ಬರ್ನ್: ಭಾರಿ ಗಾತ್ರದ ಆಯುಧದಿಂದ ಗಂಡನನ್ನು ಹೊಡೆದು ರಕ್ತಸಿಕ್ತವಾಗಿ ಕೊಲೆ ಮಾಡಿದ ಆರೋಪದಲ್ಲಿ ಬ್ರೆಜಿಲ್ ಮೂಲದ ಮಾಜಿ ವೃತ್ತಿಪರ ಬಾಕ್ಸರ್ ವಿವಿಯನೆ ಒಬೆನಾಫ್ (34)ರನ್ನು ಬಂಧಿಸಲಾಗಿದೆ.
ಸ್ವಿಟ್ಜರ್ಲ್ಯಾಂಡ್ನಲ್ಲಿರುವ ಅಪಾರ್ಟ್ಮೆಂಟ್ನಲ್ಲಿ ವಿವಿಯನೆ ಪತಿ ಥಾಮಸ್ ಮೃತದೇಹ ಪತ್ತೆಯಾಗಿತ್ತು. ರೆಸ್ಟೋರೆಂಟ್ ಮಾಲೀಕರಾಗಿದ್ದ ಥಾಮಸ್ ಮೃತದೇಹವು ಬಲವಾದ ಆಯುಧದಿಂದ ಹೊಡೆದು ರಕ್ತಸಿಕ್ತವಾಗಿ ಗಾಯಗೊಳಿಸಿ ಬರ್ಬರವಾಗಿ ಹತ್ಯೆ ಮಾಡಿದ ಸ್ಥಿತಿಯಲ್ಲಿ ಪತ್ತೆಯಾಗಿತ್ತು. ಅಪಾರ್ಟ್ಮೆಂಟ್ನಲ್ಲಿ ಆಯುಧ ಪತ್ತೆಯಾಗಿದ್ದರಿಂದ ಸಹಜವಾಗಿಯೇ ವಿವಿಯನೆ ಮೇಲೆ ಅನುಮಾನ ವ್ಯಕ್ತವಾಗಿದೆ.
ಕಳೆದ ವಾರವೇ ವಿವಿಯನೆಯನ್ನು ಸ್ವಿಟ್ಜರ್ಲ್ಯಾಂಡ್ ಪೊಲೀಸರು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದರು. ಇದೀಯ ಕೊಲೆಯಲ್ಲಿ ಪ್ರಾಥಮಿಕ ಶಂಕಿತೆಯಾಗಿರುವ ಹಿನ್ನೆಲೆಯಲ್ಲಿ ಆಕೆಯನ್ನು ಬಂಧಿಸಲಾಗಿದೆ.
ಇನ್ನು ವಿವಿಯನೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಮಾಡಿದ್ದು, ಮಾಜಿ ಬಾಕ್ಸಿಂಗ್ ಚಾಂಪಿಯನ್ ಮತ್ತು ಒಲಿಂಪಿಕ್ ಜಿಮ್ನಾಸ್ಟ್ ಸಹ ಹೌದು. ತನ್ನ ವೃತ್ತಿ ಜೀವನದಲ್ಲಿ ಹಲವು ದಾಖಲೆ ಬರೆದಿರುವ ವಿವಿಯನೆ ಎರಡು ವರ್ಲ್ಡ್ ಬಾಕ್ಸಿಂಗ್ ಫೆಡರೇಶನ್ ಇಂಟರ್ನ್ಯಾಷನಲ್ ಟೈಟಲ್ ಕೂಡ ಪಡೆದುಕೊಂಡಿದ್ದಾರೆ. ಕಳೆದ ವರ್ಷವಷ್ಟೇ ನಿವೃತ್ತಿ ಪಡೆದುಕೊಂಡಿದ್ದರು.
ಕಳೆದ ಜನವರಿ 25ರಂದು ಥಾಮಸ್ರನ್ನು ವಿವಿಯನೆ ಮದುವೆಯಾಗಿದ್ದರು. ತಾವು ನೆಲೆಸಿದ್ದ ಸ್ವಿಸ್ನ ಇಂಟರ್ಲೇಕನ್ ಪಟ್ಟಣದಲ್ಲಿ ಜಿಮ್ ತೆರೆದಿದ್ದರು. ಅಲ್ಲಿಯೇ ಥಾಮಸ್ ರೆಸ್ಟೋರೆಂಟ್ ಮಾಲೀಕರಾಗಿದ್ದರು. ಪೊಲೀಸರು ಜಿಮ್ ಹುಡುಕಾಡಿದಾಗ ಕೆಲ ದಾಖಲೆಗಳು ಸಹ ಪತ್ತೆಯಾಗಿವೆ.
ಇನ್ನು ವಿವಿಯನೆ ಈ ಮುಂಚೆ ಒಂದು ಬಾರಿ ಬಂಧನಕ್ಕೆ ಒಳಗಾಗಿದ್ದರು. 2016ರಲ್ಲಿ ಲಂಡನ್ನಲ್ಲಿ ತನ್ನ 30ನೇ ಹುಟ್ಟಹಬ್ಬದ ಸಂಭ್ರಮ ವೇಳೆ ವ್ಯಕ್ತಿಯೊಬ್ಬ ತನ್ನ ಮೈಕೈ ಮುಟ್ಟಿದ ಎಂದು ಆತನ ಮೇಲೆ ಬಾಕ್ಸಿಂಗ್ ಪಂಚ್ ಮೂಲಕ ಹಲ್ಲೆ ಮಾಡಿದ್ದರು. ಘಟನೆ ನಡೆದ ರಾತ್ರಿ ಕೆಲವು ಗಂಟೆಯವರೆಗೂ ವಿವಿಯನೆ ಜೈಲು ವಾಸ ಅನುಭವಿಸಿದ್ದಳು.
ವಿವಿಯನೆ ಜತೆ ಈ ಹಿಂದೆ ಡೇಟಿಂಗ್ ಮಾಡಿದ್ದ ಫೈಟರ್ ಮಾಧ್ಯಮ ಜತೆ ಮಾತನಾಡಿ, ಸದ್ಯ ಆಕೆ ಜೈಲು ವಾಸಿಯಾಗಿರುವುದರಲ್ಲಿ ಯಾವುದೇ ಅಚ್ಚರಿಯಿಲ್ಲ. ಅವಳಿಗೆ ಯಾವಾಗಲೂ ಎರಡು ಮುಖವಿದೆ ಎಂದು ಟೀಕಿಸಿದ್ದಾರೆ. (ಏಜೆನ್ಸೀಸ್)