ನವದೆಹಲಿ: ಜಪಾನ್‌ನ ಐಚಿ-ನಗೋಯಾದಲ್ಲಿ ನಡೆದ 2026ರ ಏಷ್ಯನ್ ಗೇಮ್ಸ್ ಕ್ರೀಡಾಕೂಟದಲ್ಲಿ ಭಾರತೀಯ ಕ್ರೀಡಾಪಟುಗಳು ಅತ್ಯುತ್ತಮ ಸಾಧನೆ ತೋರಿದ್ದು, ಈ ಹಿನ್ನಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ (Narendra Modi) ಅವರು ಕ್ರೀಡಾಪಟುಗಳನ್ನು ಸನ್ಮಾನಿಸಿ ಗೌರವಿಸಿದರು. ಈ ಬಾರಿಯ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತೀಯ ಕ್ರೀಡಾಪಟುಗಳು ಒಟ್ಟು 85 ಪದಕಗಳನ್ನು ತಮ್ಮದಾಗಿಸಿಕೊಂಡಿದ್ದಾರೆ. ಇದರಲ್ಲಿ 21 ಚಿನ್ನ, 27 ಬೆಳ್ಳಿ ಮತ್ತು 37 ಕಂಚಿನ ಪದಕಗಳು ಸೇರಿವೆ.
ಮೂರು ವರ್ಷಗಳ ಹಿಂದೆ ಹ್ಯಾಂಗ್‌ಝೌ ಕ್ರೀಡಾಕೂಟದಲ್ಲಿ ಭಾರತವು ದಾಖಲೆಯ 106 ಪದಕಗಳನ್ನು ಗೆದ್ದುಕೊಂಡಿತ್ತು. ಅದಕ್ಕೆ ಹೋಲಿಸಿದರೆ ಈ ಬಾರಿ ಪದಕಗಳ ಸಂಖ್ಯೆಯಲ್ಲಿ ಸ್ವಲ್ಪ ಇಳಿಕೆಯಾಗಿದ್ದರೂ ಕೂಡ, ಭಾರತದ ಕ್ರೀಡಾ ಇತಿಹಾಸದಲ್ಲಿ ಇದು ಎರಡನೇ ಅತ್ಯಂತ ಯಶಸ್ವಿ ಕಾಂಟಿನೆಂಟಲ್ ಕ್ರೀಡಾಕೂಟ ಎಂಬ ಹೆಗ್ಗಳಿಗೆ ಪಾತ್ರವಾಗಿದ್ದು, ಐತಿಹಾಸಿಕ ಸಾಧನೆಯಾಗಿದೆ. ಈ ವೇಳೆ ಪ್ರಧಾನಿ ಎಲ್ಲಾ ಕ್ರೀಡಾಪಟುಗಳನ್ನು ಭೇಟಿಯಾಗಿ ಅವರೊಂದಿಗೆ ಮಾತುಕತೆ ನಡೆಸಿದರು. ಪ್ರತಿಯಾಗಿ ಕ್ರೀಡಾಪಟುಗಳು ಮೋದಿಗೆ ಹಸ್ತಾಕ್ಷರವಿರುವ ಜರ್ಸಿಗಳು, ಹಾಕಿ ಸ್ಟಿಕ್ ನೀಡಿ, ಶಾಲು ಹೊದಿಸಿ ಸನ್ಮಾನಿಸಿದರು.
