ಯಾಕೆಂದರೆ ನಾನು ಗಂಡಸು... ಡಿವೋರ್ಸ್ ಆಗಿದ್ರೂ ಮದ್ವೆಗೆ ಐಐಟಿ ಪದವೀಧರ ಇಟ್ಟ ವಿಚಿತ್ರ ಷರತ್ತು ಕೇಳಿದ್ರೆ ದಂಗಾಗ್ತೀರಾ! Matrimonial Site
- 37ರ ವಿಚ್ಛೇದಿತ ವ್ಯಕ್ತಿಯೊಬ್ಬ ಮದುವೆಯಾಗಲು ಯಾವುದೇ 'ಪಾಸ್ಟ್ ಲೈಫ್' ಇಲ್ಲದ ಕನ್ಯೆಯೇ ಬೇಕೆಂದು ಪಟ್ಟು ಹಿಡಿದಿದ್ದಾನೆ
- ತನ್ನ ನಡೆಯನ್ನು "ನಾನು ಪುರುಷ" ಎಂಬ ಕಾರಣ ನೀಡಿ ಸಮರ್ಥಿಸಿಕೊಂಡ ಆತನ ಮನಸ್ಥಿತಿಗೆ ಭಾರೀ ಆಕ್ರೋಶ ವ್ಯಕ್ತವಾಗಿದೆ
- 30 ವರ್ಷದೊಳಗಿನ ಬ್ರಾಹ್ಮಣ ಯುವತಿಯೇ ಬೇಕು ಹಾಗೂ ಯಾವುದೇ ಹಿಂದಿನ ಸಂಬಂಧಗಳಿರಬಾರದು ಎಂಬುದು ಈತನ ಡಿಮ್ಯಾಂಡ್
- : ಆತನ ಬೇಡಿಕೆಗಳು ವಾಸ್ತವಕ್ಕೆ ದೂರವಾಗಿದ್ದರಿಂದ ಓಂದ್ರಿಲಾ ಕಪೂರ್ ಆತನಿಗೆ ಸಹಾಯ ಮಾಡಲು ನಿರಾಕರಿಸಿದ್ದಾರೆ
Matrimonial Site : ಡೇಟಿಂಗ್ ಕೋಚ್ ಮತ್ತು ಮ್ಯಾಚ್ಮೇಕರ್ ಓಂದ್ರಿಲಾ ಕಪೂರ್ ಅವರು ಇತ್ತೀಚೆಗೆ ಹಂಚಿಕೊಂಡ ಸಾಮಾಜಿಕ ಜಾಲತಾಣದ ಪೋಸ್ಟ್ ಆನ್ಲೈನ್ನಲ್ಲಿ ದೊಡ್ಡ ಮಟ್ಟದ ಚರ್ಚೆ ಮತ್ತು ವಿವಾದಕ್ಕೆ ಕಾರಣವಾಗಿದೆ. ತಮ್ಮ ಕ್ಲೈಂಟ್ ಒಬ್ಬರು ಮದುವೆಗಾಗಿ ಇಟ್ಟಿರುವ ವಿಚಿತ್ರ ಹಾಗೂ ವಿಪರೀತ ಎನಿಸುವಂತಹ ನಿರೀಕ್ಷೆಗಳ ಬಗ್ಗೆ ಕಪೂರ್ ಅವರು ಮಾಹಿತಿ ಹಂಚಿಕೊಂಡಿದ್ದು, ಇದು ನೆಟ್ಟಿಗರ ಕೆಂಗಣ್ಣಿಗೆ ಗುರಿಯಾಗಿದೆ. ವಿವಿಧ ಸಾಮಾಜಿಕ ವೇದಿಕೆಗಳಲ್ಲಿ ಈ ಪೋಸ್ಟ್ ವೈರಲ್ ಆಗುತ್ತಿದ್ದು, ಬಳಕೆದಾರರು ತೀವ್ರವಾಗಿ ಪ್ರತಿಕ್ರಿಯಿಸುತ್ತಿದ್ದಾರೆ.
