ರಾಹುಲ್ ಗಾಂಧಿ ಮುಂದೆ ಪ್ರಧಾನಿ ಮೋದಿ ಮಿಮಿಕ್ರಿ ಮಾಡಿ ವಿವಾದಕ್ಕೆ ಸಿಲುಕಿರುವ ಈ ಪುಲ್ಕಿತ್ ಮಣಿ ಯಾರು? ಈತನ ಹಿನ್ನೆಲೆ ಏನು? Pulkit Mani
- ರಾಹುಲ್ ಗಾಂಧಿ ಕಾರ್ಯಕ್ರಮದಲ್ಲಿ ಪ್ರಧಾನಿ ಮೋದಿ ಮಿಮಿಕ್ರಿ ಮಾಡಿ ವಿವಾದ ಸೃಷ್ಟಿಸಿದ ಪುಲ್ಕಿತ್ ಮಣಿ
- ಫ್ರೆಂಚ್ ಶಿಕ್ಷಕರಾಗಿ ಕೆಲಸ ಮಾಡಿ ಬಳಿಕ ಪೂರ್ಣಾವಧಿ ಸ್ಟ್ಯಾಂಡ್ ಅಪ್ ಕಾಮಿಡಿಯನ್ ಆದ ಪುಲ್ಕಿತ್
- ಮೋದಿ ಅವರ ವಿಶಿಷ್ಟ ಭಂಗಿಗಳು ಮತ್ತು ಮೈ ಫ್ರೆಂಡ್ ಶೈಲಿಯಿಂದ ಜನಪ್ರಿಯತೆ ಗಳಿಸಿದ ಹಾಸ್ಯನಟ
- ಇಂದೋರ್ ಕಾರ್ಯಕ್ರಮದಲ್ಲಿ ಮೋದಿ ಅನುಕರಣೆ ಕಂಡು ನಕ್ಕ ರಾಹುಲ್ ಗಾಂಧಿ ವಿರುದ್ಧ ಬಿಜೆಪಿ ಆಕ್ರೋಶ
ಭೋಪಾಲ್: ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ ಅವರ ಇಂದೋರ್‌ನ ‘ಛಾತ್ರೋನ್ ಕಿ ಗೂಂಜ್’ ಕಾರ್ಯಕ್ರಮದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಧ್ವನಿ ಮತ್ತು ಹಾವಭಾವಗಳನ್ನು ಅನುಕರಿಸಿ, ವಿಡಂಬನೆ ಮಾಡಿದ ಸ್ಟ್ಯಾಂಡ್-ಅಪ್ ಕಾಮಿಡಿಯನ್ ಪುಲ್ಕಿತ್ ಮಣಿ ( Pulkit Mani ) ಈಗ ರಾಜಕೀಯ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದು, ಈ ಘಟನೆಯು ಆಡಳಿತ ಮತ್ತು ವಿಪಕ್ಷಗಳ ನಡುವೆ ಹೊಸ ರಾಜಕೀಯ ಮಾತಿನ ಚಕಮಕಿಗೆ ಕಾರಣವಾಗಿದೆ.
ಅಂದಹಾಗೆ, ಪುಲ್ಕಿತ್ ಮಣಿ ಅವರನ್ನು ಆನ್‌ಲೈನ್‌ನಲ್ಲಿ 'ಹನಿ' ಅಥವಾ @hunnywhoisfunny ಎಂದೂ ಕರೆಯಲಾಗುತ್ತದೆ. ಈತ ಭಾರತೀಯ ಸ್ಟ್ಯಾಂಡ್-ಅಪ್ ಕಾಮಿಡಿಯನ್ ಹಾಗೂ ಡಿಜಿಟಲ್ ಕಂಟೆಂಟ್ ಕ್ರಿಯೇಟರ್ ಆಗಿದ್ದು, ಮುಖ್ಯವಾಗಿ ಮಿಮಿಕ್ರಿ, ವ್ಯಂಗ್ಯ ಮತ್ತು ಶಾರ್ಟ್-ಫಾರ್ಮ್ ಕಾಮಿಡಿ ವಿಡಿಯೋಗಳಿಗೆ ಹೆಸರುವಾಸಿಯಾಗಿದ್ದಾರೆ. 2021 ರಿಂದ ವೃತ್ತಿಪರರಾಗಿ ಸ್ಟ್ಯಾಂಡ್-ಅಪ್ ಪ್ರದರ್ಶನಗಳನ್ನು ನೀಡುತ್ತಾ ಬಂದಿರುವ ಮಣಿ, ಸಾಮಾಜಿಕ ಜಾಲತಾಣಗಳ ಮೂಲಕವೇ ಹೆಚ್ಚಿನ ಪ್ರೇಕ್ಷಕರನ್ನು ಸಂಪಾದಿಸಿಕೊಂಡಿದ್ದಾರೆ.
