ರಷ್ಯಾ ಅಧ್ಯಕ್ಷರ ಮೇಲೆ ಒತ್ತಡ ಹೇರಬಲ್ಲ ನಾಯಕ ಮೋದಿ!...ಜಾಗತಿಕ ಶಾಂತಿ ಸ್ಥಾಪನೆಯಲ್ಲಿ ಭಾರತದ್ದು ಪ್ರಮುಖ ಪಾತ್ರ ಎಂದ ಪೋಲೆಂಡ್ ಸಚಿವ | Wladyslaw Teofil Bartoszewski

2022ರ ಕೊನೆಯಲ್ಲಿ ನಡೆದ ಬೆಳವಣಿಗೆಗಳನ್ನು ಉಲ್ಲೇಖಿಸಿದ ಬಾರ್ಟೋಸ್ಜೆವ್ಸ್ಕಿ, ಯುದ್ಧದ ಸಮಯದಲ್ಲಿ ರಷ್ಯಾ ತಾಂತ್ರಿಕ ಪರಮಾಣು ಅಸ್ತ್ರಗಳನ್ನು ಬಳಸದಂತೆ ಮನವೊಲಿಸುವಲ್ಲಿ ಪ್ರಧಾನಿ ಮೋದಿ ಪ್ರಮುಖ ಪಾತ್ರ ವಹಿಸಿದ್ದರು ಎಂದು ಪ್ರತಿಪಾದಿಸಿದರು.

ಸುದ್ದಿ ಸಂಸ್ಥೆ ಎಎನ್‌ಐ ಜೊತೆ ಮಾತನಾಡಿದ ಬಾರ್ಟೋಸ್ಜೆವ್ಸ್ಕಿ, ರಷ್ಯಾದೊಂದಿಗೆ ಭಾರತ ಹೊಂದಿರುವ ದಶಕಗಳಷ್ಟು ಹಳೆಯ ಬಾಂಧವ್ಯವು ಭಾರತಕ್ಕೆ ವಿಶೇಷ ಸ್ಥಾನಮಾನವನ್ನು ತಂದುಕೊಟ್ಟಿದೆ ಎಂದಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಜಾಗತಿಕ ಮಟ್ಟದಲ್ಲಿ ಅತ್ಯಂತ ಪ್ರಸಿದ್ಧ ಮತ್ತು ಗೌರವಾನ್ವಿತ ರಾಜಕಾರಣಿ. ಭಾರತವು ಅಲಿಪ್ತ ನೀತಿಯನ್ನು ಅನುಸರಿಸಿಕೊಂಡು ರಷ್ಯಾದ ಒಕ್ಕೂಟ ಹಾಗೂ ಅದಕ್ಕೂ ಮೊದಲು ಸೋವಿಯತ್ ಒಕ್ಕೂಟದೊಂದಿಗೆ ದೀರ್ಘಕಾಲದ ಬಾಂಧವ್ಯವನ್ನು ಹೊಂದಿದೆ. ಅಧ್ಯಕ್ಷ ಪುಟಿನ್ ಅವರು ಪ್ರಧಾನಿ ಮೋದಿ ಹೇಳುವ ಮಾತುಗಳಿಗೆ ನಿಜವಾಗಿಯೂ ಆದ್ಯತೆ ಮತ್ತು ಗಮನ ನೀಡುತ್ತಾರೆ, ಈ ಸಂಘರ್ಷವನ್ನು ತಡೆದು ಶಾಂತಿ ಸ್ಥಾಪಿಸಲು ಭಾರತವು ಖಂಡಿತವಾಗಿಯೂ ಸಹಾಯ ಮಾಡಬಹುದಾದ ವಿಚಾರ ಇದಾಗಿದೆ ಎಂದು ಅವರು ಹೇಳಿದರು.

ಮಾಸ್ಕೋ (ರಷ್ಯಾ) ಜೊತೆಗಿನ ಸಂವಹನ ಮತ್ತು ಮಾತುಕತೆಗಳು ದಿನದಿಂದ ದಿನಕ್ಕೆ ಕಷ್ಟಕರವಾಗುತ್ತಿರುವ ಈ ಸಮಯದಲ್ಲಿ, ರಷ್ಯಾ ಅಧ್ಯಕ್ಷರ ಮೇಲೆ ಪ್ರಭಾವ ಬೀರಬಲ್ಲ ಕೆಲವೇ ಕೆಲವು ನಾಯಕರಲ್ಲಿ ಪ್ರಧಾನಿ ಮೋದಿ ಒಬ್ಬರು ಎಂದು ಪೋಲಿಷ್ ಸಚಿವರು ಹೇಳಿದ್ದಾರೆ.

