ಕೊಚ್ಚಿ: ಓಡಿ ಬಂದು ಜಿಗಿದು ವಾಹನ(Vehicle)ಗಳ ಗಾಜು (Glass) ಒಡೆಯುವ ದೃಶ್ಯವನ್ನು ಸಿನಿಮಾಗಳಲ್ಲಿ ಹೆಚ್ಚಾಗಿ ನೋಡಿರುತ್ತೇವೆ. ನಿಜ ಜೀವನದಲ್ಲಿ ಈ ರೀತಿ ಮಾಡಲು ಅಷ್ಟು ಸುಲಭವಲ್ಲ. ಅದಕ್ಕಾಗಿ ಡಬಲ್ ಗುಂಡಿಗೆ ಬೇಕು. ಸ್ವಲ್ಪ ಎಡವಟ್ಟಾದರೂ ಪ್ರಾಣವೇ ಹೋಗಬಹುದು. ಇಲ್ಲೊಬ್ಬ ಯುವಕ (Youth) ತನ್ನ ಎದುರಿಗೆ ಬರುತ್ತಿದ್ದ ಬಸ್ (Bus) ಒಂದರ ಗಾಜನ್ನು ಓಡಿ ಬಂದು ಜಿಗಿದು ತಲೆಯಿಂದಲೇ ಪುಡಿ ಪುಡಿ ಮಾಡಿರುವ ಭಯಾನಕ ಘಟನೆ ಕೇರಳ (Kerala)ದ ಮಲಪ್ಪುರಂ ಜಿಲ್ಲೆಯ ಪೆರಿಂತಲಮನ್ನಾ ಪಟ್ಟಣದಲ್ಲಿ ನಡೆದಿದೆ.
ಅರೆ ಬೆತ್ತಲೆಯ ಸ್ಥಿತಿಯಲ್ಲಿದ್ದ ಯುವಕ ಓಡಿ ಬಂದು ಬಸ್ನ ವಿಂಡ್ಶೀಲ್ಡ್ ಗಾಜನ್ನು ತಲೆಯಿಂದ ಪುಡಿ ಪುಡಿ ಮಾಡಿದ್ದಲ್ಲದೆ, ಬಸ್ ಒಳಗೆ ಏರಿ ಡ್ರೈವರ್ ಸೀಟ್ ಮೇಲೆ ಕೆಲ ಕಾಲ ಕುಳಿತು ಪೀಡಿಸಿದ್ದಾರೆ. ಅಂದಹಾಗೆ ಪೆರಿಂತಲಮನ್ನಾದ ಅಂಗಡಿಪ್ಪುರಂನಲ್ಲಿ ಈ ಘಟನೆ ನಡೆದಿದ್ದು, ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣ (Social Media)ದಲ್ಲಿ ವೈರಲ್ ಆಗಿದೆ.
ಈ ಘಟನೆ ನಿನ್ನೆ 5 ಗಂಟೆ ಸುಮಾರಿಗೆ ಜುಬಿಲಿ ಜಂಕ್ಷನ್ ಬಳಿ ನಡೆದಿದೆ. ಬಸ್ ಮಂಕಡಾ ಕಡೆಗೆ ತೆರಳುತ್ತಿತ್ತು. ಈ ವೇಳೆ ಬಸ್ ಎದುರಿಗೆ ಓಡಿ ಬಂದು, ಮೇಲಕ್ಕೆ ಜಿಗಿದು ತಲೆಯಿಂದ ಡಿಕ್ಕಿ ಹೊಡೆದು ವಿಂಡ್ಶೀಲ್ಡ್ ಗಾಜನ್ನು ಪುಡಿ ಪುಡಿ ಮಾಡಿದ್ದಾನೆ. ಬಸ್ ಗುದ್ದಿದ ರಭಸಕ್ಕೆ ಯುವಕನು ಕೂಡ ಕೊಂಚ ದೂರ ಹಾರಿ ಬಿದ್ದಿದ್ದಾನೆ. ಕೆಲ ಸೆಕೆಂಡ್ಗಳ ಕಾಲ ನೆಲದ ಮೇಲೆಯೇ ಬಿದ್ದಿದ್ದ ಯುವಕ, ಬಳಿಕ ಎದ್ದು ಬಂದು ಬಸ್ ಏರಿದ್ದಾನೆ. ಡ್ರೈವರ್ ಸೀಟ್ ಮೇಲೆ ಕುಳಿತು ತನ್ನ ಎರಡೂ ಕಾಲುಗಳನ್ನು ಸ್ಟೀರಿಂಗ್ ಮೇಲೆ ಇಟ್ಟು ಕೆಲಕಾಲ ಬಸ್ನಲ್ಲಿದ್ದವರನ್ನು ಪೀಡಿಸಿದ್ದಾರೆ.
ಅಂದಹಾಗೆ ಯುವಕನನ್ನು ಮಾನಸಿಕ ಅಸ್ವಸ್ಥ (Mentally unstable) ಎಂದು ನಂಬಲಾಗಿದೆ. ಈ ಮುಂಚೆ ಚಿಕಿತ್ಸೆ ಪಡೆದುಕೊಂಡಿದ್ದ. ಆತನನ್ನು ವಶಕ್ಕೆ ಪಡೆದುಕೊಂಡ ಪೊಲೀಸರು ಖಾಸಗಿ ಆಸ್ಪತ್ರೆ (Hospital)ಗೆ ದಾಖಲಿಸಿದ್ದರು. ಇದೀಗ ಯುವಕನ ಕುಟುಂಬಸ್ಥರು ಕೋಯಿಕ್ಕೋಡ್ (Kozhikode) ಆಸ್ಪತ್ರೆಗೆ ಆತನನ್ನು ದಾಖಲಿಸಿ, ಚಿಕಿತ್ಸೆ ಕೊಡಿಸುತ್ತಿದ್ದಾರೆ. (ಏಜೆನ್ಸೀಸ್)