ಇಂದೋರ್ (ಮಧ್ಯಪ್ರದೇಶ): ಅಮೆರಿಕಕ್ಕೆ ತೆರಳಿದ್ದ ಬಿಜೆಪಿಯ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಕೈಲಾಶ್ ವಿಜಯವರ್ಗಿಯ ಅವರು 25 ದಿನಗಳ ನಂತರ ಇಂದೋರ್ಗೆ ವಾಪಸಾಗಿದ್ದಾರೆ. ಈಗ ಅವರೊಂದು ಹೇಳಿಕೆ ನೀಡಿರುವುದು ಕಾಂಗ್ರೆಸ್ ಪಾಳಯದಲ್ಲಿ ಭಾರಿ ಆಕ್ರೋಶಕ್ಕೆ ಕಾರಣವಾಗಿದೆ.
ಅದೇನೆಂದರೆ ಬಿಹಾರದ ರಾಜಕೀಯದ ಹಾಲಿ ವಿಷಯವನ್ನು ಅವರು ಮಾಧ್ಯಮಗಳ ಜತೆ ಪ್ರಸ್ತಾಪಿಸುತ್ತಿದ್ದರು. ಬಿಜೆಪಿ ಜತೆಗಿನ ಮೈತ್ರಿ ಮುರಿದುಕೊಂಡು ಆರ್ಜೆಡಿ, ಕಾಂಗ್ರೆಸ್ ಹಾಗೂ ಇತರ ಎಡಪಕ್ಷಗಳೊಂದಿಗೆ ಹೊಂದಾಣಿಕೆ ಮಾಡಿಕೊಂಡಿರುವ ನಿತೀಶ್ ಕುಮಾರ್ ಸರ್ಕಾರದ ಬಗ್ಗೆ ತಾವು ಅಮೆರಿಕದಲ್ಲಿ ಇದ್ದಾಗ ಸ್ನೇಹಿತರ ಜತೆ ಮಾತನಾಡಿರುವುದನ್ನು ಅವರು ಈ ವೇಳೆ ತಿಳಿಸಿದರು. ಆಗ ಅವರು, 'ಬಿಹಾರದಲ್ಲಿ ರಾಜಕೀಯ ಬೆಳವಣಿಗೆಗಳು ಆದಾಗ ನಾನು ಅಮೆರಿಕದಲ್ಲಿದ್ದೆ. ಬಿಹಾರದ ರಾಜಕೀಯದ ಬಗ್ಗೆ ನನ್ನ ಸ್ನೇಹಿತರ ಜತೆ ಮಾತನಾಡುತ್ತಿದ್ದೆ' ಎಂದು ಹೇಳಿದರು.
ನಂತರ ಬಿಹಾರದ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರನ್ನು ವಿದೇಶಿ ಮಹಿಳೆಗೆ ಹೋಲಿಸಿದ ಅವರು, "ನಿತೀಶ್ ಕುಮಾರ್ ಒಂಥರಾ ಫಾರಿನ್ ಲೇಡಿ ಇದ್ದ ಹಾಗೆ. ಅಲ್ಲಿಯ ಹುಡುಗಿಯರು ಯಾವಾಗ ಬೇಕಾದರೂ ಬಾಯ್ಫ್ರೆಂಡ್ಗಳನ್ನು ಬದಲಿಸ್ತಾರೆ, ಹಾಗೆ ನಿತೀಶ್ ಕುಮಾರ್ ಕೂಡ. ಯಾವಾಗ ಬೇಕಾದ್ರೂ ಯಾರ ಜತೆಯಾದ್ರೂ ಮೈತ್ರಿ ಮಾಡಿಕೊಳ್ಳುತ್ತಾರೆ" ಎಂದರು. ಆರ್ಜೆಡಿ ಜತೆ ಮುನಿಸಿಕೊಂಡು ಬಿಜೆಪಿ ಜತೆ ಮೈತ್ರಿ ಮಾಡಿಕೊಂಡ ನಿತೀಶ್ ಕುಮಾರ್, ಪುನಃ ಈಗ ಬಿಜೆಪಿ ಜತೆ ಮುನಿಸಿಕೊಂಡು ಆರ್ಜೆಡಿ ಜತೆ ಮೈತ್ರಿ ಮಾಡಿಕೊಂಡಿರುವುದಕ್ಕೆ ಸಂಬಂಧಿಸಿದಂತೆ ಇವರು ಟಾಂಗ್ ನೀಡಿದರು. ಬಿಹಾರದ ಸಿಎಂ ಯಾವ ಕ್ಷಣದಲ್ಲಿ ಯಾರ ಕೈ ಹಿಡಿತಾರೆ, ಯಾರ ಕೈ ಬಿಡ್ತಾರೆ ಅನ್ನೋದೇ ಗೊತ್ತಾಗೋದಿಲ್ಲ' ಎಂದು ತಮಾಷೆ ಮಾಡಿದರು.
ಅವರ ಈ ಮಾತಿಗೆ ಕಾಂಗ್ರೆಸ್ ಕಿಡಿ ಕಾರಿದೆ. ಎಐಸಿಸಿ ಪ್ರಧಾನ ಕಾರ್ಯದರ್ಶಿ ರಣದೀಪ್ ಸುರ್ಜೇವಾಲಾ ಅವರು ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಇವರ ಭಾಷಣ ಹಂಚಿಕೊಂಡಿದ್ದು, “ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಮಹಿಳೆಯರಿಗೆ ಯಾವ ರೀತಿ ಗೌರವ ತೋರಿಸುತ್ತಿದ್ದಾರೆ ಎಂಬುವುದಕ್ಕೆ ಇಂದೊಂದು ಉದಾಹರಣೆಯಾಗಿದೆ ಎಂದು ಟೀಕಿಸಿದ್ದಾರೆ. ಹೆಣ್ಣುಮಕ್ಕಳಿಗೆ ಬಿಜೆಪಿ ಯಾವ ರೀತಿಯ ಮರ್ಯಾದೆ ಕೊಡುತ್ತದೆ ನೋಡಿ ಎಂದು ಹೇಳಿದ್ದಾರೆ. (ಏಜೆನ್ಸೀಸ್)