ಅಭಿಜಿತ್ ದೀಪ್ಕೆ ವಿರುದ್ಧ ಕೇಂದ್ರ ಸಚಿವ ಕಿರಣ್ ರಿಜುಜು ತೀವ್ರ ವಾಗ್ದಾಳಿ
- ಅವನ್ಯಾವ ವಿದ್ಯಾರ್ಥಿ ನಾಯಕ? ಅವನೊಬ್ಬ ಆಮ್ ಆದ್ಮಿ ಪಕ್ಷದ ಕಾರ್ಯಕರ್ತ!
- ಜಂತರ್-ಮಂತರ್ನಲ್ಲಿ ನಡೆದಿದ್ದ ನೀಟ್ ವಿರೋಧಿ ಪ್ರತಿಭಟನೆಗೆ ಸಂಸದರ ಪ್ರತಿಕ್ರಿಯೆ
- ಅಭಿಜಿತ್ ದೀಪ್ಕೆ ವಿರುದ್ಧ ಕೇಂದ್ರ ಸಚಿವ ಕಿರಣ್ ರಿಜುಜು ತೀವ್ರ ವಾಗ್ದಾಳಿ
ನವದೆಹಲಿ: ಕಳೆದ ಕೆಲ ದಿನಗಳ ಹಿಂದೆ ನೀಟ್ ಪರೀಕ್ಷೆಯಲ್ಲಿ ನಡೆದ ಅಕ್ರಮವನ್ನು ವಿರೋಧಿಸಿ ಕಾಕ್ರೋಚ್ ಜನತಾ ಪಾರ್ಟಿ ನೇತೃತ್ವದಲ್ಲಿ ದೆಹಲಿಯ ಜಂತರ್-ಮಂತರ್ನಲ್ಲಿ ಪ್ರತಿಭಟನೆ ನಡೆದಿತ್ತು.
ಸಿಜೆಪಿ ಸ್ಥಾಪಕ ಅಭಿಜಿತ್ ದೀಪ್ಕೆ ನಾಯಕತ್ವದಲ್ಲಿ ಈ ಹೋರಾಟ ನಡೆದಿದ್ದು, ಕೇಂದ್ರ ಸರ್ಕಾರ ಈ ಪ್ರತಿಭಟೆನೆಗೆ ಬೆಲೆಕೊಟ್ಟು ಪರೀಕ್ಷೆಯಲ್ಲಿ ಅನೇಕ ಬದಲಾವಣೆಯನ್ನು ತಂದಿದೆ.
ಈಗ ಈ ಪ್ರತಿಭಟನೆ ಹಾಗೂ ಅಭಿಜಿತ್ ದೀಪ್ಕೆ ಬಗ್ಗೆ ಕೇಂದ್ರ ಸಂಸದೀಯ ಸಚಿವ ಕಿರಣ್ ರಿಜುಜು (Kiren Rijiju on Abhijeet Dipke) ವ್ಯಕ್ತ ಪಡಿಸಿರುವ ಅಭಿಪ್ರಾಯ ಈಗ ಎಲ್ಲಡೆ ವೈರಲ್ ಆಗುತ್ತಿದೆ.
ಅವನು ವಿದ್ಯಾರ್ಥಿ ನಾಯಕನೇ ಅಲ್ಲ!
ಇತ್ತೀಚೆಗೆ ಖಾಸಗಿ ಮಾಧ್ಯಮ ಸಂಸ್ಥೆಯೊಂದಿಗೆ ಜಂತರ್-ಮಂತರ್ನಲ್ಲಿ ನಡೆದ ಪ್ರತಿಭಟನೆ ಬಗ್ಗೆ ಮಾತನಾಡಿರುವ ಸಂಸದ ಕಿರಣ್ ರಿಜುಜು, ಆ ಅಭಿಜಿತ್ ದೀಪ್ಕೆ ವಿದ್ಯಾರ್ಥಿಯೇ ಅಲ್ಲ, ಅವನೊಬ್ಬ ಆಪ್ ಆದ್ಮಿ ಪಕ್ಷದ ಕಾರ್ಯಕರ್ತ ಎಂದು ವಾಗ್ದಾಳಿ ನಡೆಸಿದ್ದಾರೆ.
ವಿದ್ಯಾರ್ಥಿಗಳ ಸಮಸ್ಯೆಗಳ ಕುರಿತು ಪ್ರಶ್ನೆ ಮಾಡುವುದು, ಹೋರಾಟ ಮಾಡುವುದು ತಪ್ಪಲ್ಲ. ಆದರೆ ಈ ಅಭಿಜಿತ್ ದೀಪ್ಕೆ ವಿದ್ಯಾರ್ಥಿ ನಾಯಕ ಎಂದು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ ಎಂದಿದ್ದಾರೆ.
ಅವನು ಹುಟ್ಟಿದ್ದು ಮಹಾರಾಷ್ಟ್ರದಲ್ಲಿ, ವಿದ್ಯಭ್ಯಾಸ ಮಾಡಿದ್ದು ಅಮೆರಿಕದಲ್ಲಿ, ಈಗ ಹೋರಾಟ ಮಾಡಿದ್ದು ದೆಹಲಿಯಲ್ಲಿ. ಅವನು ಕೇವಲ ಆಮ್ ಆದ್ಮಿ ಕಾರ್ಯಕರ್ತ, ಅದನ್ನು ಬಿಟ್ಟು ಅವನನ್ನು ವಿದ್ಯಾರ್ಥಿ ನಾಯಕ ಎಂದೆಲ್ಲಾ ಸಂಬೋಧಿಸುವುದು ಸರಿಯಲ್ಲ ಎಂದಿದ್ದಾರೆ.
AAP ಪ್ರಾಯೋಜಿತ ಪ್ರತಿಭಟನೆ!
ಜಂತರ್-ಮಂತರ್ನಲ್ಲಿ ಮೊದಲು ವಿದ್ಯಾರ್ಥಿಗಳೇ ಪ್ರತಿಭಟನೆ ಮಾಡುತ್ತಿದ್ದರು. ನಂತರ ಈ ಬಳಗಕ್ಕೆ ಕೆಲ ದೇಶವಿರೋಧಿ ಶಕ್ತಿಗಳು ಸೇರಿಕೊಂಡವು. ನಂತರ ಈ ಪ್ರತಿಭಟನೆಯನ್ನು ಆಮ್ ಆದ್ಮಿ ಪಕ್ಷ ಹೈಜಾಕ್ ಮಾಡಿಕೊಂಡಿತು.
ಪ್ರತಿಭಟನಾ ವೇದಿಕೆಯನ್ನೇರಿ, ಪ್ರಧಾನಿಗಳಿಗೆ, ಅವರ ಕುಟುಂಬ ವರ್ಗದವರಿಗೆ ಬೈಯುತ್ತಾ, ದೇಶ ವಿಭಜಕ ಶಕ್ತಿಗಳಿಗೆ ಜೈಕಾರ ಹಾಕಲಾಯಿತು. ಆದರೆ ಬಿಜೆಪಿ ಜೆನ್-ಜೀಗಳ ಆವೇಗ ಮತ್ತು ಆಕ್ರೋಶವನ್ನು ಅರಿಯುವಲ್ಲಿ ಸಫಲವಾದ ಹಿನ್ನಲೆ, ಮಾತುಕತೆ ಮೂಲಕ ಪರಿಹಾರ ಕಂಡುಕೊಂಡಿದ್ದೆವೆ ಎಂದು ರಿಜುಜು ತಿಳಿಸಿದ್ದಾರೆ,
(ಏಜನ್ಸೀಸ್).