ಈ ಬಾರಿ ಭಾರತದ ಕ್ರೀಡಾಪಟುಗಳು ಅದ್ಭುತ ಪ್ರದರ್ಶನ ನೀಡಿ ದೇಶಕ್ಕೆ ಹೆಮ್ಮೆ ತಂದಿದ್ದಾರೆ. ವಿಶೇಷವಾಗಿ, ಭಾರತವು ಗೆದ್ದ ಒಟ್ಟು 21 ಚಿನ್ನದ ಪದಕಗಳಲ್ಲಿ 13 ಚಿನ್ನದ ಪದಕಗಳು ತಂಡದ ಒಗ್ಗಟ್ಟಿನ ಆಟದಿಂದಲೇ ಬಂದಿವೆ ಎಂಬುದು ಹೆಮ್ಮೆಯ ಸಂಗತಿಯಾಗಿದೆ. ಪುರುಷರ ಹಾಗೂ ಮಹಿಳೆಯರ ಕ್ರಿಕೆಟ್ ತಂಡಗಳು ಟಿ-20 ಪಂದ್ಯಾವಳಿಗಳಲ್ಲಿ ಅತ್ಯುತ್ತಮ ಆಟವಾಡಿ ಜಯಗಳಿಸಿದವು. ಇದರೊಂದಿಗೆ ಕಬಡ್ಡಿ ತಂಡಗಳು ಕೂಡ ಹಿಂದಿನಂತೆ ತಮ್ಮ ಗೆಲುವಿನ ಪರಂಪರೆಯನ್ನು ಮುಂದುವರಿಸಿ ಚಿನ್ನದ ಪದಕಗಳ ಕ್ಲೀನ್ ಸ್ವೀಪ್ ಸಾಧನೆಯನ್ನು ಪುನರಾವರ್ತಿಸಿದವು.
ಇನ್ನು ಪುರುಷರ ಹಾಕಿ ತಂಡವು ತಮ್ಮ ಸಾಂಪ್ರದಾಯಿಕ ಕಾಂಟಿನೆಂಟಲ್ ಕಿರೀಟವನ್ನು ಭದ್ರವಾಗಿ ಉಳಿಸಿಕೊಳ್ಳುವ ಮೂಲಕ, ಮುಂಬರುವ ಲಾಸ್ ಏಂಜಲೀಸ್ 2028ರ ಒಲಿಂಪಿಕ್ಸ್ ಕ್ರೀಡಾಕೂಟಕ್ಕೆ ನೇರ ಅರ್ಹತೆಯನ್ನು ಗಿಟ್ಟಿಸಿಕೊಂಡಿತು. ಮತ್ತೊಂದೆಡೆ, ಮಹಿಳಾ ಹಾಕಿ ತಂಡವು ಫೈನಲ್ ಪಂದ್ಯದಲ್ಲಿ ಬಲಿಷ್ಠ ಚೀನಾ ತಂಡವನ್ನು 1-0 ಗೋಲುಗಳ ರೋಚಕ ಅಂತರದಿಂದ ಮಣಿಸಿ ಕ್ರೀಡಾ ಇತಿಹಾಸದಲ್ಲೇ ಹೊಸ ದಾಖಲೆ ಬರೆಯಿತು. ಈ ಐತಿಹಾಸಿಕ ಗೆಲುವಿನೊಂದಿಗೆ ಬರೋಬ್ಬರಿ 1982ರಿಂದ ಇಲ್ಲಿಯವರೆಗೆ ಮುಂದುವರಿದುಕೊಂಡು ಬಂದಿದ್ದ 44 ವರ್ಷಗಳ ಸುದೀರ್ಘ ಚಿನ್ನದ ಪದಕದ ಹಸಿವನ್ನು ನೀಗಿಕೊಂಡು ಹೊಸ ಇತಿಹಾಸ ಸೃಷ್ಟಿಸಿದವು.
ಇಷ್ಟೇ ಅಲ್ಲದೆ, ಆರ್ಚರಿ ಅಂದರೆ ಬಿಲ್ಲುಗಾರಿಕೆ ಹಾಗೂ ಶೂಟಿಂಗ್ ವಿಭಾಗಗಳಲ್ಲಿಯೂ ನಮ್ಮ ಕ್ರೀಡಾಪಟುಗಳು ಅತ್ಯುತ್ತಮ ವೈಯಕ್ತಿಕ ಹಾಗೂ ಮಿಶ್ರ-ತಂಡದ ಆಟದ ಪ್ರದರ್ಶನ ನೀಡಿ ದೇಶಕ್ಕೆ ಹಲವಾರು ಚಿನ್ನದ ಪದಕಗಳನ್ನು ಹೆಮ್ಮೆಯಿಂದ ತಂದುಕೊಟ್ಟಿದ್ದಾರೆ.