ಕಪೂರ್ ಅವರ ಪ್ರಕಾರ, ಆ ವ್ಯಕ್ತಿ 37 ವರ್ಷದ ವಿಚ್ಛೇದಿತ. ಆತ ಐಐಟಿಯಂತಹ ಪ್ರತಿಷ್ಠಿತ ಸಂಸ್ಥೆಯಲ್ಲಿ ಶಿಕ್ಷಣ ಪಡೆದಿದ್ದಾನೆ. ಪ್ರಸ್ತುತ ಶತಕೋಟಿ ಡಾಲರ್ ಮೌಲ್ಯದ ಕಂಪನಿಯೊಂದರಲ್ಲಿ ನಿರ್ದೇಶಕನಾಗಿ ಉನ್ನತ ಕಾರ್ಪೊರೇಟ್ ಹುದ್ದೆಯಲ್ಲಿದ್ದಾನೆ. ತಾನು ವಿಚ್ಛೇದಿತನಾಗಿದ್ದರೂ ಸಹ, ಮದುವೆಯಾಗಲಿರುವ ವಧುವಿನ ಬಗ್ಗೆ ಆತ ಅತ್ಯಂತ ಕಠಿಣ ಹಾಗೂ ವಿಚಿತ್ರವಾದ ನಿಬಂಧನೆಗಳನ್ನು ವಿಧಿಸಿರುವುದು ಈಗ ಚರ್ಚೆಗೆ ಗ್ರಾಸವಾಗಿದೆ.
ವರದಿಗಳ ಪ್ರಕಾರ, ಆ ವ್ಯಕ್ತಿಗೆ 30 ವರ್ಷದೊಳಗಿನ ಬ್ರಾಹ್ಮಣ ಸಮುದಾಯದ ಯುವತಿಯೇ ಬೇಕೆಂದು ಪಟ್ಟು ಹಿಡಿದಿದ್ದಾನೆ. ಅಷ್ಟೇ ಅಲ್ಲದೆ, ಆಕೆಗೆ ಈ ಹಿಂದೆ ಯಾವುದೇ ಪ್ರೇಮ ಸಂಬಂಧಗಳಿರಬಾರದು ಮತ್ತು ಲೈಂಗಿಕ ಇತಿಹಾಸವೂ ಇರಬಾರದು ಎಂಬ ಕಟ್ಟುನಿಟ್ಟಿನ ಷರತ್ತುಗಳನ್ನು ವಿಧಿಸಿದ್ದಾನೆ. ತಾನು ಈಗಾಗಲೇ ವಿಚ್ಛೇದನ ಪಡೆದಿದ್ದರೂ ಸಹ, ತನ್ನ ನಿರೀಕ್ಷೆಗಳ ವಿಷಯದಲ್ಲಿ ಆತ ಯಾವುದೇ ರಾಜಿ ಮಾಡಿಕೊಳ್ಳಲು ಸಿದ್ಧನಿಲ್ಲ ಎಂದು ಓಂದ್ರಿಲಾ ಕಪೂರ್ ಹೇಳಿದ್ದಾರೆ.
ಮಾತುಕತೆಯ ಸಂದರ್ಭದಲ್ಲಿ ಆ ವ್ಯಕ್ತಿಯು ತನ್ನ ವಿಚಿತ್ರ ನಿಬಂಧನೆಗಳನ್ನು ಸಮರ್ಥಿಸಿಕೊಳ್ಳುತ್ತಾ, 'ಹಲವು ಪ್ರೇಮ ಸಂಬಂಧಗಳನ್ನು ಹೊಂದಿರುವ ಮಹಿಳೆಯರು ಭವಿಷ್ಯದಲ್ಲಿ ನಂಬಿಕೆ ದ್ರೋಹ ಮಾಡುವ ಸಾಧ್ಯತೆ ಹೆಚ್ಚು' ಎಂದು ಯಾವುದೋ ಸಂಶೋಧನೆಯನ್ನು ಉಲ್ಲೇಖಿಸಿದ್ದಾನೆ. ಆದರೆ, ಮ್ಯಾಚ್ಮೇಕರ್ ಓಂದ್ರಿಲಾ ಅವರು ಸ್ವತಃ ವಿಚ್ಛೇದಿತನಾಗಿರುವ ನಿಮಗೆ ಇಂತಹ ನಿಬಂಧನೆಗಳು ಎಷ್ಟು ಸರಿ ಎಂದು ಪ್ರಶ್ನೆ ಮಾಡಿದ್ದಾರೆ. ಅಲ್ಲದೆ, ನಿಮ್ಮ ನಿಯಮ ಎರಡೂ ಕಡೆ ಅನ್ವಯಿಸಬೇಕಲ್ಲವೇ ಎಂದು ಕೇಳಿದಾಗ, ಆತ ಆ ಹೋಲಿಕೆಯನ್ನೇ ತಿರಸ್ಕರಿಸಿದ್ದಾನೆ. ಅಷ್ಟೇ ಅಲ್ಲದೆ, ತನ್ನ ನಡೆಗೆ ಸಮರ್ಥನೆಯಾಗಿ "ಯಾಕೆಂದರೆ ನಾನು ಪುರುಷ" ಎಂಬ ಹಾರಿಕೆಯ ಉತ್ತರ ನೀಡಿದ್ದಾನೆ. ಆತನ ಈ ಬೇಜವಾಬ್ದಾರಿಯುತ ಹೇಳಿಕೆಯು ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದ್ದು, ನೆಟ್ಟಿಗರು ಆತನ ಸಂಕುಚಿತ ಮನೋಭಾವವನ್ನು ತೀವ್ರವಾಗಿ ಟೀಕಿಸುತ್ತಿದ್ದಾರೆ.
