ತುಮಕೂರು: ಉಚಿತ ಹೆಲ್ಮೆಟ್ಗಾಗಿ ನಾ ಮುಂದು- ತಾ ಮುಂದು ಎಂಬಂತೆ ನೂರಾರು ಜನ ಮುಗಿಬಿದ್ದು ಹೆಲ್ಮೆಟ್ ಪಡೆಯುತ್ತಿರುವ ದೃಶ್ಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ತುಮಕೂರು ಜಿಲ್ಲೆ ಶಿರಾ ನಗರದಲ್ಲಿ ಈ ಘಟನೆ ಸಂಭವಿಸಿದೆ. ಶಿರಾ ತಾಲೂಕು ಜೆಡಿಎಸ್ ಘಟಕದ ಅಧ್ಯಕ್ಷ ಆರ್.ಉಗ್ರೇಶ್, ನಗರದ ವಾಹನ ಸವಾರರಿಗೆ ಉಚಿತವಾಗಿ ಹೆಲ್ಮೆಟ್ ವಿತರಿಸಿದರು. ಕೆಲ ದಿನಗಳ ಹಿಂದೆ ರಸ್ತೆ ನಿಯಮಗಳ ಬಗ್ಗೆ ಅರಿವು ಮೂಡಿಸುವ ಕಾರ್ಯಕ್ರಮವನ್ನು ಉಗ್ರೇಶ್ ಆಯೋಜಿಸಿದ್ದರು. ಬಳಿಕ ಬೈಕ್ ಸವಾರರಿಗೆ ಉಚಿತ ಹೆಲ್ಮೆಟ್ ವಿತರಣೆ ಕಾರ್ಯಕ್ರಮ ಹಮ್ಮಿಕೊಂಡಿದ್ದರು.
ಫ್ರೀಯಾಗಿ ಹೆಲ್ಮೆಟ್ ಸಿಗುತ್ತೆ ಎಂಬ ಸುದ್ದಿ ತಿಳಿಯುತ್ತಿದ್ದಂತೆ ನೂರಾರು ಮಂದಿ ಸ್ಥಳಕ್ಕೆ ಜಮಾಯಿಸಿದ್ದರು. ನನಗೊಂದು, ನನಗೊಂದು.. ಎಂದು ಮುಗಿಬಿದ್ದು ಹೆಲ್ಮೆಟ್ ಪಡೆಯುತ್ತಿದ್ದರು. ಪರಿಣಾಮ ನಗರದ ಪ್ರವಾಸ ಮಂದಿರದ ಸರ್ಕಲ್ನಲ್ಲಿ ಕೆಲ ಕಾಲ ಟ್ರಾಫಿಕ್ ಜಾಮ್ ಉಂಟಾಗಿತ್ತು. ಜನರನ್ನು ನಿಯಂತ್ರಿಸಲು ಆಗದೆ ಆಯೋಜಕರು ಕಾರ್ಯಕ್ರಮವನ್ನು ಅರ್ಧಕ್ಕೇ ನಿಲ್ಲಿಸಿದರು. ಬಳಿಕ ಹಲವರು ನಿರಾಸೆಯಿಂದ ಹಿಂತಿರುಗಿದರು.