ಈ ಕ್ರೀಡಾಕೂಟದಲ್ಲಿ ಭಾರತವು ಓಟದ ಸ್ಪರ್ಧೆಗಳು ಮತ್ತು ವೈಯಕ್ತಿಕ ವಿಭಾಗಗಳಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿ ಒಟ್ಟು 27 ಬೆಳ್ಳಿ ಪದಕಗಳನ್ನು ಮುಡಿಗೇರಿಸಿಕೊಂಡಿದೆ. ಲಾಂಗ್ ಜಂಪ್‌ನಲ್ಲಿ ಶ್ರೀಶಂಕರ್ ಮುರಳಿ ಹಾಗೂ ದೂರು-ದೂರದ ಓಟದ ವಿಭಾಗದಲ್ಲಿ ಗುಲ್ವೀರ್ ಸಿಂಗ್ ಅವರು ಮುಂಚೂಣಿಯಲ್ಲಿ ನಿಂತು ದೇಶಕ್ಕೆ ಪದಕ ತಂದುಕೊಟ್ಟರು. ಹಾಗೆಯೇ, ಏಷ್ಯನ್ ಗೇಮ್ಸ್‌ನ ಮ್ಯಾರಥಾನ್ ಓಟದಲ್ಲಿ ಸಾವನ್ ಬರ್ವಾಲ್ ಅವರು ಅದ್ಭುತ ಹೋರಾಟದ ಮೂಲಕ ಬೆಳ್ಳಿ ಪದಕವನ್ನು ತಮ್ಮದಾಗಿಸಿಕೊಂಡರು.
ಇದಲ್ಲದೆ, ಖ್ಯಾತ ವೇಟ್‌ಲಿಫ್ಟರ್ ಮೀರಾಬಾಯಿ ಚಾನು ಅವರು ಮಹಿಳೆಯರ 49 ಕೆಜಿ ವಿಭಾಗದಲ್ಲಿ ಬೆಳ್ಳಿ ಪದಕವನ್ನು ಗೆದ್ದುಕೊಂಡರು. ಇದು 1998ರ ನಂತರ ಏಷ್ಯನ್ ಗೇಮ್ಸ್ ವೇಟ್‌ಲಿಫ್ಟಿಂಗ್‌ನಲ್ಲಿ ಭಾರತಕ್ಕೆ ದೊರೆತ ಪ್ರಮುಖ ಪದಕವಾಗಿದೆ. ಇವರಿಗೆ ಸಾಥ್ ನೀಡುವಂತೆ ಸ್ಕ್ವಾಷ್ ಕ್ರೀಡೆಯ ತಾರೆ ಅನಹತ್ ಸಿಂಗ್ ಮತ್ತು ಉದಯೋನ್ಮುಖ ಕುಸ್ತಿಪಟು ಅಂತಿಮ್ ಪಂಘಲ್ ಕೂಡ ಉತ್ತಮ ಪ್ರದರ್ಶನ ನೀಡಿ ದೇಶದ ಕೀರ್ತಿಯನ್ನು ಹೆಚ್ಚಿಸಿದರು.
ಈ 37 ಕಂಚಿನ ಪದಕಗಳು ನಮ್ಮ ದೇಶದ ಕ್ರೀಡಾ ಲೋಕದಲ್ಲಿ ಹೊಸ ಇತಿಹಾಸ ಬರೆದಿವೆ. ಉದಾಹರಣೆಗೆ, ಮಹಿಳೆಯರ ಮಿಶ್ರ ಮಾರ್ಷಲ್ ಆರ್ಟ್ಸ್ ಆಟದಲ್ಲಿ ಸುಚಿಕಾ ತಾರಿಯಾಲ್ ಅವರು ಅತ್ಯುತ್ತಮವಾಗಿ ಆಡಿ ಕಂಚಿನ ಪದಕ ಗೆದ್ದರು. ಏಷ್ಯನ್ ಗೇಮ್ಸ್ ಇತಿಹಾಸದಲ್ಲೇ ಈ ಕ್ರೀಡೆಯಲ್ಲಿ ಭಾರತಕ್ಕೆ ಸಿಕ್ಕ ಮೊದಲ ಪದಕ ಇದಾಗಿದೆ.
