ನವದೆಹಲಿ: ಜಗತ್ತಿನ ಹಲವು ರಾಷ್ಟ್ರಗಳಲ್ಲಿ ತಲ್ಲಣ ಮೂಡಿಸಿದ್ದ ಒಮಿಕ್ರಾನ್ ಭಾರತ ಪ್ರವೇಶಿಸಿದ್ದಾಗಿದೆ. ಕರ್ನಾಟಕದಲ್ಲೇ ಇಬ್ಬರು ಪುರುಷರಲ್ಲಿ ಕಂಡುಬಂದಿರುವ ಕರೊನಾ ಸೋಂಕಿಗೆ ಈ ಹೆಚ್ಚು ಹರಡುವ ರೂಪಾಂತರಿ ಕಾರಣವಾಗಿರುವುದು ಜಿನೋಮ್ ಸೀಕ್ವೇಂಸಿಂಗ್ನಿಂದ ತಿಳಿದುಬಂದಿದೆ. ಈ ಹೊತ್ತಲ್ಲಿ ಜನರು ಮಾಡಬೇಕಾದ್ದೇನು ಎಂಬುದನ್ನು ಕೇಂದ್ರ ಸರ್ಕಾರ ವಿವರಿಸಿದೆ.
"ಆತಂಕ ಪಡುವ ಅಗತ್ಯವಿಲ್ಲ. ಆದರೆ, ಜಾಗೃತಿ ಮೂಡಿಸುವುದು ಸಂಪೂರ್ಣ ಅವಶ್ಯಕ. ಕೋವಿಡ್ ಸೂಕ್ತ ನಡವಳಿಕೆ ಅವಶ್ಯಕ" ಎಂದು ಐಸಿಎಂಆರ್ ಡೈರೆಕ್ಟರ್ ಜನರಲ್ ಬಲರಾಂ ಭಾರ್ಗವ ಹೇಳಿದ್ದಾರೆ. ಮಾಸ್ಕ್ ತೊಡುವುದು, ಸಾಮಾಜಿಕ ಅಂತರ ಪಾಲಿಸುವುದು, ಶುಚಿತ್ವ ಕಾಪಾಡುವುದು ಎಲ್ಲಾ ಈಗ ಮತ್ತೆ ಹೆಚ್ಚಿನ ಮಹತ್ವ ಪಡೆದಿವೆ.
ಮತ್ತೆ ಸಾರ್ವಜನಿಕ ಕಾರ್ಯಕ್ರಮಗಳಿಗೆ ಹೋಗದೇ ಇರುವುದು, ಜನ ಸೇರುವಂಥ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳದಿರುವುದು ಮುಂತಾಗಿ ಎಚ್ಚರ ವಹಿಸಿದರೆ ಒಮಿಕ್ರಾನ್ ಹರಡುವಿಕೆಯನ್ನು ತಡೆಯಬಹುದು. ಕರೊನಾ ಲಸಿಕೆಯ ಎರಡೂ ಡೋಸ್ಗಳನ್ನು ಎಲ್ಲರೂ ಪಡೆಯುವಂತೆ ಕ್ರಮ ಕೈಗೊಳ್ಳುವುದು ಈಗಿನ ಅಗತ್ಯ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಹೇಳಿದೆ. (ಏಜೆನ್ಸೀಸ್)