ಹೈದರಾಬಾದ್: ಅಪಾರ್ಟ್ಮೆಂಟ್ನ ಫ್ಲ್ಯಾಟ್ ಮುಂದೆ ಆಟವಾಡುತ್ತಿದ್ದ ಐದು ವರ್ಷದ ಹೆಣ್ಣು ಮಗುವನ್ನು ಅಪರಿಚಿತನೊಬ್ಬ ಬಲವಂತಾಗಿ ಎಲಿವೇಟರ್ ಒಳಗೆ ಎಳೆದುಕೊಂಡು ಅನುಚಿತವಾಗಿ ವರ್ತಿಸಿರುವ ಘಟನೆ ಮಿಯಾಪುರ್ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ.
ರಾಜಸ್ಥಾನದ ಗೋರಖ್ಪುರ್ ಮೂಲದ ಗೊರಕ್ ಪ್ರಸಾದ್ ಮತ್ತು ರೇಣುಕಾ ಕಳೆದು 10 ವರ್ಷಗಳಿಂದ ಮಿಯಾಪುರ್ನ ಹಫೀಜ್ಪೇಟೆಯ ಅಪಾರ್ಟ್ಮೆಂಟ್ ಒಂದರಲ್ಲಿ ವಾಸವಿದ್ದಾರೆ. ದಂಪತಿಗೆ ಇಬ್ಬರು ಗಂಡು ಮತ್ತು ಮೂವರು ಹೆಣ್ಣು ಮಕ್ಕಳಿದ್ದಾರೆ.
ಸೋಮವಾರ ಮಧ್ಯಾಹ್ನ ಐದು ವರ್ಷದ ಮಗಳು ತಮ್ಮ ಫ್ಲ್ಯಾಟ್ ಮುಂದೆ ಆಟವಾಡುತ್ತಿತ್ತು. ಸ್ಟೋರ್ ಒಂದರಲ್ಲಿ ಚಾಕೋಲೆಟ್ ಖರೀದಿಸಿ ಬಂದ ಅಪರಿಚಿತ ವ್ಯಕ್ತಿ ಅಪಾರ್ಟ್ಮೆಂಟ್ ಒಳಗೆ ತೆರಳಿ ಬಾಲಕಿಗೆ ಚಾಕೋಲೆಟ್ ಆಮಿಷವೊಡ್ಡಿ ಬಲವಂತವಾಗಿ ಎಲಿವೇಟರ್ ಒಳಗೆ ಎಳೆದೊಯ್ದು ಅಸಭ್ಯವಾಗಿ ವರ್ತಿಸಿದ್ದಾನೆ.
ತಕ್ಷಣ ಬಾಲಕಿ ಕಿರುಚಿಕೊಂಡಾಗ ಆರೋಪಿ ಅಲ್ಲಿಂದ ಪರಾರಿಯಾಗಿದ್ದಾನೆ. ಬಳಿಕ ಬಾಲಕಿ ಏನು ನಡೆಯಿತು ಎಂದು ಪಾಲಕರ ಮುಂದೆ ಹೇಳಿದೆ. ಬಳಿಕ ಸಿಸಿಟಿವಿಯನ್ನು ಪರಿಶೀಲಿಸಿದಾಗ ಆರೋಪಿಯ ದುಷ್ಕೃತ್ಯವು ಅದರಲ್ಲಿ ದಾಖಲಾಗಿದೆ. ಸದ್ಯ ಪ್ರಕರಣ ದಾಖಲಿಸಿಕೊಂಡಿರುವ ಮಿಯಾಪುರ್ ಪೊಲೀಸರು ತನಿಖೆ ಆರಂಭಿಸಿದ್ದಾರೆ. (ಏಜೆನ್ಸೀಸ್)