ಮುಂಬೈ: ಸಾಹಸಮಯ ಆಟಗಳು ಕೆಲವು ಸಂದರ್ಭಗಳಲ್ಲಿ ಪ್ರಾಣಕ್ಕೂ ಕುತ್ತಾಗುವುದಿದೆ. ಇಂಥ ಕೆಲವು ಘಟನೆಗಳು ಇದಾಗಲೇ ವರದಿಯಾಗಿದ್ದು, ದಕ್ಷಿಣ ಮುಂಬೈನ ಅಲಿಬಾಗ್ ಬೀಚ್ ಬಳಿ ಈಗ ಇಂಥದ್ದೇ ಇನ್ನೊಂದು ಘಟನೆ ನಡೆದಿದೆ.
ಪ್ಯಾರಾಸೈಲಿಂಗ್ ಮಾಡುವ ಸಂದರ್ಭದಲ್ಲಿ ಮಹಿಳೆಯರು ಹಗ್ಗ ತುಂಡಾದ ಹಿನ್ನೆಲೆಯಲ್ಲಿ ಬಿದ್ದಿರುವ ಘಟನೆ ನಡೆದಿದೆ. ಇತ್ತೀಚೆಗಷ್ಟೇ ದಿಯುವಿನಲ್ಲಿ ದಂಪತಿ ಇದೇ ರೀತಿ ಹಗ್ಗ ತುಂಡಾಗಿ ಬಿದ್ದಿದ್ದರು. ಈ ಘಟನೆ ಬೆನ್ನಲ್ಲೇ ಪ್ಯಾರಾಸೈಲಿಂಗ್ನ ಮತ್ತೊಂದು ಅವಘಡ ಸಂಭವಿಸಿದೆ.
ದಕ್ಷಿಣ ಮುಂಬೈನ ಅಲಿಬಾಗ್ ಬೀಚ್ ಬಳಿ ಪ್ಯಾರಾಸೈಲಿಂಗ್ ವೇಳೆ ಮುಂಬೈನ ಸಾಕಿ ನಾಕಾ ನಿವಾಸಿಗಳಾದ ಇಬ್ಬರು ಮಹಿಳೆಯರು 100 ಮೀಟರ್ ಎತ್ತರದಿಂದ ಸಮುದ್ರಕ್ಕೆ ಬಿದ್ದಿದ್ದು, ಇದರ ವಿಡಿಯೋ ವೈರಲ್ ಆಗಿದೆ. ಆದರೆ ಅದೃಷ್ಟವಶಾತ್ ಯಾವುದೇ ಪ್ರಾಣಾಪಾಯ ಸಂಭವಿಸಿಲ್ಲ.
ಸಾಮಾನ್ಯವಾಗಿ ಪ್ಯಾರಾಸೈಲಿಂಗ್ನಲ್ಲಿ ಎಲ್ಲಾ ಸುರಕ್ಷತಾ ಕ್ರಮಗಳನ್ನು ತೆಗೆದುಕೊಳ್ಳಲಾಗುತ್ತದೆ. ಲೈಫ್ ಜಾಕೆಟ್ಹಾಕಿಕೊಳ್ಳಲಾಗುತ್ತದೆ. ಪ್ಯಾರಾಚೂಟ್ ಹಗ್ಗವನ್ನು ಕೆಳಗೆ ದೋಣಿಗೆ ಕಟ್ಟಿಡಲಾಗುತ್ತದೆ. ಒಂದು ತುದಿಯನ್ನು ಸುರಕ್ಷತಾ ಸಿಬ್ಬಂದಿ ಹಿಡಿದುಕೊಂಡಿರುತ್ತಾರೆ. ಇಲ್ಲಿಯೂ ಅದೇ ರೀತಿ ಆಗಿದೆ. ಆದರೆ ಮಹಿಳೆಯರು ಮೇಲಕ್ಕೆ ಹಾರುತ್ತಿದ್ದಂತೆಯೇ ದೋಣಿಗೆ ಕಟ್ಟಲಾಗಿದ್ದ ಹಗ್ಗ ಹರಿದು, ಅವರಿಬ್ಬರೂ 100 ಮೀಟರ್ ಎತ್ತರದಿಂದ ಸಮುದ್ರಕ್ಕೆ ಬಿದ್ದಿದ್ದಾರೆ. ಬೋಟ್ನಲ್ಲಿದ್ದವರು ಕೂಡಲೇ ಹೋಗಿ ಅವರನ್ನು ರಕ್ಷಿಸಿದ್ದಾರೆ.
ಈ ಭಯಾನಕ ವಿಡಿಯೋ ಇಲ್ಲಿದೆ ನೋಡಿ: