ನವದೆಹಲಿ: ಇಂಗ್ಲೆಂಡ್ನ ಡರ್ಬಿ ನಗರದಲ್ಲಿರುವ ಗುರು ಅರ್ಜಾನ್ ದೇವ್ ಗುರುದ್ವಾರವನ್ನು ಹಾನಿಗೊಳಿಸಿದ ಆರೋಪದಲ್ಲಿ ಪಾಕಿಸ್ತಾನ ಮೂಲದ ವ್ಯಕ್ತಿಯೊಬ್ಬನನ್ನು ಸೋಮವಾರ (ಮೇ 25) ಬಂಧಿಸಲಾಗಿದೆ.
ಈವರೆಗೂ ಆರೋಪಿಯ ಗುರುತು ಪತ್ತೆಯಾಗಿಲ್ಲ. ಆದರೆ, ಗುರುದ್ವಾರವನ್ನು ಹಾನಿಗೊಳಿಸುವ ಮುನ್ನ ಪಾಕಿಸ್ತಾನಿಗರಿಂದ ಬೆಂಬಲ ಕೋರಿ ಸಂದೇಶವೊಂದನ್ನು ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ್ದ ಎಂದು ತಿಳಿದುಬಂದಿದೆ.
ಆರೋಪಿಗೆ ಇತರೆ ಗುಂಪಿನ ಸದಸ್ಯರೊಂದಿಗೆ ಸಂಪರ್ಕ ಇರುವ ಸಾಧ್ಯತೆ ಬಗ್ಗೆ ಇಂಗ್ಲೆಂಡ್ ಪೊಲೀಸರು ತನಿಖೆ ಆರಂಭಿಸಿದ್ದಾರೆ.
ಗುರುದ್ವಾರ ಹಾನಿಗೊಳಿಸಿದ್ದನ್ನು ಪಂಜಾಬ್ ಮುಖ್ಯಮಂತ್ರಿ ಅಮರೀಂದರ್ ಸಿಂಗ್ ಹಾಗೂ ಸಿಖ್ ಸಂಘಟನೆಗಳು ಖಂಡಿಸಿವೆ. ಡರ್ಬಿ ನಗರದಲ್ಲಿನ ಗುರು ಅರ್ಜಾನ್ ದೇವ್ ಜೀ ಗುರುದ್ವಾರವನ್ನು ಹಾನಿಗೊಳಿಸಿದ ಆರೋಪದಲ್ಲಿ ಪಾಕ್ ಮೂಲದ ಆರೋಪಿಯನ್ನು ಬಂಧಿಸಲಾಗಿದೆ. ವಿಶ್ವದಲ್ಲಿ ಮಾನವೀಯತೆ ಉಳಿಯಬೇಕಾದರೆ ಇಂತಹ ದ್ವೇಷ ಮತ್ತು ಅಸಹಿಷ್ಣುತೆ ಕೊನೆಗೊಳ್ಳಲೇಬೇಕು. ಅದರಲ್ಲೂ ವಿಶ್ವ ಹಿಂದೆಂದೂ ಕಾಣದಂತಹ ಬಿಕ್ಕಟ್ಟಿನಲ್ಲಿರುವ ಸಮಯದಲ್ಲಿ ಇದನ್ನು ಸಹಿಸಲಾಗದು ಎಂದು ಸಿಎಂ ಸಿಂಗ್ ಟ್ವೀಟ್ ಮಾಡಿದ್ದಾರೆ.
ಸ್ಥಳೀಯ ಮಾಧ್ಯಮ ವರದಿಗಳ ಪ್ರಕಾರ ಘಟನೆ ಸೋಮವಾರ ರಾತ್ರಿ 8:30ರ ಸುಮಾರಿಗೆ ನಡೆದಿದ್ದು, ಗುರುದ್ವಾರದ ಹೆಬ್ಬಾಗಿಲುಗಳನ್ನು ಹಾನಿಗೊಳಿಸಿದ್ದಾನೆ ಎಂದು ತಿಳಿದುಬಂದಿದೆ. (ಏಜೆನ್ಸೀಸ್)