ಶ್ರೀನಗರ: ಜಮ್ಮು ಮತ್ತು ಕಾಶ್ಮೀರದ ಕುಲ್ಗಮ್ ಜಿಲ್ಲೆಯ ರೈತನ ಪುತ್ರ ತನ್ವೀರ್ ಅಹ್ಮದ್ ಖಾನ್, ಕೇಂದ್ರ ಸಾರ್ವಜನಿಕ ಸೇವಾ ಆಯೋಗ (ಯುಪಿಎಸ್ಸಿ) ನಡೆಸಿದ ಪ್ರತಿಷ್ಠಿತ ಭಾರತೀಯ ಆರ್ಥಿಕ ಸೇವೆಗಳ (ಐಇಎಸ್) ಪರೀಕ್ಷೆಯಲ್ಲಿ 2ನೇ ರ್ಯಾಂಕ್ ಪಡೆಯುವ ಮೂಲಕ ಕೇಂದ್ರಾಡಳಿತ ಪ್ರದೇಶಕ್ಕೆ ಗೌರವ ಹೊತ್ತು ತಂದಿದ್ದಾರೆ.
ಅಹ್ಮದ್ ಖಾನ್, ದಕ್ಷಿಣ ಕಾಶ್ಮೀರದ ಶ್ರೀನಗರದಿಂದ ಸುಮಾರು 80 ಕಿ.ಮೀ ದೂರದಲ್ಲಿರುವ ಅತ್ಯಂತ ಹಿಂದುಳಿದ ನಿಗೀನ್ಪೊರ ಕುಂದ್ ಗ್ರಾಮದ ಮೂಲದವನು. ತನ್ನ ಗ್ರಾಮದಲ್ಲೇ ಪ್ರಾಥಮಿಕ ಶಾಲೆ ಪೂರೈಸಿದ ಖಾನ್ ವಾಲ್ಟೆಂಗೋದಲ್ಲಿ ಪ್ರೌಢಶಾಲೆಯನ್ನು ಮುಗಿಸಿದರು. ರಜ್ಲೂ ಕುಂದ್ನ ಸರ್ಕಾರಿ ಹೈಯರ್ ಸೆಕೆಂಡರಿ ಶಾಲೆಯಿಂದ ಪಿಯುಸಿಯಲ್ಲಿ ಉತ್ತೀರ್ಣರಾದರು ಮತ್ತು 2016 ರಲ್ಲಿ ಅನಂತನಾಗ್ ಸರ್ಕಾರಿ ಪದವಿ ಕಾಲೇಜಿನಿಂದ ಕಲಾ ಪದವಿ ಪಡೆದಿದ್ದಾಗಿ ತಿಳಿಸಿದ್ದಾರೆ.
ಪ್ರತಿಭಾವಂತ ವಿದ್ಯಾರ್ಥಿ ಆಗಿರುವ ಖಾನ್, ಕಾಶ್ಮೀರ ಯೂನಿವರ್ಸಿಟಿ ಪ್ರವೇಶ ಪರೀಕ್ಷೆಯಲ್ಲಿ ಮೂರನೇ ರ್ಯಾಂಕ್ ಪಡೆದು, ಅರ್ಥಶಾಸ್ತ್ರ ವಿಭಾಗದಲ್ಲಿ ಸ್ನಾತಕೋತ್ತರ ಪದವಿ ಶಿಕ್ಷಣ ಆರಂಭಿಸಿದರು. ಅಂತಿಮ ವರ್ಷದಲ್ಲಿರುವಾಗಲೇ ತಮ್ಮ ಬುದ್ಧಿವಂತಿಕೆಯಿಂದ ಖಾನ್ ಕಿರಿಯ ಸಂಶೋಧನಾ ಫೆಲೋಶಿಪ್ (ಜೆಆರ್ಎಫ್) ಪಡೆದರು.