ಇವರ ಕಾಮಿಡಿಯು ಸಾರ್ವಜನಿಕ ವ್ಯಕ್ತಿಗಳ ಮಿಮಿಕ್ರಿ, ರಾಜಕೀಯ ಹಾಗೂ ಸಾಮಾಜಿಕ ವಿಡಂಬನೆಗಳ ಜತೆಗೆ ದೈನಂದಿನ ಜೀವನದ ವಿಚಾರಗಳನ್ನು ಒಳಗೊಂಡಿರುತ್ತದೆ. ಅದರಲ್ಲೂ ವಿಶೇಷವಾಗಿ ಪ್ರಧಾನಿ ನರೇಂದ್ರ ಮೋದಿ ಅವರ ಧ್ವನಿ ಮತ್ತು ಹಾವಭಾವಗಳನ್ನು ಅಚ್ಚುಕಟ್ಟಾಗಿ ಅನುಕರಿಸುವ ಮೂಲಕ ಇವರು ಹೆಚ್ಚು ಜನಮನ್ನಣೆ ಗಳಿಸಿದ್ದಾರೆ.
ಫ್ರೆಂಚ್ ಶಿಕ್ಷಕ
ಇನ್ನು ಪುಲ್ಕಿತ್ ಮಣಿ ಅವರು ಪೂರ್ಣಾವಧಿ ಹಾಸ್ಯನಟರಾಗುವ ಮೊದಲು ನೋಯ್ಡಾದ ಶಾಲೆಯೊಂದರಲ್ಲಿ ಫ್ರೆಂಚ್ ಶಿಕ್ಷಕರಾಗಿ ಕೆಲಸ ಮಾಡಿದ್ದರು ಹಾಗೂ ಅನುವಾದ ಕೆಲಸಗಳನ್ನೂ ಮಾಡಿದ್ದರು. ನಂತರದ ದಿನಗಳಲ್ಲಿ ಅವರು ಸಂಪೂರ್ಣವಾಗಿ ಸ್ಟ್ಯಾಂಡ್-ಅಪ್ ಕಾಮಿಡಿ ಮತ್ತು ಡಿಜಿಟಲ್ ಕಂಟೆಂಟ್ ಕಡೆಗೆ ವೃತ್ತಿಯನ್ನು ಬದಲಾಯಿಸಿಕೊಂಡು, ರಾಜಕೀಯ ಕಾಮೆಂಟ್ ಹಾಗೂ ಹಾಸ್ಯದ ಸಮ್ಮಿಶ್ರಣದ ವಿಶಿಷ್ಟ ಶೈಲಿಯನ್ನು ರೂಢಿಸಿಕೊಂಡರು.