ಯುದ್ಧ ಮತ್ತಷ್ಟು ತೀವ್ರಗೊಳ್ಳುವುದನ್ನು ಎಲ್ಲರೂ ವಿರೋಧಿಸುತ್ತಿದ್ದಾರೆ. ಪ್ರಧಾನಿ ಮೋದಿಯವರ ಭಾರತ ಮಾತ್ರವಲ್ಲದೆ, ಷಿ ಜಿನ್‌ಪಿಂಗ್ ಅವರ ಚೀನಾ ಕೂಡ ಇದಕ್ಕೆ ವಿರುದ್ಧವಾಗಿದೆ. ವಿಶೇಷವಾಗಿ ರಷ್ಯಾಗೆ ಶತ್ರುಗಳಂತೆ ಕಾಣಿಸದ ದೇಶಗಳಿಂದ ಇಂತಹ ಕರೆಗಳು ಬಂದಾಗ ಅದು ಬಹಳ ಮುಖ್ಯವಾಗುತ್ತದೆ. ಇಲ್ಲಿ ಭಾರತದ ಪಾತ್ರ ಅತ್ಯಂತ ನಿರ್ಣಾಯಕವಾಗಿದೆ ಎಂದು ಅವರು ಹೇಳಿದರು.

ರಷ್ಯಾದಿಂದ ರಿಯಾಯಿತಿ ದರದಲ್ಲಿ ಕಚ್ಚಾ ತೈಲವನ್ನು ಆಮದು ಮಾಡಿಕೊಳ್ಳುವ ನವದೆಹಲಿಯ ನಿರ್ಧಾರದ ಕುರಿತು ಪೋಲೆಂಡ್ ಮತ್ತು ಭಾರತದ ನಡುವೆ ಇದ್ದ ಭಿನ್ನಾಭಿಪ್ರಾಯಗಳು ಈಗ ತಿಳಿಯಾಗಿವೆ ಎಂದು ಬಾರ್ಟೋಸ್ಜೆವ್ಸ್ಕಿ ತಿಳಿಸಿದರು.

ಭಾರತವು ರಷ್ಯಾದಿಂದ ತೈಲ ಖರೀದಿಸುವುದನ್ನು ಈ ಹಿಂದೆ ವಾರ್ಸಾ (ಪೋಲೆಂಡ್ ರಾಜಧಾನಿ) ಟೀಕಿಸಿತ್ತು. ಏಕೆಂದರೆ ಇದು ರಷ್ಯಾದ ಯುದ್ಧದ ಆರ್ಥಿಕತೆಗೆ ಪರೋಕ್ಷವಾಗಿ ನೆರವಾಗುತ್ತಿದೆ ಎಂದು ವಾದಿಸಲಾಗಿತ್ತು. ಅದೇ ಸಮಯದಲ್ಲಿ, ತೈಲದ ಮೇಲಿದ್ದ ಭಾರಿ ದರ ರಿಯಾಯಿತಿಯ ಕಾರಣದಿಂದಾಗಿ ಭಾರತ ಏಕೆ ತೈಲ ಖರೀದಿಸಲು ಆಯ್ಕೆ ಮಾಡಿಕೊಂಡಿತು ಎಂಬುದನ್ನು ಪೋಲೆಂಡ್ ಅರ್ಥಮಾಡಿಕೊಂಡಿದೆ ಎಂದು ಅವರು ಹೇಳಿದರು. ಪ್ರಸ್ತುತ ಎರಡೂ ದೇಶಗಳು ಪರಸ್ಪರರ ನಿಲುವುಗಳನ್ನು ಚೆನ್ನಾಗಿ ಅರ್ಥಮಾಡಿಕೊಂಡಿದ್ದು, ಈ ವಿಷಯವು ಈಗ ಪ್ರಮುಖ ವಿವಾದದ ವಿಷಯವಾಗಿ ಉಳಿದಿಲ್ಲ ಎಂದಿದ್ದಾರೆ.

