ನವದೆಹಲಿ: 2021ನೇ ಸಾಲಿನ ಇನ್ಸ್ಟಾಗ್ರಾಂ ಶ್ರೀಮಂತರ ಪಟ್ಟಿಯನ್ನು Hopperhq.com ಶುಕ್ರವಾರ (ಜುಲೈ 2) ಬಿಡುಗಡೆ ಮಾಡಿದೆ. ಫುಟ್ಬಾಲ್ ಆಟಗಾರ ಕ್ರಿಸ್ಟಿಯಾನೋ ರೊನಾಲ್ಡೊ, ನಟ ಹಾಗೂ ಮಾಜಿ ಡಬ್ಲ್ಯುಡಬ್ಲ್ಯುಇ ಕುಸ್ತಿಪಟು ಡ್ವೈನ್ ಜಾನ್ಸನ್ ಮತ್ತು ಅಮೆರಿಕನ್ ಸಿಂಗರ್ ಅರಿಯನಾ ಗ್ರ್ಯಾಂಡೆ ಪಟ್ಟಿಯಲ್ಲಿ ಟಾಪ್ ಸ್ಥಾನವನ್ನು ಅಲಂಕರಿಸಿದ್ದಾರೆ.
ಇನ್ಸ್ಟಾಗ್ರಾಂ ಶ್ರೀಮಂತರ ಪಟ್ಟಿಯನ್ನು ವಾರ್ಷಿಕವಾಗಿ ಬಿಡುಗಡೆ ಮಾಡಲಾಗುತ್ತದೆ. ಸೆಲೆಬ್ರಿಟಿಗಳು, ಕ್ರೀಡಾ ವ್ಯಕ್ತಿಗಳು ಮತ್ತು ಇನ್ಸ್ಟಾಗ್ರಾಂ ಪ್ರಭಾವಶಾಲಿಗಳು, ಸಾಮಾಜಿಕ ಜಾಲತಾಣದಲ್ಲಿ ಪ್ರಚಾರ ಮಾಡುವ ಪ್ರತಿ ಪೋಸ್ಟ್ಗೆ ಇನ್ಸ್ಟಾಗ್ರಾಂ ಪಾವತಿಸುವ ಆಧಾರದ ಮೇಲೆ ಸ್ಥಾನ ನೀಡಲಾಗುತ್ತದೆ.
ಇನ್ಸ್ಟಾಗ್ರಾಂ ಶ್ರೀಮಂತ ಪಟ್ಟಿಯಲ್ಲಿ ಫುಟ್ಬಾಲ್ ಆಟಗಾರ ಕ್ರಿಸ್ಟಿಯಾನೋ ರೊನಾಲ್ಡೊ ಅಗ್ರಸ್ಥಾನದಲ್ಲಿದ್ದಾರೆ. ಇನ್ಸ್ಟಾಗ್ರಾಂನಲ್ಲಿ 308 ಮಿಲಿಯನ್ ಫಾಲೋವರ್ಸ್ ಹೊಂದಿರುವ ರೊನಾಲ್ಡೊ ಪ್ರತಿ ಪ್ರಾಯೋಜಿತ ಪೋಸ್ಟ್ಗೆ ಸುಮಾರು 1,604,000 ಯುಎಸ್ ಡಾಲರ್ ಅಥವಾ 11.9 ಕೋಟಿ ರೂಪಾಯಿ ಸಂಪಾದಿಸುತ್ತಾರೆ.
ರೊನಾಲ್ಡೊ ಬಳಿಕ ಡ್ವೈನ್ ಜಾನ್ಸನ್ ಮತ್ತು ಅರಿಯಾನಾ ಗ್ರಾಂಡೆ ಕ್ರಮವಾಗಿ 11.3 ಕೋಟಿ ರೂ. (1,523,000 ಯುಎಸ್ ಡಾಲರ್)ಮತ್ತು 11.2 ಕೋಟಿ ರೂ. (1,510,000 ಯುಎಸ್ ಡಾಲರ್) ಗಳಿಸಿದ್ದಾರೆ. ರಿಯಾಲಿಟಿ ಟೆಲಿವಿಷನ್ ತಾರೆ ಕೈಲಿ ಜೆನ್ನರ್ 4 ನೇ ಸ್ಥಾನದಲ್ಲಿದ್ದರೆ, ಸೆಲೆನಾ ಗೊಮೆಜ್, ಕಿಮ್ ಕಾರ್ಡಶಿಯಾನ್, ಲಿಯೋನೆಲ್ ಮೆಸ್ಸಿ ಮತ್ತು ಬೆಯೋನ್ಸ್ ಕ್ರಮವಾಗಿ ಸ್ಥಾನ ಪಡೆದಿದ್ದಾರೆ.
ಇನ್ಸ್ಟಾಗ್ರಾಂ ಶ್ರೀಮಂತರ ಪಟ್ಟಿಯ 30ರಲ್ಲಿ ಸ್ಥಾನ ಪಡೆದ ಏಕೈಕ ಭಾರತೀಯ ಸೆಲೆಬ್ರಿಟಿಗಳೆಂದರೆ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಮತ್ತು ನಟಿ ಪ್ರಿಯಾಂಕಾ ಚೋಪ್ರಾ. ಪ್ರಿಯಾಂಕಾ 27 ನೇ ಸ್ಥಾನದಲ್ಲಿದ್ದು, ಇನ್ಸ್ಗ್ರಾಂನಲ್ಲಿ ಪ್ರಚಾರ ಮಾಡುವ ಪ್ರತಿ ಪೋಸ್ಟ್ಗೆ 403,000 ಯುಎಸ್ ಡಾಲರ್ (ಅಂದಾಜು 3 ಕೋಟಿ ರೂ.) ಗಳಿಸುತ್ತಾರೆ. ಪ್ರಿಯಾಂಕಾ 65 ಮಿಲಿಯನ್ ಫಾಲೋವರ್ಸ್ ಹೊಂದಿದ್ದಾರೆ.
2020 ರಲ್ಲಿ 23 ನೇ ಸ್ಥಾನದಲ್ಲಿದ್ದ ವಿರಾಟ್ ಕೊಹ್ಲಿ ಈ ವರ್ಷ 19 ನೇ ಸ್ಥಾನದಲ್ಲಿದ್ದಾರೆ. ವಿರಾಟ್ ಇನ್ಸ್ಟಾಗ್ರಾಂನಲ್ಲಿ 132 ಮಿಲಿಯನ್ ಫಾಲೋವರ್ಸ್ ಹೊಂದಿದ್ದಾರೆ ಮತ್ತು ಪ್ರತಿ ಪ್ರಾಯೋಜಿತ ಪೋಸ್ಟ್ಗೆ 680,000 ಯುಎಸ್ ಡಾಲರ್ (ಅಂದಾಜು 5 ಕೋಟಿ ರೂ.) ಗಳಿಸುತ್ತಾರೆ. (ಏಜೆನ್ಸೀಸ್)