ಸುರ್ಖೇದಾ (ಗುಜರಾತ್): ಭಾರತ ಎಂದರೆ ವಿಭಿನ್ನ ರೀತಿಯ ಸಂಪ್ರದಾಯಗಳ ತವರು. ಇಲ್ಲಿ ಇರುವ ಸಂಪ್ರದಾಯಗಳು ಒಂದಲ್ಲಾ... ಎರಡಲ್ಲಾ... ಒಂದೊಂದು ಭಾಗದಲ್ಲಿ ಒಂದೊಂದು ರೀತಿ ಸಂಪ್ರದಾಯ, ಒಂದೊಂದು ರೀತಿಯ ವಿಶೇಷತೆ. ಅದರಲ್ಲಿಯೂ ಮದುವೆ ಸಂಪ್ರದಾಯಗಳದ್ದಂತೂ ಭಿನ್ನ... ವಿಭಿನ್ನ... ಅವುಗಳ ಪೈಕಿ ಕೆಲವು ವಿಚಿತ್ರವೂ ಎನಿಸುವುದುಂಟು.
ಅಂಥದ್ದೇ ಒಂದು ನಗು ತರಿಸುವಂಥ ಸಂಪ್ರದಾಯ ಇರುವುದು ಗುಜರಾತ್ನ ಸುರ್ಖೇದಾ, ಸನಾದಾ ಮತ್ತು ಅಂಬಲಾ ಗ್ರಾಮದಲ್ಲಿನ ಆದಿವಾಸಿಗಳದ್ದು. ಇಲ್ಲೊಂದು ವಿಚಿತ್ರ ಪದ್ಧತಿದೆ. ಅದೇನೆಂದರೆ ವಧುವಿಗೆ ಸಿಂಧೂರ ಹಚ್ಚುವುದು, ತಾಳಿ ಕಟ್ಟುವುದು ಎಲ್ಲವೂ ಗಂಡನಲ್ಲ ಬದಲಿಗೆ ಆತನ ಸಹೋದರಿ! ಒಂದು ವೇಳೆ ಅವನಿಗಾನದರೂ ಅಕ್ಕ-ತಂಗಿ ಇಲ್ಲದಿದ್ದರೆ ಅವನ ಕುಟುಂಬದಲ್ಲಿ ಮದುವೆಯಾಗದೇ ಇರುವ ಯಾವುದಾದರೂ ಯುವತಿ ಇದ್ದಳೆ ಅವಳು ಈ ಕಾರ್ಯ ಮಾಡಬೇಕು.
ಮದುವೆ ಮುಗಿದ ಬಳಿಕ ವರನ ಸಹೋದರಿ ವಧುವನ್ನು ಅತ್ತೆ ಮನೆಯಿಂದ ಕರೆದುಕೊಂಡು ಅಣ್ಣನಿಗೆ ಒಪ್ಪಿಸುವಳು. ಒಂದು ವೇಳೆ ಈ ಸಂಪ್ರದಾಯ ಪಾಲಿಸದೇ ಮದುವೆಯಾದರೆ ಅವರ ಸಂಬಂಧ ಮುರಿದು ಬೀಳುತ್ತದೆ ಎಂಬ ನಂಬಿಕೆ ಇದೆಯಂತೆ.
ಅಷ್ಟಕ್ಕೂ ಇಂಥ ಆಚರಣೆ ಹಿಂದೆ ಕುತೂಹಲ ಕಥೆಯೂ ಇದೆ. ಅದೇನೆಂದರೆ ಈ ಗ್ರಾಮಗಳ ದೈವ ಅಪ್ಪಟ ಬ್ರಹ್ಮಾಚಾರಿಯಂತೆ. ಆದ್ದರಿಂದ ಮದುವೆ ಗಂಡಸಿನ ಜತೆಯಾದರೂ ತಾಳಿ ಕಟ್ಟುವುದು ಹೆಣ್ಣಂತೆ. ಅಲ್ಲಿಗೆ ಹೆಣ್ಣಿಗೆ ಹೆಣ್ಣಿನ ಜತೆ ಮದುವೆ ಮಾಡಿದಂತೆ, ಇದರಿಂದ ತಮ್ಮ ದೇವರು ಮುನಿಸಿಕೊಳ್ಳುವುದಿಲ್ಲ ಎಂಬ ನೆಮ್ಮದಿ ಈ ಗ್ರಾಮಸ್ಥರದ್ದು.