ಜೆಆರ್ಎಫ್ ಪಡೆದುಕೊಂಡ ಖಾನ್, ಮಾಸ್ಟರ್ಸ್ ಇನ್ ಫಿಲಾಸಫಿ (ಎಂ.ಫಿಲ್) ಇನ್ ಡೆವೆಲಪ್ಮೆಂಟ್ ಸ್ಟಡೀಸ್ಗಾಗಿ ಕೋಲ್ಕತ್ತದ ಇನ್ಸ್ಟಿಟ್ಯೂಟ್ ಆಫ್ ಡೆವಲಪ್ಮೆಂಟ್ ಸ್ಟಡೀಸ್ಗೆ ಸೇರಿಕೊಂಡರು. ಬಳಿಕ ಏಪ್ರಿಲ್ 2021ರಲ್ಲಿ ಅಧ್ಯಯನವನ್ನು ಪೂರ್ಣಗೊಳಸಿದರು. ಶಿಕ್ಷಣದಲ್ಲಿ ಇಷ್ಟೆಲ್ಲ ಹಂತ ಪೂರೈಸಿರುವ ಖಾನ್ ಅವರ ಹಿನ್ನೆಲೆ ತುಂಬಾ ಬಡತನದಿಂದ ಕೂಡಿದೆ. ಅಧ್ಯಯನ ಜತೆಯಲ್ಲೇ ಖಾನ್ ಆಟೋ ಸಹ ಓಡಿಸುತ್ತಿದ್ದರು. ಶ್ರಮ ಎಂದಿಗೂ ವ್ಯರ್ಥವಾಗುವುದಿಲ್ಲ ಎಂಬುದು ಖಾನ್ ಅವರ ಬಲವಾದ ನಂಬಿಕೆ ಆಗಿತ್ತು.
ಕೋವಿಡ್ ಸಮಯದಲ್ಲಿ ನಾಲ್ಕ ಗೋಡೆಗಳ ಮಧ್ಯೆ ತಮ್ಮನ್ನು ತಾವು ನಿರ್ಬಂಧಿಸಿಕೊಂಡ ಖಾನ್, ಎಂಫಿಲ್ ಜತೆಗೆ ಐಇಎಸ್ ಪರೀಕ್ಷೆಗೆ ತಯಾರಿ ನಡೆಸಿದರು. ಕೋವಿಡ್ ಎಂದಿಗೂ ನನ್ನ ಅಧ್ಯಯನಕ್ಕೆ ಅಡ್ಡಗಾಲಾಗಲಿಲ್ಲ ಎಂದು ಖಾನ್ ಹೇಳಿಕೊಂಡಿದ್ದಾರೆ. ತನ್ನ ಮೊದಲ ಪ್ರಯತ್ನದಲ್ಲೇ ಐಇಎಸ್ ಸಾಧನೆ ಮಾಡಿರುವ ಖಾನ್, ಇದು ನನ್ನ ಕಠಿಣ ಹೋರಾಟದ ಫಲ ಎಂದು ಹೇಳಿದ್ದಾರೆ. ಹೋರಾಟದ ನಡುವೆಯೂ ನಾನೆಂದಿಗೂ ಭರವಸೆವನ್ನು ಕಳೆದುಕೊಳ್ಳಲಿಲ್ಲ ಎಂದಿದ್ದಾರೆ.
ಹಲವಾರು ಶೈಕ್ಷಣಿಕ ಸುಧಾರಣೆಗಳನ್ನು ಆರಂಭಿಸಿದ್ದಕ್ಕಾಗಿ ಕೇಂದ್ರ ಸರ್ಕಾರವನ್ನು ಪ್ರಶಂಸಿಸುತ್ತಾ, ಮೂಲಭೂತ ಶಿಕ್ಷಣ ವ್ಯವಸ್ಥೆಯನ್ನು ಪರಿಷ್ಕರಿಸುವ ಅವಶ್ಯಕತೆಯಿದೆ ಎಂದು ಖಾನ್ ಸೂಚಿಸಿದರು. ಅಲ್ಲದೆ, ಜಮ್ಮು-ಕಾಶ್ಮೀರ ಯುವಕರು ಹೆಚ್ಚಾಗಿ ಶಿಕ್ಷಣ ಕಡೆ ಚಿಂತಿಸಬೇಕೆಂಬ ಸಂದೇಶವನ್ನು ಸಾರಿದ್ದಾರೆ.
ಜಮ್ಮು ಮತ್ತು ಕಾಶ್ಮೀರದ ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ಕೂಡ ಐಇಎಸ್ 2020 ಪರೀಕ್ಷೆಯಲ್ಲಿ ಎರಡನೇ ಶ್ರೇಣಿಯನ್ನು ಗಳಿಸಿದ್ದಕ್ಕಾಗಿ ಖಾನ್ ಅವರನ್ನು ಅಭಿನಂದಿಸಿದ್ದಾರೆ. (ಏಜೆನ್ಸೀಸ್)