ನವದೆಹಲಿ: ಸೆಪ್ಟೆಂಬರ್ ತ್ರೈಮಾಸಿಕದಲ್ಲಿ ಆರ್ಥಿಕ ಬೆಳವಣಿಗೆಯ ಕುಸಿತವು ವ್ಯವಸ್ಥಿತ ಅಲ್ಲ ಮತ್ತು ಮೂರನೇ ತ್ರೈಮಾಸಿಕದಲ್ಲಿ ಉತ್ತಮ ಸಾರ್ವಜನಿಕ ವೆಚ್ಚದೊಂದಿಗೆ ಆರ್ಥಿಕ ಚಟುವಟಿಕೆಯು ನಿಧಾನಗತಿಯನ್ನು ಸರಿದೂಗಿಸಬಹುದು ಎಂದು ಹಣಕಾಸು ಸಚಿವ ನಿರ್ಮಲಾ ಸೀತಾರಾಮನ್( Nirmala Sitharaman) ಶುಕ್ರವಾರ(ಡಿಸೆಂಬರ್ 6) ಹೇಳಿದ್ದಾರೆ.
ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು, ಇದು ವ್ಯವಸ್ಥಿತ ನಿಧಾನಗತಿಯಲ್ಲ. ಇದು ಸಾರ್ವಜನಿಕ ವೆಚ್ಚ, ಬಂಡವಾಳ ವೆಚ್ಚ ಮತ್ತು ಇತರ ಚಟುವಟಿಕೆಗಳಲ್ಲಿನ ಕಡಿತದಿಂದಾಗಿ. ಮೂರನೇ ತ್ರೈಮಾಸಿಕದಲ್ಲಿ ಇವೆಲ್ಲವನ್ನೂ ಸರಿದೂಗಿಸಲಾಗುತ್ತದೆ ಎಂದು ನಾನು ನಿರೀಕ್ಷಿಸುತ್ತೇನೆ ಎಂದು ಹೇಳಿದರು.
ಇತ್ತೀಚಿನ ಜಿಡಿಪಿ ಬೆಳವಣಿಗೆಯ ದತ್ತಾಂಶವನ್ನು ಆರ್ಥಿಕತೆ ಮತ್ತು ಆಡಳಿತ ರಚನೆಯ ಹಿನ್ನೆಲೆಯಲ್ಲಿ ನೋಡಬೇಕು. ಜತೆಗೆ ನಾವು ಇತರ ಹಲವು ಅಂಶಗಳನ್ನು ಗಣನೆಗೆ ತೆಗೆದುಕೊಳ್ಳಬೇಕಾಗಿದೆ. ಮುಂದಿನ ವರ್ಷ ಮತ್ತು ನಂತರ ಭಾರತವು ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಯಾಗಿ ಉಳಿಯಲಿದೆ. ಸಾರ್ವತ್ರಿಕ ಚುನಾವಣೆಗಳು ಮತ್ತು ಬಂಡವಾಳ ವೆಚ್ಚದಲ್ಲಿನ ಕಡಿತದಿಂದಾಗಿ ಬೆಳವಣಿಗೆಯ ವೇಗವು ಮೊದಲ ತ್ರೈಮಾಸಿಕದಲ್ಲಿ ನಿಧಾನವಾಗಿತ್ತು. ಇದು ಎರಡನೇ ತ್ರೈಮಾಸಿಕದ ಮೇಲೂ ಪರಿಣಾಮ ಬೀರಿದೆ.
ಮೊದಲಾರ್ಧದಲ್ಲಿ 2024-25ನೇ ಹಣಕಾಸು ವರ್ಷದಲ್ಲಿ ಸರ್ಕಾರವು ತನ್ನ ಬಂಡವಾಳ ವೆಚ್ಚದ ಗುರಿಯಾದ 11.11 ಲಕ್ಷ ಕೋಟಿಯ ರೂ. ಕೇವಲ 37.3 ಪ್ರತಿಶತವನ್ನು ಮಾತ್ರ ಖರ್ಚು ಮಾಡಿದೆ. ಆರ್ಥಿಕ ಬೆಳವಣಿಗೆಯ ಮೇಲೆ ಪ್ರಭಾವ ಬೀರುವ ಇತರ ಅಂಶಗಳು ಜಾಗತಿಕ ಬೇಡಿಕೆಯಲ್ಲಿ ನಿಶ್ಚಲತೆಯನ್ನು ಒಳಗೊಂಡಿವೆ. ಇದು ರಫ್ತು ಬೆಳವಣಿಗೆಯ ಮೇಲೆ ಪರಿಣಾಮ ಬೀರಿದೆ ಎಂದು ಸೀತಾರಾಮನ್ ಹೇಳಿದರು. ಭಾರತೀಯರ ಕೊಳ್ಳುವ ಶಕ್ತಿ ಹೆಚ್ಚುತ್ತಿದೆ, ಆದರೆ ಭಾರತದೊಳಗೆ ನೀವು ವೇತನ ಬೆಳವಣಿಗೆಯ ನಿಶ್ಚಲತೆಯ ಬಗ್ಗೆಯೂ ಕಾಳಜಿ ಹೊಂದಿದ್ದೀರಿ. ಈ ಅಂಶಗಳ ಬಗ್ಗೆ ನಮಗೆ ಚೆನ್ನಾಗಿ ತಿಳಿದಿದೆ. ಇವು ಭಾರತದ ಸ್ವಂತ ಬಳಕೆಯ ಮೇಲೆ ಪ್ರಭಾವ ಬೀರಬಹುದು ಎಂದಿದ್ದಾರೆ.(ಏಜೆನ್ಸೀಸ್)