ಈ ಘಟನೆ ರಾಮನಗರದ ಕೆಎಸ್ಆರ್ಟಿಸಿ ಬಸ್ ನಿಲ್ದಾಣದ ಬಳಿ ನಡೆದಿದ್ದು, ದೃಶ್ಯ ಸ್ಥಳೀಯ ಅಂಗಡಿಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಸ್ವಿಫ್ಟ್ ಕಾರನ್ನು ಪಾರ್ಕಿಂಗ್ ಮಾಡಿದ ಪತಿ ತಮ್ಮ 6 ತಿಂಗಳ ಮಗುವನ್ನು ಕೈಯಲ್ಲಿಡಿದು ಹೆಂಡತಿಗೆ ಕೆಳಗಿಳಿಯಲು ಹೇಳಿದ್ದಾರೆ. ಕಾರಿನಿಂದ ಇಳಿಯುವಾಗ ತಿಳಿಯದೆ ಹ್ಯಾಂಡ್ ಬ್ರೇಕ್ ಮೇಲೆ ಮಹಿಳೆ ಕೈಯಿಟ್ಟ ಪರಿಣಾಮ ಕಾರು ದಿಢೀರ್ ಮುಂದೆ ಚಲಿಸಿದೆ.
ಕೂಡಲೇ ಕಾರನ್ನು ನಿಲ್ಲಿಸಲು ಮುಂದಾದ ಪತಿ ಕಾರೊಳಗೆ ಕುಳಿತುಕೊಳ್ಳಲು ಯತ್ನಿಸುವಾಗ ಆತನ ಕೈಯಲ್ಲಿದ್ದ ಮಗು ಕೆಳಗೆ ಬೀಳುತ್ತಿದ್ದುದನ್ನು ಗಮನಿಸಿದ ಯುವಕನೊಬ್ಬ ಮಗುವನ್ನು ತನ್ನ ಸಮಯ ಪ್ರಜ್ಞೆಯಿಂದ ಬಚಾವ್ ಮಾಡಿದ್ದಾನೆ. ಈ ಸಂಪೂರ್ಣ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.