ಅಫ್ಘಾನ್ ಬ್ಯಾಟರ್‌ಗಳಿಗೆ ಸುತಾರ್ ಸ್ಪಿನ್’ ಶಾಕ್! ಚೊಚ್ಚಲ ಟೆಸ್ಟ್ ಇನ್ನಿಂಗ್ಸ್‌ನಲ್ಲೇ 6 ವಿಕೆಟ್ ಕಿತ್ತ ಭಾರತದ ಯುವ ಸ್ಪಿನ್ನರ್! Manav Suthar

ಈ ಶತಮಾನದಲ್ಲಿ ಭಾರತದ ಪರ ಪದಾರ್ಪಣೆಯ ಟೆಸ್ಟ್ ಇನ್ನಿಂಗ್ಸ್‌ನಲ್ಲೇ 5 ಕ್ಕೂ ಹೆಚ್ಚು ವಿಕೆಟ್ ಪಡೆದ ಎರಡನೇ ಭಾರತೀಯ ಬೌಲರ್ ಎಂಬ ಅಪರೂಪದ ಹೆಗ್ಗಳಿಕೆಗೆ ಮಾನವ್ ಸುತಾರ್ ಪಾತ್ರರಾಗಿದ್ದಾರೆ. ಇವರ ಈ ಸ್ಮರಣೀಯ ಪ್ರದರ್ಶನದ ನೆರವೇರಿಕೆಯಿಂದಾಗಿ ಭಾರತ ತಂಡವು ಅಫ್ಘಾನಿಸ್ತಾನದ ವಿರುದ್ಧ ಭಾರಿ ಲೀಡ್ ಸಾಧಿಸಿ, ಫಾಲೋ-ಆನ್ ಹೇರುವಲ್ಲಿ ಯಶಸ್ವಿಯಾಗಿದೆ.

ರಾಜಸ್ಥಾನದ ಶ್ರೀ ಗಂಗಾನಗರ ಮೂಲದವರಾದ ಈ ಯುವ ಸ್ಪಿನ್ನರ್, ತಮ್ಮ ಮೊದಲ ಪಂದ್ಯದಲ್ಲೇ ಅನುಭವಿ ಬೌಲರ್‌ನಂತೆ ಕರಾರುವಾಕ್ ದಾಳಿ ಸಂಘಟಿಸಿದ್ದಾರೆ. ಅಫ್ಘಾನ್​ ಪರ ಒಂಟಿ ಹೋರಾಟ ನಡೆಸಿ 60 ರನ್ ಗಳಿಸಿದ್ದ ರಹಮತ್ ಶಾ ಅವರನ್ನು ಅದ್ಭುತ ತಿರುವಿನ ಮೂಲಕ LBW ಬಲೆಯಲ್ಲಿ ಸಿಲುಕಿಸಿದ ಸುತಾರ್, ತಮ್ಮ ಚೊಚ್ಚಲ 5 ವಿಕೆಟ್‌ಗಳ ಸಾಧನೆ ಮಾಡಿದರು. ಅದಾದ ಬೆನ್ನಲ್ಲೇ ಸಲೀಂ ಸಫಿ ಅವರ ವಿಕೆಟ್ ಕೂಡ ಪಡೆದು ಒಟ್ಟು 6/33 ರನ್ ದಾಖಲಿಸಿದರು. ಪಿಚ್‌ನಿಂದ ಸಿಕ್ಕ ತಿರುವು ಮತ್ತು ಪುಟಿತವನ್ನು ಸರಿಯಾಗಿ ಬಳಸಿಕೊಂಡ ಮಾನವ್ ದಾಳಿಗೆ ಅಫ್ಘಾನ್ ಬ್ಯಾಟಿಂಗ್ ಲೈನ್-ಅಪ್ ಸಂಪೂರ್ಣವಾಗಿ ತತ್ತರಿಸಿತು.

ಕೇವಲ ಬೌಲಿಂಗ್ ಮಾತ್ರವಲ್ಲದೆ, ಭಾರತದ ಮೊದಲ ಇನ್ನಿಂಗ್ಸ್‌ನಲ್ಲಿ ಕೆಳ ಕ್ರಮಾಂಕದಲ್ಲಿ ಬ್ಯಾಟಿಂಗ್‌ಗೆ ಇಳಿದಿದ್ದ ಮಾನವ್ ಸುತಾರ್ ಅತ್ಯಂತ ಉಪಯುಕ್ತ 28 ರನ್ ಕೊಡುಗೆ ನೀಡಿದ್ದರು. ಈ ಮೂಲಕ ಆಲ್-ರೌಂಡ್ ಪ್ರದರ್ಶನ ನೀಡಿ ತಂಡದ ಗೆಲುವಿಗೆ ಭದ್ರ ಬುನಾದಿ ಹಾಕಿದ್ದಾರೆ.

ಭಾರತದ ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲೇ ಪದಾರ್ಪಣೆಯ ಪಂದ್ಯದ ಇನ್ನಿಂಗ್ಸ್ ಒಂದರಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ ಬೌಲರ್‌ಗಳ ಪಟ್ಟಿಯಲ್ಲಿ ಮಾನವ್ ಸುತಾರ್ ಈಗ ಮೂರನೇ ಸ್ಥಾನಕ್ಕೇರಿದ್ದಾರೆ. 1988 ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಚೆನ್ನೈನಲ್ಲಿ ನಡೆದ ಪಂದ್ಯದ ಎರಡೂ ಇನ್ನಿಂಗ್ಸ್‌ಗಳಲ್ಲಿ 8 ವಿಕೆಟ್ (8/61 ಮತ್ತು 8/75) ಕಿತ್ತಿದ್ದ ನರೇಂದ್ರ ಹಿರ್ವಾನಿ ಅವರ ದಾಖಲೆ ಇಂದಿಗೂ ಮೊದಲ ಸ್ಥಾನದಲ್ಲಿದೆ. ಆ ನಂತರದ ಅತ್ಯುತ್ತಮ ಪ್ರದರ್ಶನ ಮಾನವ್ ಅವರದ್ದಾಗಿದೆ.

ಭಾರತೀಯ ಟೆಸ್ಟ್ ತಂಡದಲ್ಲಿ ಈಗಾಗಲೇ ರವೀಂದ್ರ ಜಡೇಜಾ ಮತ್ತು ಅಕ್ಷರ್ ಪಟೇಲ್ ಅವರಂತಹ ವಿಶ್ವದರ್ಜೆಯ ಸ್ಪಿನ್ನರ್‌ಗಳಿದ್ದಾರೆ. ಈಗ ಅವರ ಸಾಲಿಗೆ ಕೇವಲ 2026 ರ ಸರಣಿಯಲ್ಲಿ ಅದ್ಭುತ ಎಂಟ್ರಿ ಕೊಟ್ಟಿರುವ ಮಾನವ್ ಸುತಾರ್, ತಮ್ಮ ಚೊಚ್ಚಲ ಪಂದ್ಯದಲ್ಲೇ ಮ್ಯಾಚ್ ವಿನ್ನಿಂಗ್ ಪ್ರದರ್ಶನ ನೀಡಿ ಆಯ್ಕೆ ಸಮಿತಿಗೆ ಹೊಸ ತಲೆನೋವು ತಂದಿಟ್ಟಿದ್ದಾರೆ. ಭಾರತ ತಂಡವು ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸಿದ್ದು, ಜಯದ ಸನಿಹದಲ್ಲಿದೆ,(ಏಜೆನ್ಸೀಸ್​).