ನಮಗೆ ಬೇಕಿರುವುದು ಒಗ್ಗಟ್ಟಿನ ಭಾರತವೇ ಹೊರತು, ಏಕರೂಪದ ಭಾರತವಲ್ಲ: ಗಣರಾಜ್ಯೋತ್ಸವದಂದು ಎಂ.ಕೆ ಸ್ಟಾಲಿನ್ ಕರೆ | M.K Stalin

ಈ ಬಗ್ಗೆ ಸೋಮವಾರ (ಜ.26) ನಡೆದ ಗಣರಾಜ್ಯೋತ್ಸವ ಸಮಾರಂಭದಲ್ಲಿ ಮಾತನಾಡಿದ ಸ್ಟಾಲಿನ್​, ಭಾರತವು ಕೇವಲ ಒಂದು ಭೂಪ್ರದೇಶವಲ್ಲ, ಅದು ವಿವಿಧ ಭಾಷೆಗಳು, ಸಂಸ್ಕೃತಿಗಳು ಮತ್ತು ಸಂಪ್ರದಾಯಗಳ ಸಂಗಮವಾಗಿದೆ. ನಮ್ಮ ಸಂವಿಧಾನವು ನಮಗೆ ನೀಡಿದ ಅತಿದೊಡ್ಡ ಉಡುಗೊರೆ ಎಂದರೆ ಅದು ವೈವಿಧ್ಯತೆಯಲ್ಲಿನ ಏಕತೆ ಎಂದು ಪ್ರತಿಪಾದಿಸಿದ್ದಾರೆ. 

ಇಂದು ನಾವು ಆಚರಿಸುತ್ತಿರುವುದು ಒಂದು ಒಗ್ಗೂಡಿದ ಭಾರತವನ್ನು ಆದರೆ, ಈ ಒಗ್ಗಟ್ಟನ್ನು ಏಕರೂಪತೆ ಎಂದು ತಪ್ಪಾಗಿ ಅರ್ಥೈಸಬಾರದು. ಭಾರತವು ವಿಭಿನ್ನ ಆಚರಣೆಗಳನ್ನು ಹೊಂದಿರುವ ದೇಶವಾಗಿದೆ. ಇಲ್ಲಿ ಪ್ರತಿಯೊಂದು ರಾಜ್ಯಕ್ಕೂ ತನ್ನದೇ ಆದ ಘನತೆ ಮತ್ತು ಗುರುತಿದೆ. ನಾವು ಭಾರತೀಯರೆಂದು ಒಂದಾಗೋಣ, ಆದರೆ ನಮ್ಮ ವೈವಿಧ್ಯತೆಯನ್ನು ಅಳಿಸಿಹಾಕುವ ಪ್ರಯತ್ನಗಳಿಗೆ ಅವಕಾಶ ನೀಡಬಾರದು ಎಂದು ಸ್ಟಾಲಿನ್​ ಹೇಳಿದ್ದಾರೆ. 

ನಮ್ಮ ಸಂವಿಧಾನವು ಯಾವುದೇ ಒಂದು ಭಾಷೆಯನ್ನು ಮಾತ್ರ ದೇಶದ ಗುರುತಾಗಿ ಬಿಂಬಿಸಿಲ್ಲ. ತಮಿಳು, ಕನ್ನಡ, ಮಲಯಾಳಂ, ಬಂಗಾಳಿ ಹೀಗೆ ಪ್ರತಿಯೊಂದು ಭಾಷೆಯೂ ಈ ರಾಷ್ಟ್ರದ ಆತ್ಮವಾಗಿವೆ. ಒಂದು ಭಾಷೆಯನ್ನು ಇನ್ನೊಂದರ ಮೇಲೆ ಹೇರುವುದು ಸಂವಿಧಾನದ ಆಶಯಕ್ಕೆ ವಿರುದ್ಧವಾದುದು. ಭಾಷೆಗಳು ಪರಸ್ಪರ ಗೌರವದಿಂದ ಸಹಬಾಳ್ವೆ ನಡೆಸಿದಾಗ ಮಾತ್ರ ಭಾರತವು ನಿಜವಾದ ಅರ್ಥದಲ್ಲಿ ಅಭಿವೃದ್ಧಿ ಹೊಂದಲು ಸಾಧ್ಯ ಎಂದು ತಮಿಳುನಾಡು ಸಿಎಂ ಸ್ಪಷ್ಟಪಡಿಸಿದ್ದಾರೆ.

