ಕಳೆದ ಕೆಲವು ತಿಂಗಳುಗಳಿಂದ ಸೋನು ಸೂದ್ ಜನ ಮೆಚ್ಚುವಂತಹ ಕೆಲಸಗಳನ್ನು ಅದೆಷ್ಟು ಮಾಡಿದರೋ ಲೆಕ್ಕ ಇಟ್ಟವರಿಲ್ಲ. ಹಸಿದವರಿಗೆ ಊಟ ಕೊಟ್ಟರು. ವಲಸೆ ಕಾರ್ಮಿಕರನ್ನು ಊರಿಗೆ ಕಳುಹಿಸಿದರು. ಕೆಲಸವಿಲ್ಲದವರಿಗೆ ಆಪ್ ಶುರು ಮಾಡಿ, ಕೆಲಸ ಕೊಡಿಸುವ ಪ್ರಯತ್ನ ಮಾಡಿದರು. ಹೀಗೆ ಒಂದಲ್ಲಾ ಒಂದು ರೀತಿಯಲ್ಲಿ ಕಷ್ಟದಲ್ಲಿರುವವರಿಗೆ ಸಹಾಯ ಮಾಡುತ್ತಲೇ ಬಂದಿರುವ ಸೋನು, ಇದೀಗ ಮೂರು ಮಕ್ಕಳನ್ನು ದತ್ತು ಪಡೆದಿದ್ದಾರೆ.
ಹೌದು, ತೆಲಂಗಾಣ ರಾಜ್ಯದ ಯಾದಾದ್ರಿ-ಬೊಂಗಿರ್ ಜಿಲ್ಲೆಯ ಆತ್ಮಾಕುರ್ ಎಂಬ ಹಳ್ಳಿಯಲ್ಲಿ ತಂದೆ-ತಾಯಿಯನ್ನು ಕಳೆದುಕೊಂಡಿರುವ ಮೂರು ಮಕ್ಕಳನ್ನು ಸೋನು ದತ್ತು ಪಡೆದಿದ್ದಾರೆ. ಈ ಕುರಿತು ಟ್ವೀಟ್ ಮಾಡಿರುವ ಅವರು, 'ಇನ್ನು ಮುಂದೆ ಅವರು ಅನಾಥರಲ್ಲ. ಅವರು ನನ್ನ ಜವಾಬ್ದಾರಿ' ಎಂದು ಹೇಳಿಕೊಂಡಿದ್ದಾರೆ.
ತೆಲಂಗಾಣದಲ್ಲಿರುವ ಮಕ್ಕಳ ಬಗ್ಗೆ ಸೋನುಗೆ ಹೇಗೆ ಗೊತ್ತಾಯಿತು ಎಂಬ ಪ್ರಶ್ನೆ ಸಹಜವಾಗಿಯೇ ಬರಬಹುದು. ಈ ವಿಷಯವಾಗಿ ಸೋನು ಅವರ ಗಮನ ಸೆಳೆದಿದ್ದು ರಾಜೇಶ್ ಕರಣಂ ಎನ್ನುವವರು. ಈ ಕುರಿತು ಸೋನುಗೆ ಟ್ವೀಟ್ ಮಾಡಿದ್ದ ಅವರು, ತೆಲಂಗಾಣ ರಾಜ್ಯದ ಮೂರು ಮಕ್ಕಳಿಗೆ ಸ್ವಂತದವರು ಯಾರೂ ಇಲ್ಲ. ಅವರು ನಿಮ್ಮ ಸಹಾಯ ಕೇಳುತ್ತಿದ್ದಾರೆ. ದಯವಿಟ್ಟು ಸಹಾಯ ಮಾಡಿ ಎಂದು ಟ್ವಿಟರ್ ಮೂಲಕ ಗಮನಸೆಳೆದಿದ್ದರು. ಅಷ್ಟೇ ಅಲ್ಲ, ಆ ಮಕ್ಕಳ ವಿಡಿಯೋ ಸಹ ಹಂಚಿಕೊಂಡಿದ್ದರು. ತಕ್ಷಣ ಕಾರ್ಯಪ್ರವೃತ್ತರಾದ ಸೋನು ಅವರ ತಂಡದವರು, ಆ ಮೂರು ಮಕ್ಕಳನ್ನು ಸಂಪರ್ಕಿಸಿದ್ದಾರೆ.
ಈ ಮೂರು ಮಕ್ಕಳ ತಂದೆ, ಕಳೆದ ವರ್ಷ ನಿಧನರಾಗಿದ್ದರು. ಇನ್ನು ಅವರ ತಾಯಿ ಅನಾರೋಗ್ಯದಿಂದ ಕಳೆದ ವಾರ ಮೃತಪಟ್ಟರಂತೆ. ಆ ನಂತರ ಇವರನ್ನು ನೋಡಿಕೊಳ್ಳುವುದಕ್ಕೆ ಯಾರೆಂದರೆ ಯಾರೂ ಇಲ್ಲ. ಸಂಬಂಧಿಕರು ಸಹ ಯಾರೂ ಇಲ್ಲವಾದ್ದರಿಂದ, ಮಕ್ಕಳು ಅಕ್ಷರಶಃ ಅನಾಥರಾಗಿದ್ದಾರೆ. ಇದು ದೊಡ್ಡ ಸುದ್ದಿಯಾಗಿ, ಹೇಗೋ ಸೋನುವರೆಗೂ ತಲುಪಿದೆ. ಈಗ ಸೋನು ಆ ಮಕ್ಕಳ ಜವಾಬ್ದಾರಿಯನ್ನು ವಹಿಸಿಕೊಂಡಿದ್ದಾರೆ.