ಹಾಗೆಯೇ, ದೋಣಿ ವಿಹಾರ (ರೋಯಿಂಗ್) ಸ್ಪರ್ಧೆಯ ಪುರುಷರ ಡಬಲ್ಸ್ ವಿಭಾಗದಲ್ಲಿ ಸತ್ನಾಮ್ ಸಿಂಗ್ ಮತ್ತು ಸಲ್ಮಾನ್ ಖಾನ್ ಜೋಡಿ ಹೋರಾಡಿ ಕಂಚಿನ ಪದಕ ತಂದುಕೊಟ್ಟಿತು. ಈ ವಿಭಾಗದಲ್ಲೂ ಭಾರತಕ್ಕೆ ಸಿಕ್ಕ ಪ್ರಥಮ ಪದಕ ಇದು. ಇದರ ಜೊತೆಗೆ, 400 ಮೀಟರ್ಸ್ ಹರ್ಡಲ್ಸ್ ಓಟದಲ್ಲಿ ಕಂಚು ಗೆದ್ದ ವಿತ್ಯಾ ರಾಮರಾಜ್, ಬರೋಬ್ಬರಿ 40 ವರ್ಷಗಳ ಹಿಂದೆ ದಿಗ್ಗಜ ಕ್ರೀಡಾಪಟು ಪಿ.ಟಿ. ಉಷಾ ಮಾಡಿದ್ದ ಹಳೆಯ ದಾಖಲೆಯನ್ನು ಮುರಿದು ಹೊಸ ದಾಖಲೆ ಬರೆದಿದ್ದಾರೆ.
ಒಟ್ಟಾರೆಯಾಗಿ ಹೇಳುವುದಾದರೆ, 2026ರ ಏಷ್ಯನ್ ಗೇಮ್ಸ್ ಕ್ರೀಡಾಕೂಟದಲ್ಲಿ ನಮ್ಮ ಭಾರತ ತಂಡವು ಕ್ರೀಡಾ ಜಗತ್ತಿನಲ್ಲಿ ತನ್ನ ತಾಕತ್ತು ಏನೆಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ. ನಾವು ಹಿಂದಿನಿಂದಲೂ ಗೆಲ್ಲುತ್ತ ಬಂದಿರುವ ಸಾಂಪ್ರದಾಯಿಕ ಆಟಗಳ ಜೊತೆಗೆ, ಈ ಬಾರಿ ಕುಸ್ತಿಯಂತಹ ಕಾಂಬ್ಯಾಟ್ ಆಟಗಳು ಮತ್ತು ದೋಣಿ ವಿಹಾರದಂತಹ (ರೋಯಿಂಗ್) ಹೊಸ ವಿಭಾಗಗಳಲ್ಲಿಯೂ ಅದ್ಭುತವಾಗಿ ಪದಕಗಳನ್ನು ಬಾಚಿಕೊಂಡಿದ್ದೇವೆ. ಮುಂಬರುವ ಒಲಿಂಪಿಕ್ಸ್ ಕ್ರೀಡಾಕೂಟಕ್ಕೆ ನಮ್ಮ ಅಥ್ಲೀಟ್‌ಗಳು ಸಿದ್ಧತೆ ನಡೆಸುತ್ತಿದ್ದು, ಈ ಬಾರಿ ಸಿಕ್ಕಿರುವ ಭರ್ಜರಿ 85 ಪದಕಗಳ ಸಾಧನೆಯು ನಮ್ಮ ದೇಶದಲ್ಲಿ ಪ್ರತಿಭಾವಂತ ಆಟಗಾರರಿಗೆ ಯಾವುದೇ ಕೊರತೆಯಿಲ್ಲ ಎಂಬುದನ್ನು ಹಾಗೂ ಮುಂದಿನ ದಿನಗಳಲ್ಲಿ ನಾವು ಯಾವೆಲ್ಲ ಕ್ಷೇತ್ರಗಳಲ್ಲಿ ಇನ್ನಷ್ಟು ಎತ್ತರಕ್ಕೆ ಬೆಳೆಯಬಹುದು ಎಂಬುದನ್ನು ಸ್ಪಷ್ಟವಾಗಿ ತೋರಿಸಿಕೊಟ್ಟಿದೆ(ಏಜೆನ್ಸೀಸ್).