ಪ್ರಧಾನಿ ಮೋದಿ ಅವರ ಮ್ಯಾನರಿಸಮ್ ಮತ್ತು ವಿದೇಶಿ ನಾಯಕರೊಂದಿಗಿನ ಒಡನಾಟದ ಶೈಲಿಯನ್ನು ಹಾಸ್ಯಮಯವಾಗಿ ಬಿಂಬಿಸುವ ವಿಡಿಯೋವೊಂದು 2026ರಲ್ಲಿ ವೈರಲ್ ಆದ ಬಳಿಕ ಪುಲ್ಕಿತ್ ಮಣಿ ಹೆಚ್ಚು ಬೆಳಕಿಗೆ ಬಂದರು. ಮೋದಿಯವರ ವಿಶಿಷ್ಟ ಭಂಗಿಗಳು, ನಗು, ಕೈಯ ಸನ್ನೆಗಳು, ವಿದೇಶಿ ನಾಯಕರೊಂದಿಗೆ ಅಪ್ಪಿಕೊಳ್ಳುವ ದೃಶ್ಯಗಳು ಮತ್ತು 'ಮೈ ಫ್ರೆಂಡ್' ಪದದ ಅನುಕರಣೆಯನ್ನು ತಮ್ಮ ವಿಡಿಯೋದಲ್ಲಿ ಆಗಾಗ ಪ್ರದರ್ಶಿಸುತ್ತಿರುತ್ತಾರೆ.
ರಾಹುಲ್ ಗಾಂಧಿ ಅವರ 'ಛಾತ್ರೋನ್ ಕಿ ಗೂಂಜ್' ಕಾರ್ಯಕ್ರಮದಲ್ಲಿ ಮಣಿ ಅವರು ಮತ್ತೊಮ್ಮೆ ಮೋದಿ ಅವರ ಶೈಲಿಯನ್ನು ಅನುಕರಿಸಿ ಪ್ರದರ್ಶನ ನೀಡಿದರು. ಈ ವೇಳೆ ರಾಹುಲ್ ಗಾಂಧಿ ನಗುತ್ತಾ ಮಣಿಯವರೊಂದಿಗೆ ಸಂವಾದ ನಡೆಸುತ್ತಿರುವ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ. ಆದರೆ, ಇದು ಬಿಜೆಪಿ ನಾಯಕರ ತೀವ್ರ ಟೀಕೆಗೂ ಗುರಿಯಾಗಿದ್ದು, ಪ್ರಧಾನಿ ಹಾಗೂ ಹಿರಿಯ ಮಹಿಳೆಯೊಬ್ಬರಿಗೆ ಅಗೌರವ ತೋರಲಾಗಿದೆ ಎಂದು ಬಿಜೆಪಿ ವಕ್ತಾರ ಸಿ.ಆರ್. ಕೇಶವನ್ ಸೇರಿದಂತೆ ಹಲವು ನಾಯಕರು ಆಕ್ಷೇಪ ವ್ಯಕ್ತಪಡಿಸಿದರು.
ಮಣಿ ಅವರು ಕೇವಲ ಸಾಮಾಜಿಕ ಜಾಲತಾಣದ ತುಣುಕುಗಳಿಗೆ ಸೀಮಿತವಾಗದೆ, 2026ರ ಫೆಬ್ರವರಿಯಲ್ಲಿ ಯೂಟ್ಯೂಬ್‌ನಲ್ಲಿ ಬಿಡುಗಡೆಯಾದ ತಮ್ಮ 'ರಾ ಹನಿ' ಎಂಬ ಸ್ಟ್ಯಾಂಡ್-ಅಪ್ ಸ್ಪೆಷಲ್ ಮೂಲಕವೂ ದೊಡ್ಡ ಪ್ರೇಕ್ಷಕ ವರ್ಗವನ್ನು ಸೃಷ್ಟಿಸಿಕೊಂಡಿದ್ದಾರೆ. ಲೈವ್ ಶೋಗಳ ಜೊತೆಗೆ ಇನ್‌ಸ್ಟಾಗ್ರಾಮ್ ಮತ್ತು ಯೂಟ್ಯೂಬ್ ಮೂಲಕ ತಮ್ಮ ಕಲಾ ಪ್ರದರ್ಶನವನ್ನು ಮುಂದುವರಿಸಿಕೊಂಡು ಹೋಗುತ್ತಿದ್ದಾರೆ, (ಏಜೆನ್ಸೀಸ್).