ಭಾರತವು ರಾಜ್ಯಗಳ ಒಂದು ಒಕ್ಕೂಟವಾಗಿದೆ. ರಾಜ್ಯಗಳು ಬಲವಾಗಿದ್ದಾಗ ಮಾತ್ರ ದೇಶವು ಬಲಗೊಳ್ಳುತ್ತದೆ. ಅಧಿಕಾರವು ಒಂದೇ ಕಡೆ ಕೇಂದ್ರೀಕೃತವಾಗಬಾರದು. ಶಿಕ್ಷಣ, ಹಣಕಾಸು ಮತ್ತು ಸಾಂಸ್ಕೃತಿಕ ನಿರ್ಧಾರಗಳಲ್ಲಿ ರಾಜ್ಯಗಳ ಸ್ವಾಯತ್ತತೆಯನ್ನು ಗೌರವಿಸುವುದು ಕೇಂದ್ರ ಸರ್ಕಾರದ ಕರ್ತವ್ಯವಾಗಿದೆ. ನಾವು ಭಿನ್ನಾಭಿಪ್ರಾಯಗಳ ನಡುವೆಯೂ ಪರಸ್ಪರ ಸಹಕಾರದಿಂದ ಮುನ್ನಡೆಯಬೇಕಿದೆ ಎಂದು ಈ ಸಂದರ್ಭದಲ್ಲಿ ತಿಳಿಸಿದ್ದಾರೆ. 

ಇಂದಿನ ಕಾಲಘಟ್ಟದಲ್ಲಿ ಸಂವಿಧಾನದ ಮೌಲ್ಯಗಳನ್ನು ಎತ್ತಿಹಿಡಿಯುವುದು ಅತ್ಯಂತ ಅವಶ್ಯಕವಾಗಿದೆ. ಪ್ರಜಾಪ್ರಭುತ್ವದ ಅಡಿಪಾಯವೇ ಸಮಾನತೆ ಮತ್ತು ಭ್ರಾತೃತ್ವವಾಗಿದ್ದು. ಯಾವುದೇ ಧರ್ಮ, ಜಾತಿ ಅಥವಾ ಭಾಷೆಯ ಆಧಾರದ ಮೇಲೆ ತಾರತಮ್ಯ ಮಾಡದೆ, ಎಲ್ಲರನ್ನೂ ಒಳಗೊಳ್ಳುವ ದ್ರಾವಿಡ ಮಾದರಿಯ ಆಡಳಿತವೇ ನಮ್ಮ ಗುರಿ ಎಂದು ಸ್ಟಾಲಿನ್​ ಹೇಳಿದ್ದಾರೆ.

ಬಿಜೆಪಿ ನೇತೃತ್ವದ ಕೇಂದ್ರ ಸರ್ಕಾರದ ಹೆಸರನ್ನು ನೇರವಾಗಿ ಉಲ್ಲೇಖಿಸದಿದ್ದರೂ, ಸ್ಟಾಲಿನ್ ಅವರ ಮಾತುಗಳು ಕೇಂದ್ರದ ನೀತಿಗಳ ವಿರುದ್ಧದ ಟೀಕೆಯಾಗಿ ಕಂಡುಬಂದವು. ಹಿಂದಿ ಹೇರಿಕೆ, ಶಿಕ್ಷಣ ಮತ್ತು ಹಣಕಾಸಿನ ಅಧಿಕಾರಗಳ ಕೇಂದ್ರೀಕರಣದಂತಹ ವಿಷಯಗಳ ವಿರುದ್ಧ ಡಿಎಂಕೆ ಸರ್ಕಾರ ನಿರಂತರವಾಗಿ ಧ್ವನಿ ಎತ್ತುತ್ತಾ ಬಂದಿದೆ. ಈ ಹಿನ್ನೆಲೆಯಲ್ಲಿ, ಒಗ್ಗೂಡಿದ ಭಾರತ ಎಂಬ ಅವರ ಪರಿಕಲ್ಪನೆಯು ರಾಜ್ಯಗಳ ಸ್ವಾಯತ್ತತೆ ಮತ್ತು ಸಾಂಸ್ಕೃತಿಕ ಪರಂಪರೆಯನ್ನು ಎತ್ತಿ ಹಿಡಿಯುವ ಪ್ರಯತ್ನವಾಗಿದೆ,(ಏಜೆನ್ಸೀಸ್).