ಮುಂಬೈ: ಜಗತ್ತಿನ ನಾಲ್ಕನೇ ಅತಿ ದೊಡ್ಡ ಶ್ರೀಮಂತ ಎಂಬ ಖ್ಯಾತಿ ಗಳಿಸಿರುವ ರಿಲಯನ್ಸ್ ಇಂಡಸ್ಟ್ರೀಸ್ ಅಧ್ಯಕ್ಷ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಮುಕೇಶ್ ಅಂಬಾನಿ ಅವರು ಇದೇ 10ರಂದು ಅಜ್ಜ ಆಗಿದ್ದಾರೆ. ಮುಕೇಶ್ ಮತ್ತು ನೀತಾ ಅಂಬಾನಿಯವರ ಮಗ ಆಕಾಶ್ ಪತ್ನಿ ಶ್ಲೋಕಾ ಅವರಿಗೆ 10ರಂದು ಗಂಡುಮಗು ಜನಿಸಿದೆ.
2019ರ ಮಾರ್ಚ್ ತಿಂಗಳಿನಲ್ಲಿ ನೀತಾ ಮತ್ತು ಆಕಾಶ್ ಅವರ ಮದುವೆ ನಡೆದಿತ್ತು. ಮಗುವು ಹುಟ್ಟುತ್ತಿದ್ದಂತೆಯೇ ಕೃಷ್ಣ ಪರಮಾತ್ಮನ ದಯೆ ಮತ್ತು ಆಶೀರ್ವಾದದಿಂದ ಶ್ಲೋಕಾ ಹಾಗೂ ಆಕಾಶ್ ಅಂಬಾನಿ ಅವರಿಗೆ ಗಂಡು ಸಂತಾನವಾಗಿದೆ ಎಂದು ಸಂತಸ ಹಂಚಿಕೊಂಡಿದ್ದ ಮುಕೇಶ್ ಅಂಬಾನಿ ಮಗುವನ್ನು ಹಿಡಿದುಕೊಂಡು ಫೋಟೋಗೆ ನೀಡಿರುವ ಪೋಸ್ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ವೈರಲ್ ಆಗಿತ್ತು.
ಈ ಆಗರ್ಭ ಸಿರಿವಂತನ ಮನೆಗೆ ಮಗಳು ಬರುತ್ತಾಳೋ, ಮಗ ಬರುತ್ತಾನೋ ಎಂದು ಬಹುಮಂದಿ ಕಾತರದಿಂದ ಕಾಯುತ್ತಿದ್ದರು. ಇದೀಗ ಗಂಡುಮಗು ಹುಟ್ಟುವುದರೊಂದಿಗೆ ಆ ಕಾತರ ಹೋಗಿದೆ. ಈಗ ಆ ಮಗುವಿಗೆ ಏನು ಹೆಸರು ಇಡಬಹುದು ಎಂದು ಹಲವರು ಕಮೆಂಟ್ ಮೂಲಕ ಚರ್ಚೆ ಶುರುಮಾಡಿದ್ದರು.
ಇದೀಗ, ಆ ಕುತೂಹಲವೂ ತಣಿದಿದೆ. ಏಕೆಂದರೆ ತಮ್ಮ ಮೊಮ್ಮಗುವಿಗೆ ಮುಕೇಶ್ ದಂಪತಿ ಪೃಥ್ವಿ ಎಂದು ಹೆಸರು ಇಟ್ಟಿದ್ದಾರೆ.
ಅಷ್ಟಕ್ಕೂ ಈ ಹೆಸರೇಕೆ ಎಂದು ಅನೇಕ ಮಂದಿ ಅವರನ್ನು ಪ್ರಶ್ನಿಸಿದರಂತೆ. ಅದಕ್ಕೆ ಅವರು ನೀಡಿರುವ ಉತ್ತರ ಎಂದರೆ, ನಮ್ಮ ಮನೆಯಲ್ಲಿ ಆಕಾಶ ಇದ್ದಾನೆ. ಆಕಾಶ ಒಂದೇ ಇದ್ದರೆ ಸಾಲದು, ಭೂಮಿಯೂ ಬೇಕಲ್ಲ, ಅದಕ್ಕಾಗಿಯೇ ಆಕಾಶನ ಮಗವಿನಗೆ ಪೃಥ್ವಿ ಎಂದು ಹೆಸರು ಇಟ್ಟಿದ್ದೇನೆ ಎಂದಿದ್ದಾರೆ.