ಗುವಾಹಟಿ: ಮಿಜೋರಾಂನಿಂದ ಕೋಲ್ಕತ್ತಾದತ್ತ ಪ್ರಯಾಣ ಬೆಳೆಸಿದ್ದ ಕೋಲ್ಕತ್ತಾ-ಸೈರಾಂಗ್ ಎಕ್ಸ್ಪ್ರೆಸ್ ರೈಲಿನ ಸುಮಾರು ಏಳು ಬೋಗಿಗಳು, ಅಸ್ಸಾಂನ ಗುವಾಹಟಿ ಹೊರವಲಯದಲ್ಲಿ ಹಳಿತಪ್ಪಿದ ಪರಿಣಾಮ ಹಲವು ಪ್ರಯಾಣಿಕರು ಗಾಯಗೊಂಡ ಘಟನೆ ವರದಿಯಾಗಿದೆ. ಅಪಘಾತಕ್ಕೂ ಮೊದಲು ಲೋಕೋ ಮೊಟೀವ್ನಲ್ಲಿ ಕ್ಯಾಬಿನ್ನಲ್ಲಿ ಲೋಕೋ ಪೈಲಟ್ ಮಾತನಾಡಿರುವ ವಿಡಿಯೋ ಸೆರೆಯಾಗಿದ್ದು, ಈಗ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.
ಈ ಘಟನೆಯೂ ನವೆಂಬರ್ 11 ರಂದು ಬೆಳಿಗ್ಗೆ 7 ಗಂಟೆ ಸಮಯಕ್ಕೆ ನಡೆದಿದೆ ಎನ್ನಲಾಗಿದೆ. ಸೋಷಿಯಲ್ ಮೀಡಿಯಾನಲ್ಲಿ ಹಂಚಿಕೆಯಾಗುತ್ತಿರುವ ವಿಡಿಯೋನಲ್ಲಿ, ರೈಲಿನ ಡ್ರೈವರ್, ಅಂದರೆ ಲೋಕೋ ಪೈಲಟ್, "ಸರ್, ಮುಂದೆ ರೆಡ್ ಲೈಟ್ ಆನ್ ಇದೆ.. ಎಮರ್ಜೆನ್ಸಿ ಇದೆ. ಆದರೆ ಏನೂ ಕೆಲಸ ಮಾಡುತ್ತಿಲ್ಲ, ಏನೂ ಸರಿಯಾಗಿ ವರ್ತಿಸುತ್ತಿಲ್ಲ" ಎಂದು ಲೋಕೋ ಪೈಲಟ್ ರೈಲ್ವೆ ನಿಯಂತ್ರಣ ಮಂಡಲಿಗೆ ತಿಳಿಸಿದ್ದಾರೆ.
ಈ ಸಂಭಾಷಣೆ ನಡೆದ ಕೆಲವೇ ನಿಮಿಷದಲ್ಲಿ ರೈಲು ಬ್ಯಾರಿಕೇಡ್ಗೆ ಢಿಕ್ಕಿ ಹೊಡೆದಿದ್ದು, ಹಳಿ ತಪ್ಪಿದ ರೈಲು ನೆಲಕ್ಕುರಳಿದೆ. ಕೆಲ ಪ್ರಯಾಣಿಕರಿಗೆ ಗಂಭೀರ ಗಾಯವಾಗಿದ್ದರೂ, ಯಾವುದೇ ಪ್ರಾಣ ಹಾನಿ ಬಗ್ಗೆ ವರದಿಯಾಗಿಲ್ಲ.
ವೈರಲ್ ವಿಡಿಯೋ ಪ್ರಕಾರ, ನಿಲ್ದಾಣದಲ್ಲಿ ರೆಡ್ ಲೈಟ್ ಆನ್ ಇದ್ದ ಕಾರಣ ಲೋಕೋ ಪೈಲಟ್, ರೈಲನ್ನು ನಿಲ್ಲಿಸಲು ಎಮರ್ಜೆನ್ಸಿ ಸಿಸ್ಟಮ್ ಆನ್ ಮಾಡಿದ್ದಾನೆ. ಆದರೆ ಈ ಎಮರ್ಜೆನ್ಸಿ ಸಿಸ್ಟಮ್ ಸರಿಯಾಗಿ ಕೆಲಸ ಮಾಡದ ಕಾರಣ, ಬ್ರೇಕಿಂಗ್ ಫೇಲ್ ಆಗಿದೆ. ಹೀಗಾಗಿ ರೈಲು ಹಳಿ ತಪ್ಪಿದೆ ಎಂದು ಹೇಳಲಾಗುತ್ತಿದೆ.
ಆದರೆ, ಈ ಘಟನೆ ನಿಖರವಾಗಿ ಹೀಗೇ ನಡೆದಿದೆ ಎಂದು ಇಲ್ಲಿವರೆಗೆ ತಿಳಿದು ಬಂದಿಲ್ಲ. ರೈಲ್ವೆ ಇಲಾಖೆ ಈ ಕುರಿತು ಉನ್ನತ ಮಟ್ಟದ ತನಿಖೆ ನಡೆಸುತ್ತಿದ್ದು, ನಂತರದ ದಿನಗಳಲ್ಲಿ ಸ್ಪಷ್ಟ ಕಾರಣ ತಿಳಿದು ಬರಲಿದೆ. ವಿಡಿಯೋನಲ್ಲಿ ಲೋಕೋ ಪೈಲಟ್ ಹೇಳಿದಂತೆ, ಎಮರ್ಜೆನ್ಸಿ ಸಿಸ್ಟಮ್ ಕೆಲಸ ಮಾಡಿಲ್ಲ ಎಂದರೆ, ಏಕೆ ಮಾಡಿಲ್ಲ? ಅವರಲ್ಲಿ ಏನು ಸಮಸ್ಯೆ ಯಾಗಿತ್ತು? ಅದನ್ನು ಹೇಗೆ ಅಭಿವೃದ್ಧಿ ಪಡಿಸಬಹುದು? ಎಂಬೆಲ್ಲಾ ಪ್ರಶ್ನೆಗಳಿಗೆ ತನಿಖೆ ನಂತರವೇ ಉತ್ತರ ದೊರಕಬೇಕಿದೆ, (ಏಜೆನ್ಸೀಸ್).