ಭಾರತವು ರಷ್ಯಾದ ತೈಲವನ್ನು ಖರೀದಿಸುವ ಬಗ್ಗೆ ನಾವು ಟೀಕಿಸಿದ್ದೆವು ಎಂದು ನಾನು ಭಾವಿಸುತ್ತೇನೆ. ಆದರೆ ಅದಕ್ಕಿದ್ದ ಆರ್ಥಿಕ ಕಾರಣವನ್ನು ನಾವು ಅರ್ಥಮಾಡಿಕೊಂಡಿದ್ದೇವೆ, ಏಕೆಂದರೆ ಅದು ಮಾರುಕಟ್ಟೆ ಬೆಲೆಗಿಂತ ಸುಮಾರು ಶೇಕಡಾ 40 ರಷ್ಟು ಭಾರಿ ರಿಯಾಯಿತಿಯಲ್ಲಿ ಸಿಗುತ್ತಿತ್ತು. ಅದನ್ನು ನಾವು ಅರ್ಥಮಾಡಿಕೊಂಡರೂ, ಅದು ರಷ್ಯಾದ ಯುದ್ಧ ಆರ್ಥಿಕತೆಗೆ ಇಂಧನವಾಗಿ ಬಳಸಲ್ಪಡುತ್ತಿತ್ತು. ಹೀಗಾಗಿ ನಾವು ಆ ವಿಷಯದಲ್ಲಿ ವಿಭಿನ್ನ ದೃಷ್ಟಿಕೋನವನ್ನು ಹೊಂದಿದ್ದೆವು ಎಂದು ಅವರು ಹೇಳಿದರು.

ಪ್ರಧಾನಿ ಮೋದಿಯವರ ಸ್ವತಂತ್ರ ವಿದೇಶಾಂಗ ನೀತಿಯನ್ನು ಪುಟಿನ್ ಶ್ಲಾಘಿಸಿದ ಕೆಲವೇ ವಾರಗಳ ನಂತರ ಪೋಲಿಷ್ ಸಚಿವರ ಈ ಹೇಳಿಕೆಗಳು ಬಂದಿವೆ. ಮಾಸ್ಕೋ ಜೊತೆಗಿನ ನವದೆಹಲಿಯ ಬಾಂಧವ್ಯದ ವಿಚಾರವಾಗಿ ಪ್ರಧಾನಿ ಮೋದಿ ಮೇಲೆ ಒತ್ತಡ ಹೇರಲು ಇತರ ದೇಶಗಳು ಯತ್ನಿಸಿದರೆ ಅದು ವ್ಯರ್ಥ ಎಂದು ಪುಟಿನ್ ಹೇಳಿದ್ದರು.

ವಿಶ್ವದಲ್ಲೇ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ಭಾರತ ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರ ಮೇಲೆ ಒತ್ತಡ ಹೇರುವುದು ಅಂತಾರಾಷ್ಟ್ರೀಯ ಸಂಬಂಧಗಳಿಗೆ ಹಾಗೂ ದ್ವಿಪಕ್ಷೀಯ ಬಾಂಧವ್ಯಕ್ಕೆ ಹಾನಿಕರ ಎಂಬುದನ್ನು ಎಲ್ಲರೂ ಅರ್ಥಮಾಡಿಕೊಂಡಿದ್ದಾರೆ. ಈ ಒತ್ತಡ ಎಲ್ಲಿಂದ ಬರುತ್ತದೆ ಎಂಬುದು ಮುಖ್ಯವಲ್ಲ. ಇದರಿಂದ ಯಾವುದೇ ನಕಾರಾತ್ಮಕ ಪರಿಣಾಮಗಳನ್ನು ನಾವು ಕಾಣುತ್ತಿಲ್ಲ ಎಂದು ರಷ್ಯಾದ ಸೇಂಟ್ ಪೀಟರ್ಸ್‌ಬರ್ಗ್ ಇಂಟರ್‌ನ್ಯಾಷನಲ್ ಎಕನಾಮಿಕ್ ಫೋರಂನ ಕಾರ್ಯಕ್ರಮವೊಂದರಲ್ಲಿ ಪುಟಿನ್ ಹೇಳಿದ್ದರು.

ಭಾರತವು ತನ್ನ ರಾಷ್ಟ್ರೀಯ ಹಿತಾಸಕ್ತಿಗಳಿಗೆ ಮುಖ್ಯವೆಂದು ಭಾವಿಸುವ ಎಲ್ಲಾ ದೇಶಗಳೊಂದಿಗೆ ತನ್ನ ಸಂಬಂಧವನ್ನು ಅಭಿವೃದ್ಧಿಪಡಿಸುತ್ತಿರುವುದಕ್ಕೆ ನಮಗೆ ಸಂತೋಷವಿದೆ ಎಂದು ಉಲ್ಲೇಖಿಸಿದ್ದರು(ಏಜೆನ್ಸೀಸ್​).