ಕೊನೆಗೆ, ಆತನ ಮನಸ್ಥಿತಿಯು ಸುಸ್ಥಿರ ಸಂಬಂಧಕ್ಕಿಂತಲೂ ನಿಯಂತ್ರಣ ಹೇರುವ ಗುಣವನ್ನು ಹೊಂದಿದ್ದರಿಂದ ಓಂದ್ರಿಲಾ ಕಪೂರ್ ಆತನ ಪರವಾಗಿ ಕೆಲಸ ಮಾಡಲು ನಿರಾಕರಿಸಿದ್ದಾರೆ. ಆತನ ನಿರೀಕ್ಷೆಗಳು ವಾಸ್ತವಕ್ಕೆ ದೂರವಾಗಿದ್ದು, ಪೂರ್ವಾಗ್ರಹ ಪೀಡಿತವಾಗಿವೆ ಎಂದು ಓಂದ್ರಿಲಾ ಅಭಿಪ್ರಾಯಪಟ್ಟಿದ್ದಾರೆ. ಅಷ್ಟೇ ಅಲ್ಲದೆ, ಆತ ಬಯಸುವ ಎಲ್ಲಾ ಅರ್ಹತೆಗಳಿರುವ ಯುವತಿಯು ಸಂಪ್ರದಾಯಸ್ಥ ಹಿನ್ನೆಲೆಯಿಂದ ಬಂದಿರುತ್ತಾಳೆ. ಅಂತಹವಳು ಇಷ್ಟು ಕಠಿಣ ನಿಬಂಧನೆಗಳಿರುವ ವಿಚ್ಛೇದಿತ ವ್ಯಕ್ತಿಯನ್ನು ಒಪ್ಪಿಕೊಳ್ಳುವುದು ಅಸಾಧ್ಯ ಎಂದು ಓಂದ್ರಿಲಾ ಅವರು ಕಿವಿಮಾತು ಹೇಳಿದ್ದಾರೆ.
ಈ ಪೋಸ್ಟ್ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ನಾಂದಿ ಹಾಡಿದ್ದು, ಹೆಚ್ಚಿನ ಬಳಕೆದಾರರು ಆತನ "ದ್ವಂದ್ವ ನಿಲುವು"ಗಳನ್ನು ಕಟುವಾಗಿ ಟೀಕಿಸಿದ್ದಾರೆ. ಸ್ವತಃ ವಿಚ್ಛೇದಿತನಾಗಿದ್ದರೂ ಸಹ, ಸಂಗಾತಿಯ ವಿಷಯದಲ್ಲಿ ಇಂತಹ ಹಳೆಯ ಕಾಲದ ಮತ್ತು ಕಠಿಣ ನಿಬಂಧನೆಗಳನ್ನು ಹೇರುತ್ತಿರುವುದು ಆತನ ಕಪಟತನವನ್ನು ತೋರಿಸುತ್ತದೆ ಎಂದು ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಅರೇಂಜ್ಡ್ ಮ್ಯಾರೇಜ್ಗಳಲ್ಲಿ ಇಂತಹ ಬೇಡಿಕೆಗಳು ಸಾಮಾನ್ಯವಾಗಿದ್ದರೂ ಸಹ, ಈ ಘಟನೆಯು ಆಧುನಿಕ ಮ್ಯಾಚ್ಮೇಕಿಂಗ್ನಲ್ಲಿ ಲಿಂಗ ತಾರತಮ್ಯ, ಸಮಾನತೆ ಮತ್ತು ಬದಲಾಗುತ್ತಿರುವ ಸಂಬಂಧಗಳ ನಿರೀಕ್ಷೆಗಳ ಬಗ್ಗೆ ಒಂದು ವಿಶಾಲವಾದ ಚರ್ಚೆಗೆ ದಾರಿ ಮಾಡಿಕೊಟ್ಟಿದೆ, (ಏಜೆನ್ಸೀಸ್).