ನಿಮ್ಫೆನ್ಬರ್ಗ್: ಖ್ಯಾತ ಕಲಾವಿದ ಪ್ರವೀಣ್ ಗೋಡ್ಕಿಂಡಿ ಅವರ ಕೊಳಲು ವಾದನ ನಿಮ್ಫೆನ್ಬರ್ಗ್ (Nymphenburger)ನಲ್ಲಿ ನಡೆಯಿತು. ಲಕ್ಷ್ಮಿ ಆಳ್ವಾರ್ ಅವರು ದೀಪ ಬೆಳಗಿಸಿ ಕಾರ್ಯಕ್ರಮ ಉದ್ಘಾಟಿಸಿದರು. ಸಿರಿಗನ್ನಡ ಕೂಟ ಮ್ಯೂನಿಕ್ ನಗರದಲ್ಲಿ ಇದೇ ಮೊದಲ ಬಾರಿಗೆ ಕಾರ್ಯಕ್ರಮ ಆಯೋಜಿಸಿತ್ತು.
ಪ್ರವೀಣ್ ಗೋಡ್ಕಿಂಡಿ ಅವರಿಂದ ಕೊಳಲು ವಾದನ ಸಂಗೀತಾಸಕ್ತರನ್ನು ಮೂಕ ವಿಸ್ಮಿತರನ್ನಾಗಿ ಮಾಡಿತು. ಪ್ರವೀಣ್ ಗೋಡ್ಕಂಡಿ ಅವರ ಕೊಳಲಿನ ವಾದನಕ್ಕೆ ತಬಲಾ ಮಾಸ್ಟರ್ ಅರುಪ್ ಸೇನ್ ಗುಪ್ತ ಹಾಗೂ ದತ್ತಾತ್ರೇಯ ದೇಸಾಯಿ ಸಾಥ್ ನೀಡಿದರು.
ಮಿಶ್ರ ಪಹಾಡಿ ರಾಗದಲ್ಲಿ ಪ್ರಕೃತಿಯ ಸುಂದರ ಸೊಬಗನ್ನು ಕೊಳಲಿನ ಮೂಲಕ ಹೊರಸೂಸಿದ್ದು, ಹಲವಾರು ದೇಶೀಯ ಸ್ವರಗಳನ್ನು ನುಡಿಸುತ್ತ ಒಂದು ಹಂತದಲ್ಲಿ ಒಂದೇ ಕೈಯಲ್ಲಿ ಕೊಳಲನ್ನು ನುಡಿಸಿದ್ದು ಪ್ರೇಕ್ಷಕರನ್ನು ಸೆಳೆಯಿತು. ಮಿಶ್ರ ಪಹಾಡಿ ರಾಗದಲ್ಲಿ ವಿವಿಧ ಸ್ವರಸಂಯೋಜೋನೆಯಿರುವ ಹಲವಾರು ಜನಪ್ರಿಯ ಭಕ್ತಿಗೀತೆ, ಭಾವಗೀತೆ ಜನಪದದಿಂದ ಹಿಡಿದು ಕನ್ನಡ ಹಾಗೂ ಹಿಂದಿ ಚಲನಚಿತ್ರ ಗೀತೆಗಳ ರಾಗಮಾಲಿಕೆ ನುಡಿಸಿದರು.
ಆರಂಭದಲ್ಲಿ ಪಂಡಿತ್ ರವಿಶಂಕರ್ ಅವರಿಂದ ಸಂಯೋಜನೆಯಾದ ಪಿಲೂಯಿ ರಾಗದಿಂದ ಪ್ರಾರಂಭವಾದ ಲಾಲ್ ಗುಡಿ ಜಯರಾಮನ್ ಅರವರ ಮೋಹನ ಕಲ್ಯಾಣಿ ತಿಲ್ಲಾನ ರಾಗದೊಂದಿಗೆ ಸಂಗೀತ ಕಾರ್ಯಕ್ರಮ ನಡೆಯಿತು. ಸ್ಥಳೀಯ ಪ್ರತಿಭೆಗಳಾದ ಡಾ. ಮಹತಿ ಭಾರ್ಗವಪುರಿ(ಪಿಟೀಲು), ಅಮಿತ್ ನಾಯಕ್ (ಮ್ಯಾಂಡೋಲಿನ್) ಹಾಗೂ ಡಾ. ಬಾಲಕೃಷ್ಣ(ಮೃದಂಗ)ದಲ್ಲಿ ಸಹಕರಿಸಿದರು.
ಪ್ರವೀಣ್ ಗೋಡ್ಕಿಂಡಿ ಅವರ ಕೊಳಲು ವಾದನ ಕಾರ್ಯಕ್ರಮದಲ್ಲಿ ಭಾರತೀಯರಲ್ಲದೆ, ಜರ್ಮಿನಿ ಪ್ರಜೆಗಳು ಹಾಗೂ ವಿವಿಧ ಸಂಗೀತ ಶಾಲೆಯ ಶಿಕ್ಷಕರು, ವಿದ್ಯಾರ್ಥಿಗಳು ಭಾಗವಹಿಸಿದ್ದರು.